Kwituluka mu Mashiko 17
17
1“Kesi mukakombelele kuli Shukulu Kalunga Njambi yeni ngombe nambe manga uje ali na kapenga, omwo vyuma vyangacije vyapwa vya vunyengwe ku mesho a Shukulu Kalunga Njambi yeni.
2“Nga mukaziva mu nganda yeni imo munalume umo nambe munakazi umo nalingi cuma cacivi ku mesho a Shukulu Kalunga Njambi yeni, nakupokola cikumiiyo cendi, 3#Kut 22:20 akulemesa nakupangela vinjambi veka, nambe kulemesa litangwa, nambe ngonde, nambe vingongonosi, vije vyanavindika Shukulu Kalunga, 4nga mukaziva vukaleo vwangacije, co mukehwisise mwamuvwa. Co kengeni nga cuma eci ca vunyengwe vanacilingi mu Isalele, 5co mukatwale uje munu anja ya nganda nambe munalume nambe munakazi, nakumutsiya na mamanya. 6#Kul 35:30; Kwi 19:15; Mat 18:16; 2 Koli 13:1; 1 Tim 5:19; VaHe 10:28 Nameme ngoco, mukamutsiye nga kuli vakaleo vavali nambe vatatu. Co ikeye kuvapandele kumutsiya nga kuli mukaleo umolika embwe. 7#1 Koli 5:13 Vakeleo vakalivange kumwasha mamanya, asinoni vanu voshe vakamwashe mamanya uje munu nakumutsiya. Co mu ngila eyi mukatundisa vuvi akati keni.
8“Nga milonga imo ikakaluwa akuyisompa ngeci mwa milonga yakuyongwela munu nga ikeye natsi ku monde nambe vanalingi wakutsiya na cintulu, nambe milonga yakuvulumuna munu a muvila, nambe n̄anda yakulipangela vushwana. Omo vanalingi evi, co mukaya ku mwela uje wakaangula Shukulu Kalunga Njambi yeni wakumulemesela. 9Asinoni mukambulula uje mulonga kuli muka-kukombelela wa ku naanga ya Levi na kuli lyaako uje akakalako matangwa aje, mukavehula, co vakevo vakamileka nguli yakuteta mulonga. 10Mukalinga ngwe muvakamileka a n̄anda ije ku mwela wakaangula Shukulu Kalunga Njambi yeni, co mukanyanyama akulinga mwoshe muje muvakaminangula. 11Co mukatava kusompa kwavo, ngeci mukavangeye vilongesa vyavo mwoshe muje muvinapu. 12Nga munu umo ajeneka kwononoka kuli muka-kukombelela uje muka-kupangela Shukulu Kalunga Njambi yeni, nambe kuli lyaako, co uje munu vakamutsiye, ngeci mukatundise vuje vuvi mu Isalele mwoshe. 13Co vanu voshe omo vakazivako, co vakakala na lyova kuvakalingi lalo cuma cakufwa ngacije nakwamuka.
Cifwa ca mwene ivakaangula
14 #
1 Sam 8:5
“Omo muketa mu lifuti lije lyakamyana Shukulu Kalunga Njambi yeni kulishwana nakukalamo, asinoni mukayongola kukala na mwene ngwe miyati yoshe vaje vanamizengeleka. 15Mwa vushunga uje munu imukaangula kupwa mwene, kuvanga akapwe uje yakaangula Shukulu Kalunga Njambi yeni. Ikeye akapwe umo wa ali vandolome veni vene, co kesi mukapwise muka-kwija mwene yeni embwe. 16#1 Vim 10:28; 2 Miz 1:16; 9:28 Oloni mwene kapandele kukala na tuvalu vavangi-vangi va nzita yendi embwe, nambe kutuma vanu ku Ingito nakukalanda tuvalu embwe, omwo Shukulu Kalunga wendekele ngeci kesi vakelukileko kuje. 17#1 Vim 10:14-22,27; 11:1-8; 2 Miz 1:15; 9:27 Co mwene kesi akakale na vanakazi vavangi embwe, kutewa mbunge yendi ikatanguka kuli Shukulu Kalunga, nambe kesi akalitumisile ikeye vavenya siliva na ngolinde. 18Omo akatumbama a litanda lyendi lya vumwene, co akalisonekele ikeye vavenya livulu lya mashiko a Njambi awa na vilongesa vyakutunda mu livulu livanatulika vaka-kukombelela va ku naanga ya Levi. 19Ngecivene, uje mwene akakale na lije livulu nakulavamo matangwa oshe akuyoya kwendi, co akalilongese kukomoka Shukulu Kalunga Njambi yendi, nakunyunga mwamuvwa majwi oshe a lishiko eli na vizilika evi nakuvilinga, 20kutewa mbunge yendi ikalyalesa akati ka vandolome vendi vaIsalele nakupokola mashiko a Shukulu Kalunga mukulinga nevi nevi. Asinoni akashwana myaka yaingi, co vatekulwila vendi vakashwana Isalele ku visemwa vyavingi.
Currently Selected:
Kwituluka mu Mashiko 17: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
