Muka-kwambulula 3
3
Cuma na cuma cili na simbu yaco
1Vyuma vyoshe vili ano asi vili na simbu yavyo ije yanemika Njambi.
2Kuli simbu yakusemuka, na simbu ya kutsa,
kuli simbu yakukuna, na simbu yakutukula vivanakunu,
3kuli simbu yakutsiya, na simbu yakwindula,
kuli simbu yakusiwula, na simbu yakutunga.
4Kuli simbu ya vusiwa, na simbu yakujolela,
kuli simbu yakulila, na simbu yakukina,
5kuli simbu yakulizema, na simbu yakulizinda,#3:5 KULI SIMBU YAKULIZEMA, NA SIMBU YAKULIZINDA: Mu ciHevelu majwi awa kuwalumbunukile mwamuvwa.
kuli simbu yakulitsemba, na simbu yakujeneka kulitsemba.
6Kuli simbu yakushakezeka vyuma, na simbu yakuvizimbalesa,
kuli simbu yakutulika, na simbu yakushandola,
7kuli simbu yakutavula, na simbu yakutonga,
kuli simbu ya kwoloka kuluu, na simbu yakusimutwiya.
8Kuli simbu ya cizemo, na simbu ya cizindo,
kuli simbu ya nzita, na simbu ya kwoloka.
9Muka-kupanga awanao vikajo akuundangana kwendi? 10Njazivuka vitele vyakulema vije vyanatutwiki Njambi. 11Njambi naaka simbu yaivwa ya vyuma vyoshe. Co lalo nalingisa vanu kuyongola vyuma vya kulutwe, oloni nameme ngoco, munu kasa kuzivuka vije vyanapanga Njambi kutunda akulivanga kweta na ku mamaneselelo. 12Njinazivuka ngeci nacimo cacivwa kuli yetu cai, kutuvakana kuvwaelela nakulinga mwamuvwa simbu tuciyoya. 13Omwo vwana vwa Njambi ku vanu vunapu kuvwaelela kuje tuwana mukulya na mukunwa nakuvwaelela lalo kuje tuwana mu vipangi vije tulinakulinga.
14Njinazivuka ngeci vyuma vyoshe vije vyakalingi Njambi vikakala ku myaka yoshe. Nacimo cai vakaakelako nameme kutundisako. Njambi nalingi vyuma evi ngeci vanu vamukomoke. 15Cuma coshe ciliko lelo na ku san̄ulu kucakele, co cije cikakalako kulutwe, kucakele na ku san̄ulu. Njambi akalingisa cuma cimo ngeci cilingiwe lalo ku simbu na simbu.
Mu kaye kumwesi vushunga
16Co njamwene cuma cimo ano asi, mu mutambela wa vushunga, mwakele vuvi, mu mutambela wa vuvi, mwakele vushunga. 17Njalyendekesele mu mbunge yange ngwange, “Njambi asompa vaka-vushunga na vaka-vuvi mumolika, omwo vyuma vyoshe na vilinga vyoshe, vikalingiwa a simbu yavyo ivavimikila.” 18Njayongwele ngeci ngwange Njambi alinakutwilula kutumwesa ngeci kuma kutwesi na vuvwa kutuvakana tusitu. 19Ngeci mwa tusitu, tuyoya, co tutsa, tuvavoshe tunapu mumolika. Voshe vanapu vitanga vyakulifwa. Munu kesi na seo kutuvakana kasitu embwe, omwo mwonyo wapwa wangoco kuli munu na kuli kasitu. 20Vyuma vyoshe vyakuyoya vikai ku mutambela umolika. Vatutundisile ku livu, co lalo tukeluka ku livu kutwatundile. 21Iyajo asa kuzivuka ngeci mwonyo wa munu uya kwilu nambe mwonyo wa kasitu uya mu livu? 22Njanangukile ngeci cuma cacivwa cije citwasa kulinga cinapu kulivwaelelesa na vije vitunapangela. Nacimo cai twasa kulinga. Kukwesi ngila itwasa kuzivukila vije vikalingiwa omo tunatsi.
The Bible in Mbunda ©The Bible Society of Zambia, 2006