Kolose 1
1
1Mukanda wakutunda kuli yange Paulu, uje ku cizango ca Njambi napu muluwa wa Yesu Kilistu, unatundu lalo kuli ndolome yetu Timateo.
2Kuli vanu va Njambi mu Kolose, vaje vanapu vasamba vetu va kulongwa muli Kilistu, Njambi Tatetu amyane kutetela na kwoloka.
Lilombelo lyakukandelela
3Simbu yoshe tukakandelela kuli Njambi, Ishe ya Mwene yetu Yesu Kilistu, omo tukamilombelela. 4Omwo twazivi kukulaela kweni muli Kilistu Yesu, na cizemo ceni kuli vanu va Njambi voshe. 5Omwo lijwi lya vushunga, likelyo Vin̄anda Vyavivwa, lyezile kuli yeni akulivanga, mwazivile a cinyangavili cije lyanene. Ngecivene, kukulaela kweni na cizemo ceni vili a vije munakengelela, vije vanamitulikila mwilu. 6Muzimbu ulinakutwalao kunena vivezikiso, co ulinakushandokela mu kaye koshe, ngwe lalo muwalingile akati keni tunde a litangwa lije omo akulivanga mwazivile a kutetela kwa Njambi, co mwauzivukile ngwe muunapu vene. 7#Kol 4:12; Filim 23 Mwalilongesele vya kutetela kwa Njambi kuli Epafalase, ngamba mukwetu itwazema, uje napu muka-kupanga wa kulongwa wa Kilistu ku mutambela wetu.#1:7 KU MUTAMBELA WETU: Kunungulula kumo ngwavo, ku mutambela weni. 8Natuleka vya cizemo cije canamyana Munzinzime.
9Omwo a cuma eci, simbu yoshe tukamilombelela, tunde aje twazivile vya ali yeni. Tulomba Njambi ngeci amishulise na mana a cizango cendi, na mana oshe nakuzivisisa kwoshe kuje kwanamyana Munzinzime wendi. 10Asinoni mukasa kuyoya ngwe ku cizango ca Mwene, co simbu yoshe mukasa kulinga vije vimuvwaelelesa. Kuyoya kweni kukaima vushuka vwavungi manene vwa miyati yoshe ya vipangi vyavivwa, co mukakola mu mana eni akuzivuka Njambi. 11Mupwe vaka-kukola na nzili yoshe yakutunda ku vumpau vwa nzili yendi, ngeci mukase kukakateya mu vyuma vyoshe na kusimpa. 12Co nakujolela kandeleleni kuli#1:12 NA KUSIMPA....CO NAKUJOLELA KANDELELENI KULI TATE: Nambe, na kusimpa nakujolela. Co kandeleleni kuli Tate. Tate uje namilingisa ngeci mupwemo mu kukala na mutambela kuli vije Njambi natulikila vanu vendi mu vumwene vwa ceke. 13Natwamena ku nzili ya lisusulungu nakutunena mu vumwene vwa Munendi uje yazema, 14#Efe 1:7 muli ikeye vanatupatula, kukekwo, kusambesa kwa vivi vyetu.
Vunu na vipangi vya Kilistu
15Kilistu ikeye napu cifwa ca Njambi uje kutwasa kumona. Ikeye Mwana wa ntwatwa, mutwe wa vyuma vyoshe vyakutanga. 16Omwo muli ikeye Njambi watangele vyuma vyoshe vya mwilu nevi vya asi, vyuma vije twasa kumona na vije kutwasa kumona, kwakao na vushwana vwa minzinzime ya ano asi na vashukulu na vaka-kushwana na vaka-moko yakushwana. Njambi watangele vyuma vyoshe muli ikeye na omwo ikeye. 17Kilistu wakeleko te vyuma vyoshe vyai, co akukala muli ikeye vyuma vyoshe vili na mutambela wavyo wauvwa. 18#Efe 1:22-23 Ikeye napu mutwe wa muvila wendi, ukewo cikungulukilo, na nsina ya mwonyo wa muvila. Napu Mwana wa ntwatwa, uje wasangukile kutunda ku vatsi, ngeci ikeye lika napande kupwa wakulivanga mu vyuma vyoshe. 19Omwo vwapwile vutumbe vwa Njambi ngeci muli Mwana mukale cifwa coshe ca Njambi. 20#Efe 2:16 Ngecivene, ali Mwana, Njambi wayongwele kwilwisila kaye koshe kuli ikeye vavenya. Njambi wanenele kwoloka a maninga a Munendi#1:20 MANINGA A MUNENDI: Nambe, N̄ombelo ya kutsa kwa Munendi. a cilindakano, co waambesele vyuma vyoshe kuli ikeye vavenya, vije vili asi na vije vili mwilu.
21A simbu imo yeni mwakele kulyala na Njambi, co mwapwile vitozi vendi omwo vyuma vyavivi vije mwalingile nakuyongola. 22Oloni ololo, a kutsa kwa Munendi, Njambi namipwisa mu vasamba vendi, ngeci aminene ku mesho endi kupwa vanu vakujela nakulambasa nakujeneka mulonga. 23Ngecivene, munapande kutwalao mukukulaela nakwimana mbe a luvula lwaluvwa, co kesi mutave ngeci vamishwenyese kutunda ku cinyangavili cije mwatambwile omo mwazivile muzimbu. Omwo a muzimbu ou ngeci yange Paulu, njapwile ngamba, muzimbu ou valinakwambulwila kuli munu na munu mu kaye mwoshe.
Vipangi vya Paulu akupwa ngamba wa cikungulukilo
24Co ololo yange njilinakujolela a tuyando twange omwo yeni, omwo a tuyando twa muvila uno njase kumanesa tuyando twa Kilistu tuje tunasalako twa muvila wendi, ukewo cikungulukilo. 25Co Njambi nanjipwisa ngamba ya cikungulukilo, uje wanjanene cipangi eci omwo yeni. Eci cipangi capwa cakwambulula lijwi lyendi, 26cije capwile cisin̄iko cakushweka ku myaka ya kunima kushwekela vanu voshe, oloni ololo nacisholola kuli vanu vendi. 27Vutumbe vwa Njambi vunapu kusholola cisin̄iko eci kuli vanu vendi. Cisin̄iko cije cinapu vufuko na vumpau canavwaesela vanu voshe. Co cisin̄iko cikeco eci, Kilistu ali muli yeni, kulumbunuka ngeci yeni mukalipangele vumpau vwa Njambi. 28Ngecivene, tulinakwambulula Kilistu kuli vanu voshe. Na mana oshe tulinakuvanangula nakuvalongesa ngeci tunene umo na umo ku mesho a Njambi ngwe vanu vanakolo muli Kilistu. 29Akupanga evi njiwundangana nakulwa nakupangesa nzili yoshe ije yalinakunjana Kilistu, co ilinakupanga muli yange.
Currently Selected:
Kolose 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006