Muka-kwambulula 5
5
Kesi ulinge vwasi vikulaeso
1Nyanyameni omo muya ku Njuvo ya Shukulu Kalunga, cinapu cacivwa kuya mukulilongesa kutuvakana kukombelela vin̄ombelo ngwe muvakalingi vilema, nameme vakevo kuvalingile vuvi. 2Yongola simbu kanda wendeke, co kesi ulinge vwasi vikulaeso kuli Njambi, omwo Njambi wakala mwilu, co yove uli ano asi, ngecivene, kesi wendeke manene kutuvakana vije viwasa kulinga. 3Nga simbu yoshe uyongola-yongola a cuma cimo, co cije cuma uyongola ukacilota. Nga wendeka manene, ukendeka vyuma vya vulema. 4#Mya 66:13-14 Omwo ulisinga cisingo kuli Njambi, kesi wishwale kucilinga. Njambi kesi kuvwaelela na vilema. Linga vije unamukulaesa. 5Mwamuvwa kesi ulisinge, kutuvakana kulisinga, co kuucilingi. 6Kesi utave majwi ove akutwamenene mu vuvi, ngecivene, leka muka-kukombelela wa Njambi ngwove, “Kesi mukemwo njayongwele.” Njambi asa kunyongesa vyuma vyoshe vije wapangelele, ngecivene, kesi wendeke cuma cije ciluvalesa Njambi. 7Vinjozi vyavingi, na majwi amangi, vinapu vyangoco, oloni unapande kusingimika Njambi.
Mwonyo unapu wangoco
8Nga umona tuutu vavayandesa mu lifuti lyeni nakuvavindika vushunga na moko yavo, co kesi ukomoke a vyuma vyangacije, omwo mwata wamundondo vamunyunga kuli mwata wakama, co akamwa yavo kuvali veka lalo vakama vavanyunga.
9Nameme mwene omwo napu mwata wakama, nendi akatambula vukwasi ku mulambu uje vakafwete a mahya.
10Uje woshe azema manene vimbongo, kasa kuviwana, uje woshe azema manene vufuko, kasa kuvuwana. Vinapu vyangoco. 11Omo vufuko vutuma, co vaka-kuvulya vapwa vavangi lalo. Vimbongo vyove kuvyasa kukunenela cuma cimo cacivwa, vanu veka vakalikwasesavyo. 12Muka-kupanga nambe alya vyavindondo nambe alya vyavingi asa kulala tulo, oloni muka-kufuka, nambe nakuta kasa kulala tulo omwo visinganyeka vyendi vinapu vyavingi.
13Kuli cuma cimo cacivi cinjinamono ano asi, vanu vasa kukala na vufuko, oloni vuvanenela lika luvinda, 14co vuje vufuko vwazimbalele akuvupangesa mu ngila yaivi, co nacimo cai vakele naco cakusezela vana vavo. 15#Yom 1:21; Mya 49:17; 1 Tim 6:7 Twezile ano asi mushelengwa, co omo tutsa tukapwa lalo va mushelengwa, nacimo cuma tukambata cai ku vije twapangelele. 16Eci lalo naco cinapu cuma cacivi! Tukaya ngwe muje vene mutwezile. Vikajo tuwanao akusheka lihunzi? 17Matangwa akuyoya kwetu kwoshe apwa a lisusulungu, tulinakumona tuyando twakama, na mishongo, na vukalu.
18Kenga, eci cikeco cinjinamono cije cinapu cacivwa ku munu woshe, cinapu kulya nakunwa nakujolela, a vipangi vyetu vyoshe vije vitunapangela ano asi matangwa amandondo akuyoya kwetu aje anatwana Njambi. Evi vikevyo vyashaka Njambi ngeci tuvilinge. 19Nga Njambi aana munu vufuko na vivala ngeci munu avwaelele navyo, munu napande kukandelela nakuvwaelela a vije vyanapangela. Evi vinapu vwana vwakutunda kuli Njambi. 20Omwo Njambi natavesa munu ngeci avwaelele, kakalishoshomwena lalo manene avundondo vwa matangwa endi akuyoya.
The Bible in Mbunda ©The Bible Society of Zambia, 2006