Muka-kwambulula 1
1
Mwonyo unapu wangoco
1Awa akewo majwi a muka-kwambulula, muna Ndaviti, uje wapwile mwene mu Yelusalema.
2Muka-kwambulula ngwendi vinapu vyangoco-ngoco, vyuma vyoshe vinapu vyangoco. 3Vikajo vyawanao munu a vipangi vyoshe vije vyalinakuundangana ano asi? 4Visemwa viija, co visemwa viya, oloni kaye anga vene kakala myaka yoshe. 5Litangwa lituuka, co lalo lilauka, lizambwila vwasi-vwasi ku mutambela walyo kuje kulikatuukila. 6Lihunzi lihuwila ku mbwela, na ku kunto, lilizenga noku-noku, kwoshe-ikwoshe. 7Vindonga vyoshe vikatwala mema avyo ku mema a kalunga, oloni mema a kalunga kuwesi kushula embwe. Mema eluka kuje kuyashangumukila ndonga, co ashangumuka kwita lalo. 8Vyuma vyoshe vijukisa, vyuma vije munu kasa kwambulula. Mesho etu kuwesi kukuta na vyuma vyakumona, na matwi etu kuwesi kushula na vyuma vyakuziva. 9Vije vyakeleko akulivanga vikakalako lalo kulutwe. Vije vyalingiwile laja vikalingiwa lalo kulutwe. Kukwesi cuma caciha ano asi. 10Munu umo asa kwendeka ngwendi, “Kengeni cuma eci caciha!” Oloni cuma eci cakeleko laja ku san̄ulu simbu kanda tusemuke. 11Naumo wai asa kwanuka vyuma vije vyalingiwile ku san̄ulu, ku matangwa a kulutwe naumo wai akanuka vyuma vije vilingiwa ololo, na vyuma vije vikalingiwa kulutwe.
Vije vyamwene muka-kwambulula
12Yange muka-kwambulula, njapwile mwene wa Isalele mu Yelusalema. 13Na mana ange oshe, njesekele kwilula nakulilongesa vyuma vyoshe vije vilingiwa muno mu kaye.
Njambi nakaluwisa vyuma evi ngeci yetu vanu kesi tuzivisise. 14Njinamono vyuma vyoshe vyalingiwa ano asi, kengeni, vyuma vyoshe vinapu vyangoco. Cinapu lika ngwe kusheka lihunzi. 15Kuwasa kushungamesa cuma cije ca kupenga-penga, co lalo kuwasa kulava vyuma vije kuvyesiko.
16 #
1 Vim 4:29-31
Njalyendekesele mu mbunge yange ngwange, “Njili na mana manene kutuvakana voshe vaje vashwanene mu Yelusalema. Njili na cizango cakulilongesa, co njalilongesa vyuma vyavingi.” 17Njayongwele kulilongesa ngeci njangunune kuzivisisa na vulema, mana na vuzaluke. Oloni njacimwene ngwange cinapu lika ngwe kusheka lihunzi. 18Kukala na mana manene kunena kulinyenga, uje ali na mana manene vusiwa lalo kuli ikeye vupwa vwakama.
The Bible in Mbunda ©The Bible Society of Zambia, 2006