Vilinga vya Miluwa 28

Mu Melita

1Co omo twetele ku nunda kujeneka vushonde, twawanene ngeci lin̄anda lije valitumbwile ngwavo Melita. 2Vandambo vakele kuje vakele na ngozi netu. Nyonzi yashangumukile kunyoka, co kwakele lisika, ngecivene, vatuvwekelele tuhya nakututambula mwamuvwa tuvavoshe. 3Paulu wakungulwile mukuta wa vitale, co omo wavyakele a liko linyoka akuziva ntwima watuukile a mukuta wa vitale wamushumine nakujenjela ku livoko lyendi. 4Omo vaje vandambo vamwene uje linyoka alinakujenjela ku livoko lya Paulu, co valyendekesele umo na mukwavo ngwavo, “Ou munalume wapwa muka-kutsiya, nameme novoka ku mema a kalunga, oloni vushunga kuvumutava ngeci ayoye.” 5Oloni Paulu wamyangwilile uje linyoka mu tuhya kujeneka kuvulumuka. 6Vamukengelele vamone azimba vwasi-vwasi nambe kuwila asi na kutsa. Oloni omo vavandamenene simbu yakama kujeneka kumona cuma cimo cacikalu cilingiwa kuli ikeye, co vatengulwile viyongola vyavo, co vendekele ngwavo, “Napu njambi!”

7Kuyehi na mutambela uje kwakele mahya a Pambilyase, mwene walije lin̄anda. Watutambwile mwamuvwa, co twapwile tu vangenzi vendi matangwa atatu. 8Ishe ya Pambilyase wakele a vulili nakuvinja mushongo wa lisika-sika nakutuuka maninga. Co Paulu wakovelele ku mulili wendi, walombelele, co wakambekele mavoko endi ali ikeye nakumukangwisa. 9Co omo eci calingiwile, voshe vaka-kuvinja vamuje mu lin̄anda vezile, co vakangukile. 10Vatwanene vwana vwavungi, co omo twasunwine vwato, vaakele mu vwato vyoshe vije twashakele a vungenzi vwetu.

Kutunda ku Melita kuya ku Loma

11Omo kwetile vingonde vitatu twakovelele mu vwato vwatundile ku Alekizandiliya, vuje vatumbwile ngwavo, “Vinjambi va Vana Vampasa,” vuje vwakele cisika coshe muje mu lin̄anda. 12Twetele mu nganda ya Silakuse, twakele kuje matangwa atatu. 13Co twatundile kuje nakweta mu nganda ya Lengiyame. Co alikaki lalo lihunzi lyashangumukile kuhuwa kutunda mu mbwela, co mu matangwa avali twetele mu nganda ya Puteoli. 14Twawanene vaka-kukulaela vamo kuje vaje vatulombele kukala navo simano imo. Ngecivene, twetele ku Loma. 15Co vaka-kukulaela va mu Loma omo vazivile ngwavo tunete vezile kutunda ku vinganda vyakulyala vya Vulandeselo vwa Apiyase na Vinjuvo Vitatu vya Vangenzi mukuliwana netu. Omo Paulu wavamwene, co wakandelelele kuli Njambi nakulitakamesa.

Mu Loma

16Co omo twetele mu Loma, Paulu vamutavesele kukala mwendi lika amo na lishwalale muka-kumunyunga.

17Omo kwetile matangwa atatu Paulu wasanene vantwama va vaYunda ngeci vakungulukile amo. Co omo vakungulukile, wendekele kuli vakevo ngwendi, “Vakwetu vaIsalele, yange kunjaviisile cuma cimo kuli vakwetu nambe ku vilika vije twatambwile kuli vakukulwila vetu, oloni vanjipwisile cinzinda mu Yelusalema nakunjana ku mavoko a vaLoma. 18Omo vanjihwile, vaLoma vashakele kunjecela, omwo kuvawanene cuma cimo cinjalingile cije cinjapandele kutsila. 19#Vil 25:11 Oloni omo vaYunda vavyanene eci, co canjilingisile ngeci njitwale n̄anda yange kuli Nguvulu, nameme yange kunjawanenene vanu vange mulonga. 20Omwo a cuma eci cikeco njamisanena ngeci njimimone nakwendeka neni. Yange njili mu malyenge awa omwo lizina lyou muje muvanaaka cinyangavili vanu va Isalele.”

21Co vendekele kuli ikeye ngwavo, “Kutwatambwile mikanda yakutunda ku Yundeya ya ali yove yai, nambe kuno kukwezile umo wa vandolome vetu kutunda kuje na muzimbu umo, nambe kwendeka cuma cimo cacivi ali yove wai. 22Oloni tushaka kuziva viyongola vyove, omwo tuzivuka ngwetu kwoshe-ikwoshe vanu valinakwendeka nakulwisa mbunga eyi muje muuli.” 23Ngecivene, vemikile litangwa lyakuliwana na Paulu, co a litangwa lije mbunga yakama vezile kuje kwakele Paulu. Kutunda ku mutondo kweta ku cingwezi wavalumbunwinine muzimbu wendi wa Vumwene vwa Njambi, co wesekele kuvalumbunwina vukaleo vwa Yesu akuvaleka majwi a mu Lishiko lya Mosesa na majwi a mu visoneka vya vaka-kwimanena. 24Co vamo vatavele majwi endi, oloni veka kuvakulaelele. 25Ngecivene, vaile, oku valikanangana akati kavo, omwo Paulu nendeka navo cuma cimo eci ngwendi, “Munzinzime Wakujela wendekele vushunga kuli vakukulwila veni ali Isaya muka-kwimanena! 26#Isa 6:9-10 Omwo wendekele ngwendi,

‘Ya ukendeke kuli vanu ava ngwove,

kutolilila mukatolilila, oloni kumukazivisisa,

kumona mukamona, oloni kumukamonesesa.

27Omwo mana a vanu ava anapu akuzeya,

vanaziki matwi avo,

co vanalalameka mesho avo.

Kutewa mesho avo amona,

na matwi avo aziva, co mana avo akashokoloka,

co vakatengulukila kuli yange, mwalinakwendeka Njambi,

co njikavakangwisa.’ ”

28Co Paulu wamanesele kwendeka ngwendi, “Munapande kuzivuka ngweni, muzimbu wa Njambi wakwovola vanautumu kuli vaje kesi vaYunda. Vakautolilila!” 29Omo Paulu wamanesele kwendeka majwi awa, vaYunda vamusezele, co valingile vimata vyakama akati kavo vavenya.#28:29 OMO PAULU WAMANESELE...AKATI KAVO VAVENYA: Kunungulula kumo vesi 29 yaimo.

30Co Paulu wakele kuje myaka ivali mu njuvo yakulifwetela ikeye vavenya, co watambwile voshe vaje vezile kuli ikeye nakumumona. 31Wambulwile vya Vumwene vwa Njambi nakulongesa vya Mwene Yesu Kilistu, co wendekele nakusimpa kwoshe na mbunge yakupatuka.

Currently Selected:

Vilinga vya Miluwa 28: MBB

Highlight

Copy