Muka-kwambulula 4
4
Mwonyo unapu wangoco
1Asinoni njakengele lalo a vyoshe vya vushunga vije vilinakulingiwa ano asi. Vaka-kuyanda vakele nakulila, co naumo wai wavazembelekele. Naumo wai wavazembelekele, omwo vaje vaka-kuvayandesa vakele na nzili ali vakevo. 2Co njayongwele ngeci vanu vaje vanatsi laja valimwamuvwa manene kutuvakana vanu vaje vacili nakuyoya. 3Oloni vaje kanda vasemuke, valimwamuvwa manene kutuvakana vaje vanasemuka laja, omwo vaje kanda vasemuke kanda vacimone vyuma vyavivi vije vilinakulingiwa ano asi.
4Asinoni njamwene vanu omo vaundanganene kushaka kukala na vufuko vwavungi kutuvakana vakwavo. Oloni vinapu vyangoco. Vinapu lika ngwe kusheka lihunzi. 5Vilema kuvashaka kupanga, co valanduka ku njala. 6Amo mukemwo, oloni mwamuvwa kukala lika na vyavindondo mu kwoloka kutuvakana kuungama visimbu vyoshe nakupanga na mavoko avali mukusheka lihunzi.
7Njamwene cuma cimo lalo cije capwa cangoco ano asi. 8Kwakele munu uje wayoyele endi lika. Kakele na mwana wa munalume, nambe ndolome, oloni simbu yoshe wakele nakupanga, kapwisilemo vufuko vuje vwakele navwo. Omwo vikajo wakele nakuundanganena manene nakulishuula vavenya ku vyuma vyoshe vyakuvwaelela? Evi vinapu vyangoco lalo, co vinapu vyakukomokesa mukuyoya.
9Vanu vavali vapwa vavavwa kutuvakana munu umo, omwo muvuvali vwavo vasa kupanga mwamuvwa vipangi vyavo. 10Nga umo wavo awila asi, co mukwavo asa kumukwasa nakumwindula. Oloni nga munu endi lika awa, cinapu cacivi manene omwo kukwesi umo wakumukwasa ngeci enduke. 11Co lalo nga vanu vavali valala amolika, co valitwiminina, oloni wasa kulitwiminina vatijo ove lika? 12Munu umo asa kukatukila umo weni mukulinga nendi lwozi, oloni kasa kulinga lwozi neni muvavali. Ngwe muvakendeka ngwavo, “Mukole wakuzenga mutatu waukalu kuuvatula.”
13Wasa kupwa mukwenje wa vuutu, oloni nga uli na mana unatuvakana mwene wa mukulunu wa cilema uje kesi kutava kumunangula. 14Nameme yove kuwasemukilile ku naanga ya vumwene, oloni unapu u cinzinda nambe kautu, anga vene wasa kupwa mwene. 15A simbu imo njamwene vanu voshe va ano asi vakavangeya ntwama wa mukwenje uje washwanene a vumwene. 16Vanu vaje vamukavangeyeye vapwile vavangi manene-nene, oloni mu myaka ya kulutwe, naumo wai akavwaelela. Evi vyangoco lalo. Vinapu lika ngwe kusheka lihunzi.
The Bible in Mbunda ©The Bible Society of Zambia, 2006