Kwituluka mu Mashiko 16
16
Ciwano ca Pasovala
(Kut 12:1-20)
1“Mukanyunge ngonde ya Avive#16:1 NGONDE YA AVIVE: Mu ciHevelu inapu ngonde yakulivanga, kutunda akati ka Kuwana nakweta akati ka Kuhu. nakulisamba a Ciwano ca Pasovala kuli Shukulu Kalunga Njambi yeni, omwo mu ngonde ije vene ku vutsiki, mukemwo Shukulu Kalunga Njambi yeni wamitundisile mu Ingito. 2Co mukakombelela n̄ombelo ya manga nambe ya ngombe kuli Shukulu Kalunga Njambi yeni ya Ciwano ca Pasovala ku mwela uje wakaangula Shukulu Kalunga Njambi yeni wakumulemesela. 3Omo mukalya vyakulya vije, kesi mukalye makende akwaka musima embwe. A matangwa atanu na avali mukailya na makende akujeneka musima. Mukawatumbula ngweni makende a tuyando omwo mwatundile mu Ingito lumbisi. Simbu yoshe yakuyoya kweni mukanuka litangwa lije mwatundile mu lifuti lya Ingito, lifuti lije lya tuyando. 4A matangwa atanu na avali mu lifuti lyeni mu vinjuvo vyeni, kesi mukakale musima. Co situ ya cimuna uje mukakombelela a litangwa lyakulivanga ku cingwezi, kesi mukaisezeo, munapande kuyilya vutsiki vuje vene.
5“Kesi mukakombelele cimuna wa Ciwano ca Pasovala mu limbo lyoshe-ilyoshe lije lyakamyana Shukulu Kalunga Njambi yeni, 6kuvanga lika ku mwela uje wakaangula Shukulu Kalunga Njambi yeni wakumulemesela. Kukekwo mukakombelela n̄ombelo ya Ciwano ca Pasovala ku cingwezi akulauka kwa litangwa a simbu ije mwatundile nayo mu Ingito. 7Co mukoca ije situ nakuyilila mu mwela uje wakaangula Shukulu Kalunga Njambi yeni wakumulemesela, co alikaki mukeluke ku membo eni. 8#VaLe 23:5-8; Kul 28:16-25 A matangwa atanu na limo mukalya makende akujeneka musima, co a litangwa lyamucitanu na avali mukalikungulula nakulemesa Shukulu Kalunga Njambi yeni. Co kesi mukapange vipangi a litangwa lije.
Ciwano ca Kuteja
(Kut 34:22; VaLe 23:15-21)
9“Mukalava visimano vitanu na vivali kutunda a simbu ije mushangumuka kuteja vimbuto. 10Asinoni mukanyunga Ciwano ca Kuteja mukusingimika Shukulu Kalunga Njambi yeni. Mukamwane mulambu weni wa n̄ombelo ya cizango ngwe ku vivezikiso vije vyakamivezikisa Shukulu Kalunga Njambi yeni. 11Co mukajolela ku mesho a Shukulu Kalunga Njambi yeni, yeni na vana veni va vanalume, na ava va vanakazi, na vangamba veni va vanalume, na ava va vanakazi, na vaLevi vaje mulinakukala navo, na vaka-kwija, na visiwa, na vifwile vaje valinakukala akati keni. Mukalingila eci ku mwela uje wakaangula Shukulu Kalunga wakumulemesela. 12#Kul 28:26-31 Mukanuke ngeci neni mwapwile mu vinzinda mu lifuti lya Ingito, co mukanyanyame nakunyunga vizilika evi.
Ciwano ca Mapapela
(VaLe 23:33-43)
13“Mukanyunga Ciwano ca Mapapela a matangwa atanu na avali omo mukongulula vimbuto vyeni vya ku lijungwilo, na vinyu vyeni vyakukamuna. 14Mukajolela a ciwano ceni, yeni na vana veni va vanalume, na ava va vanakazi, na vangamba veni va vanalume, na ava va vanakazi, na vaLevi, na vaka-kwija, na visiwa, na vifwile vaje valinakukala akati keni. 15#Kul 29:12-38 A matangwa atanu na avali mukanyunga ciwano kuli Shukulu Kalunga Njambi yeni ku mwela uje wakaangula wakumulemesela, omwo Shukulu Kalunga Njambi yeni akamivezikisa a kuteja kweni na a vipangi vyoshe mukapanga na mavoko eni, co muvavoshe mukajolela amolika.
16“Vanalume voshe va ku muyati weni vakalikungulwile ku mesho a Shukulu Kalunga Njambi yeni visimbu vitatu a mwaka ku mwela uje waakangula Shukulu Kalunga wakumulemesela, vakalikungulwile ku Ciwano ca Pasovala, na ku Ciwano ca Kuteja, na ku Ciwano ca Mapapela. Co vakanene mulambu. 17Munu na munu akaane ngwe mwanasela, ngwe ku vivezikiso vije vyanamuvezikisa navyo Shukulu Kalunga Njambi yendi.
Vingila vya a kusompa
18“Mukemika maako na vamyata mu membo eni oshe aje akamyana Shukulu Kalunga Njambi yeni ngwe ku miyati yeni. Vanalume ava vakasompa vanu mu vushunga. 19#Kut 23:6-8; VaLe 19:15 Vakevo vanapande kusompa mu vushunga, kesi vamwese kahangu mukusompa kwavo. Co kuvapandele kutambula lizika-kanwa, omwo lizika-kanwa lizivalesa mesho a vaka-mana nakwingika majwi a vaka-vushunga. 20Simbu yoshe mukapwe vaka-kusompa mwamuvwa, ngeci mukayoye, nakushwana lifuti lije lyakamyana Shukulu Kalunga Njambi yeni.
21 #
Kut 34:13
“Kesi mukashimbikile manda ya citi ca Ashela njambi wa munakazi kumukulo wa mutula wa Shukulu Kalunga Njambi yeni. 22#VaLe 26:1 Co kesi mukalishimbikile manda ya limanya lyakulemesela kamponya, omwo Shukulu Kalunga wazinda evi.
Currently Selected:
Kwituluka mu Mashiko 16: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
