Muka-kwambulula 2
2
1Njalyendekesele mu mbunge, nakweseka kuwana kuvwaelela mukwafwa, oloni njawanene ngeci, neci lalo cinapu cangoco. 2Njendekele ngwange, “Tujolo twapwa vulema. Senga ikwasa vikajo?” 3Njashakele kuwana vyuma vika vije vinapu vyavivwa kuli yetu mu simbu yaindondo ije tulinayo ano asi. Ngecivene, njayongwele kulivwaelelesa yange vavenya na vinyu ngeci njiwane vati muvwafwa vulema na mana.
4 #
1 Vim 10:23-27; 2 Miz 9:22-27 Njapangele vipangi vyakama. Njatungile vinjuvo, co njakunine mikolovozi ya vushuka vwa vinyu. 5Njalimine mahya a vishani na mahya a miti ya vushuka yakuliseza-seza, 6njendile mashali a mema akwitazela ku miti. 7#1 Vim 4:23 Njalandele vindungo va vanalume na vindungo lalo va vanakazi, co njakele na vindungo vakukitila mu njuvo yange. Njafukile vimuna vavangi kutuvakana vimuna va vanu voshe vaje vakele mu Yelusalema. 8#1 Vim 10:10,14-22 Vimyene va miyati yeka vanjinenelele siliva na ngolinde, na vufuko vwa seo yakama. Vanalume na vanakazi vanjimbilile myaso mukunjitundisa malunge, co njakele na vanakazi vavangi.
9 #
1 Miz 29:25
Njapwile nji mwene wakama, kutuvakana vimyene voshe vaje vakele mu Yelusalema, co lalo njakele na mana. 10Vyuma vyoshe vinjashakele, njaviwanene. Njalingile senga. Njalyalesele a vyuma vije vinjapangele, co vyoshe evi vyapwile cikandelela cange. 11Asinoni njayongwele a vije vyoshe vinjalingile, na muje njaundanganene a cipangi cije njapangele, co njamwene ngeci vyoshe vinapu vyangoco. Vinapu lika ngwe kusheka lihunzi, navimo vyai vinjawaneneo ano asi. 12Nameme ngoco, mwene asa kulinga lika vije vivalingile vimyene va ku san̄ulu.
Ngecivene, njashangumukile kuyongola mukwalumbunukila kukala na mana, na kuzaluka, na vulema. 13Njamwene ngeci mana apwa amavwa kutuvakana vulema, ngwe mutanya wapwa wauvwa kutuvakana lisusulungu. 14Vaka-mana vasa kumona kuje valinakuya, co vilema kuvasa kumona kuvaya. Oloni njizivuka ngeci kuvindama kunavandamena yetu voshe. 15Njalyendekesele mu mbunge yange ngwange, “Vyuma vije vikalingiwa kuli vilema vikalingiwa kuli yange lalo, vikajo njiwanao akukala na mana angacije?” Co njalikumbulwile yange vavenya ngwange, “Vyuma vyoshe vinapu vyangoco.” 16Naumo wai akanuka vaka-mana, co lalo naumo wai akanuka vilema. A matangwa aje alinakwija kulutwe tuvavoshe vakatwivala. Tuvavoshe tukatsa cifwa cimo, vaka-mana na vilema. 17Ngecivene, kuyoya kunapu kwangoco kuli yange, omwo vyuma vyoshe vili ano asi vyanjinenela tuyando lika. Co vyuma vyoshe vinapu vyangoco, vinapu lika ngwe kusheka lihunzi.
18Nacimo cai cije cinjapangelele cinjawanene cakele na seo kuli yange, omwo njazivukile ngeci njikaciseza kuli uje akanjishwana. 19Iyajo azivuka ngeci uje akanjishwana akapwa muka-mana nambe cilema? Oloni ikeye akakala na vyuma vyoshe vije vinjapangelele, vyuma vyoshe vije vinjawanene mu mana ange ano asi. Vyuma vyoshe vinapu vyangoco. 20Co njaliveyele akuundangana manene na nzili ano asi. 21Omwo munu apanga vipangi vyendi na mana, nakuzivuka, na vutongwe, co aseza vyoshe vije vyanawana kuli munu uje kavipangelele. Eci lalo cinapu cangoco kucavwaele! 22Munu akawanao vikajo akuundangana kwoshe kuje kwalinakuundangana ano asi? 23#Yom 5:7; 14:1 Matangwa endi oshe, vipangi vyendi vikamunenela vusiwa na tuyando. Nambe ku vutsiki mbunge yendi kuyesi kuhwima. Vyuma vyoshe evi vinapu vyangoco.
24 #
Muka-kwa 3:13; 5:18; 9:7; Luk 12:19; 1 Koli 15:32 Kukwesi cuma cacivwa ku munu cije cinatuvakana kulya, nakunwa, nakukala mwamuvwa mu vipangi vyendi. Njazivukile ngeci vyuma evi vinapu vwana vwakutunda kuli Njambi. 25Kukwesi umo uje avwaelela mukulya nakukala mwamuvwa ngwe yange. 26#Yom 32:8; Vis 2:6 Njambi aana mana, nakuzivuka, nakuvwaelela kuli vaje vamuvwaelelesa, oloni akapangesa vaka-vuvi, kuwana nakutulika, ngeci vije vivawana vavyane kuli vaje vamuvwaelelesa. Evi vyoshe vinapu vyangoco, vinapu lika ngwe kusheka lihunzi.
The Bible in Mbunda ©The Bible Society of Zambia, 2006