Kwituluka mu Mashiko 18
18
Mitambela yakwana vaka-kukombelela va ku naanga ya Levi
1“Muyati wa vaka-kukombelela vaje va ku naanga ya Levi kuvakakala na mutambela nambe vushwana mu lifuti lya vaIsalele. Vakevo vakayoyela lika a vin̄ombelo na milambu vije vakanene vanu kuli Shukulu Kalunga. 2#Kul 18:20 Kuvakakala na vushwana akati ka vandolome vavo embwe. Shukulu Kalunga ikeye vushwana vwavo ngwe mwavakulaesele.
3“Evi vikevyo vaka-kukombelela vakatambula kuli vanu vaje vakakombelela ngombe nambe manga, vakavaane lyehe, na vimbange, na lifu, 4Co mukavane vimbuto vyakulivanga, na vinyu vyeni vyaviha, na mazi a olive, na maka a vimanga aje akulivanga kuteula. 5Evi vyoshe akavilinga omwo Shukulu Kalunga Njambi yeni waangwile vaLevi na vatekulwila vavo mu miyati yeni yoshe ngeci vakemane nakupanga mu lizina lya Shukulu Kalunga simbu yoshe.
6“KaLevi woshe uje ashaka nasa kutunda mu nganda yoshe-iyoshe ya mu Isalele nakwija ku mwela uje waakangula Shukulu Kalunga wakumulemesela, 7co akapange mu lizina lya Shukulu Kalunga Njambi yendi, ngwe muvakalingi vandolome vendi vaLevi vaje vakemana ku mesho a Shukulu Kalunga nakupanga vipangi. 8Akakale na vyakulya vyakupwisa amo na vakwavo vaLevi, co napande kutulika vije vyoshe vikatunda ku naanga yendi.
Mosesa anangula vaIsalele a vingila vyavivi vya vanu vali mu lifuti lije
9“Omo mukakovela mu lifuti lije lyakamyana Shukulu Kalunga Njambi yeni, kesi mukatembunwine vilinga vya vunyengwe vya miyati ya muje mumukakala. 10Kesi mukakombelele vana veni va vanalume, nambe va vanakazi kupwa n̄ombelo embwe. Co vanu veni kesi vakapwe vaka-kutaa, nambe vakakulaele viyovo, nambe vakapwe valozi, 11#VaLe 19:31 nambe vakakulaele mikalo, nambe vakapwe vaka-kwendeka na minzinzime ya vatsi. 12Woshe uje akalinga vyuma evi akapwa wa vunyengwe kuli Shukulu Kalunga, omwo a vyuma evi vya vunyengwe akeo Shukulu Kalunga Njambi yeni alinakushekela miyati ije kuvatundisa mu lifuti omo yeni mulinakuya kulutwe. 13#Mat 5:48 Mukapwe vakulumbunuka ku mesho a Shukulu Kalunga Njambi yeni.”
Cikulaeso cakutuma muka-kwimanena
14Asinoni Mosesa wendekele ngwendi, “Mu lifuti lije muli kuyehi nakulishwana, vanu vamwo vakakavangeya vaka-kutaa vingombo vya litokwela na vaka-kukulaela viyovo. Oloni Shukulu Kalunga Njambi yeni kakashaka yeni mukalinge evi. 15#Vil 3:22; 7:37 Shukulu Kalunga Njambi yeni akamitumina muka-kwimanena ngwe yange wakutunda akati keni vavenya, co mukamwononoka.
16“A litangwa lije mwakungulukilile ku Munkinda wa Sinai, yeni mwanjilombele ngweni, ‘Kesi tuzive lalo lijwi lya Shukulu Kalunga Njambi yetu endeka, nambe kumona tuhya twa vumpau vwa ku mesho endi embwe, kutewa tutsa.’ 17Ngecivene, Shukulu Kalunga wendekele kuli yange ngwendi, ‘Omu muvanendeka munapu mwamuvwa. 18Njikavatumina muka-kwimanena wakufwa ngwe yove wakutunda akati kavo vene. Co njikamuleka evi akendeka, co ikeye akaleka vanu vyuma vyoshe vinjikamushika. 19#Vil 3:23 Cooni woshe uje akavyana kutolilila ku majwi ange, aje akendeka mu lizina lyange, co yange vavenya njikamuhisa omwo navyana kwononoka muka-kwimanena wange. 20Oloni nga muka-kwimanena uje akomukwa nakwendeka lijwi limo mu lizina lyange lije kunjamushikile kulyendeka, nambe akendeka mu lizina lya vinjambi veka, co muka-kwimanena uje akatse vene.’
21“Co nga mukalyendekesa mu vimbunge vyeni ngweni, ‘Akajo tukazivukila lijwi lije lyendeka muka-kwimanena ngwetu linatundu kuli Shukulu Kalunga?’ 22Omo muka-kwimanena endeka mu lizina lya Shukulu Kalunga, nga cije cuma alinakwendeka kuvacilingile nambe kucasholokele, co cuma cije kesi Shukulu Kalunga nacendeka. Co uje muka-kwimanena nendeka nakwamuka, kesi mukamuzivile lyova embwe.
Currently Selected:
Kwituluka mu Mashiko 18: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
