Vilinga vya Miluwa 27

Paulu aya ku Loma

1Co omo vaciyongwele ngwavo tunapande kuya mu vwato ku Itali, vaanene Paulu na vamo vinzinda ku mavoko a Njulyasi mukulunu wa mbunga ya mashwalale va vaLoma ije vatumbwile ngwavo “Mashwalale va Nguvulu.” 2Co twakovelele mu vwato kutunda ku Andalamitiyame, vuje vavwaeselele cimweja kuya ku vikuma vya mu lifuti lya Asiya, co vasunwine vwato twaile. Co Alisitakase, kaMasendoniya watundile ku Tesalonika, wakele amo netu. 3Alikaki twetele ku Sindone. Co Njulyasi wakele na ngozi na Paulu, co wamutavele ngeci akamone vasamba vendi, ngeci vakamukwase vije vyajenekele. 4Co twatundile kuje, co omwo lihunzi lyahuwile manene nakutuvindika, co twasunwine vwato nakwita kumukulo wa lin̄anda lya Sepulasi kuje lihunzi kulyakele nakuhuwa manene. 5Co twajavukile musambwa ya lishali kuseza Silisha na mu Pamefiliya, co twetele ku Maila mu Lisiya. 6Co kuje uje mukulunu wawanene vwato vwatundile kuli Alekizandiliya vwakelenakuya ku Itali, co watukoveleselemo.

7Twendele matangwa amangi kamandondo-kamandondo nakukaluwa kwakama manene, co akukotoka twetele kuyehi na nganda ya Sinindase. Co lihunzi lyatuvindikile kuya kulutwe, twasunwine vwato nakushwangesa lin̄anda lya Kelete kuje lihunzi kulyakele nakuhuwa manene nakushungama Cikuma ca Salemone. 8Twashwenyele kuyehi na cikuma, co nakukaluwa kwakama manene twetele ku mutambela uje vatumbwile ngwavo Vikuma Vyakwonwa Vushonde, kesi kulyala na nganda ya Laseya.

9Twakele kuje simbu yakama manene, noo kwakele vushonde mu vungenzi vwetu, omwo a simbu ino Litangwa lya Kulyamba#27:9 LITANGWA LYA KULYAMBA: Ciwano ca Litangwa lya Kulyamba valisambeleco akuhwa kwa ngonde ya Kapepo nambe akushangumuka kwa ngonde ya Lipepo a simbu ije omo kwakele vushonde kwenda na vwato. lineti laja. Ngwe mwavanangwile Paulu ngwendi, 10“Eni vanalume, njamono ngwange vungenzi vwetu kutunda ano nakuya kulutwe vuli na vushonde, vivala vya mu vwato vikaviya na vwato vukaviya, co lalo myonyo ikanyonga.” 11Oloni uje mukulunu wa mashwalale watavele vije vyendekele uje ntwama muka-kwendesa vwato na vavenya vwato, kesi vije vyendekele Paulu embwe. 12Co cije cikuma kucapwile cacivwa kukalamo simbu ya cisika, ngecivene, vanalume vavangi vakele na cizango cakusununa vwato nakweseka kweta ku Fonikisi, nga citava, ngeci tukakaleko a simbu ya cisika. Fonikisi capwile cikuma ca mu Kelete cije cakenga mu mbwela ya mu kangombe ka yambi na mu kunto ya mu ngangela.

Lihunzi lyakama a mema a kalunga

13Co lihunzi lyalindondo lyatundile mu mbwela lyashangumukile kuhuwa, co vaje vanalume vayongwele ngwavo vasa kutwalao na vutumbe vwavo, ngecivene, vakokele n̄ove ya vwato nakujavuka kwita kuyehi na cikuma ca Kelete. 14Oloni vwasi-vwasi lihunzi lyakama lije vatumbwile ngwavo, “Lihunzi lya mu Mbwela ya Ngangela” lyahuwile kutunda ku nunda ya lin̄anda. 15Co lihunzi lyapupile ku vwato, co omo capwile cacikalu manene kukengesa ntongo ya vwato kuvwizililo vwa lihunzi, ngecivene, twonwele, co twecelele vwato ngeci lihunzi livupekumune. 16Co lihunzi lyahuwile kamandondo omo twetele ku mbwela ya lin̄anda lyalindondo lije vatumbwile ngwavo Kaunda. Co kuje, na vukalu vumo twasele kukuta kavwato kakandondo ka ku vwato vwakama ngeci kakale mwamuvwa. 17Vakokelele kavwato kakandondo a nunda, asinoni vakutile vwato vwakama na mikole nakuvushetula manene. Vakele na lyova ngwavo amo vwato vukakateya a mutumbo wa lishen̄avu lya amasima a mema a kalunga kuyehi na cikuma ca Limbiya, ngecivene, vavungile vije vinanga vyendesele vwato na lihunzi nakwecelela vwato ngeci vupekumuke lika na lihunzi. 18Lihunzi lyakama manene lyakele nakuhuwa, ngecivene, alikaki vashangumukile kumbangela mu ndonga vivala vimo vije vyakele mu vwato, 19co a litangwa lyamucitatu vombilile mu ndonga vyuma vimo vije vyakulikwasesa ku vwato. 20Co matangwa amangi kutwasele kumona litangwa nambe vingongonosi, co lihunzi lyakele nakuhuwa manene. Co akukotoka kutwakele na cinyangavili cakwovoka.

