Loma Cizivukiso
Cizivukiso
Mukanda wa Paulu kuli vaka-Loma Paulu wausonekele mukulitumbula ikeye vavenya na majwi endi ku cikungulukilo ca ku Loma. Ikeye kanda akaleko ku nganda eyi yakama, nameme wazivukile mazina a vaka-Yesu vavangi vaje vakele kuje nakuyongola kukalimona navo (15:22–16:21). Paulu avaleka ngwendi ikeye wapwa muluwa, vamwangwile ambulule Vin̄anda Vyavivwa (1:1). Co majwi akambulula “anapu ngila ya nzili ya Njambi yakwamena vanu voshe vaje vakulaela, nambe vaYunda nambe vaje kesi vaYunda (1:16).”
Paulu anukisa vaka-kulava vendi ngwendi, “Tuvavoshe tunalingi vuvi, co tuli kulyala na vumpau vwa Njambi” (3:23). Co vati vatutambula kuli Njambi? Eci cikeco cihula cakumbulula Paulu mu mukanda ou. Ashangumuka nakumwesa mwanonwena munu woshe kulinga vije vyashaka Njambi. VaYunda kuvononokele Lishiko lya Mosesa, co vaje kesi vaYunda vanavyana kuyongola ali Njambi, nambe Njambi nendeka kuli vakevo mu vingila vyavingi vyakuliseza-seza (1:18–3:20).
Ololo tumona Njambi mwanatutambwilamo. Atambula lika vanu omwo vanakulaela kuli Yesu Kilistu. Njambi atulinga mwamuvwa ngwe mucinapande, omwo ali Yesu Kilistu atutambula mwamuvwa nakutusambesa ku vuvi vwetu. Njambi waanene Yesu ngeci atsile vuvi vwetu, co wamusangwile ku vatsi ngeci Njambi atutambule.
Kulumbununa vyuma vili mu mukanda
Paulu na Muzimbu wendi wa Vin̄anda Vyavivwa 1:1-17
Munu woshe nalingi vuvi 1:18–3:20
Ngila ya Njambi yakutambula vanu 3:21–4:25
Mwonyo wauha wa vanu va Njambi 5:1–8:39
Vati ali vanu va Isalele? 9:1–11:36
Mwakuyoyela mwonyo wauha mu cizemo 12:1–15:13
Matumbe a Paulu na viindu vyendi ikeye vavenya 15:14–16:27
Currently Selected:
Loma Cizivukiso: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006