21Omo vaje vanalume vakele simbu yakama kujeneka kulya, Paulu wemanene ku mesho avo wendekele ngwendi, “Eni vanalume, nga mwanjitolililile ngwe kutwatundile ku Kelete, nga kukwakele kuviya nakuzimbala kwa vyuma vyoshe evi. 22Oloni ololo njimilomba ngwange, koleseni! Omwo naumo wai weni akazimbalesa mwonyo wendi, oloni kuvanga vwato lika vukevwo vukazimbala. 23Omwo ku vutsiki vunahu, kangelo ka Njambi uje kunjakundama uje lalo njikalemesa nezile kuli yange, 24nakwendeka ngwendi, ‘Kesi uzive lyova, Paulu! Unapande kwimana ku mesho a Nguvulu. Co Njambi nakunyungila voshe ava ulinakujavuka navo mu vwato.’ 25Ngecivene, koleseni eni vanalume! Omwo njinakulaela kuli Njambi ngwange cikasholoka vene ngwe muje njamilekele. 26Oloni mankimba akatutwala ku lin̄anda limo.”

27Omwo vwapwile vutsiki vwamulikumi na awana, co lihunzi lyakama lyakele nakutupekumuna mu Lishali lya Menditelenyani. Akati ka vutsiki vaka-kujavula vayongwele ngwavo amo tulinakweta kuyehi na nunda. 28Ngecivene, vesekele kulova kwa mema, co vawanene ngeci kulova kwapwile mapeka 120, omo kwetile kasimbu kakandondo lalo vesekele kulova kwa mema, co vawanene ngeci kulova kwapwile mapeka makumi atanu na awana. 29Co vakele na lyova ngwavo vwato vukapekumukila ku mamanya, ngecivene, vasoselele vin̄ovo viwana mu mema ku ntongo ya kunima ya vwato, co valombelele ngwavo kukye vwasi. 30Asunoni vaka-kujavula vesekele kutewa kutunda mu vwato, vaakele kavwato kakandondo mu mema kulinga ngwe vaje vaya nakukaka vin̄ovo vimo ku ntongo ya kulutwe lwa vwato. 31Oloni Paulu wendekele kuli uje mukulunu wa mashwalale ngwendi, “Nga ava vaka-kujavula kuvakala mu vwato, kumwasa kwovoka.” 32Ngecivene, mashwalale vavatwile mikole ije yakwatele kavwato kakandondo, co vwapekumukile.

33Omo litangwa kanda likye, Paulu wavalombele voshe valye vyakulya ngwendi, “Munakala nakuvandamena matangwa likumi na awana, co simbu yoshe eyi kumwalile vyakulya. 34Ngecivene, njimilomba ngwange mulye vyakulya, muvishaka ngeci vimyane nzili. Nambe vin̄ambu vya ku mitwe yeni kuvikazimbala.” 35Munima yakwendeka evi, Paulu wanonele likende, wakandelelele kuli Njambi ku mesho avo voshe, walipazwile, co washangumukile kulya. 36Asinoni voshe valitakamesele, co umo na umo wavo walile vyakulya lalo. 37Yetu voshe twakele mu vwato twapwile tuva 276. 38Omo munu woshe nali nakukuta, vombilile tiliku mu mema a kalunga ngeci vwato vwehuke.

Kutavozoka kwa vwato

39Co omo kwakile, vaka-kujavula vamwene oloni kuvazivukile kuje kuvakele, oloni vamwene cinkonde cimo cakele na lishen̄avu, co vayongwele ngwavo nga citava, vanapande vakatutike vwato kuje ku lishen̄avu. 40Ngecivene, vavatwile vin̄ovo nakuviseza vivombele mu mema, co a simbu ije vene vazitwile mikole ije yakele ku vilapo vije vyendesele vwato. Asinoni vajundwile vinanga vije vyendesele vwato na lihunzi vije vyakele kulutwe lwa vwato ngeci lihunzi lipekumwine vwato kulutwe, co twashungamene ku cikuma. 41Oloni vwato vwapupile a mutumbo wa lishen̄avu lya a masima a mema, co vwakakateyeye, co ntongo ya kulutwe yakakateyeye mbe kuyasele kushwenya, a simbu ije vene ntongo ya kunima yashangumukile kutavozoka vimbazuvwila-mbazuvwila na nzili ya mankimba.

42Mashwalale vakele na vutumbe vwakutsiya vinzinda voshe, ngeci kesi kukale umo ajwele nakweta ku nunda, co akatewe. 43Oloni uje mukulunu wa mashwalale washakele kwamena Paulu, ngecivene, wavavindikile kulinga cuma eci. Oloni washikile vaje voshe vasele kujwela valivange kujombokela mu mema ngeci vaye ku nunda, 44co vaje voshe vasaleleo vavakave, valikwatelele ku mavaya nambe ku vyuma vije vyapokozokele ku vwato. Omu mukemwo yetu voshe twetele ku nunda kujeneka vushonde.

Currently Selected:

Vilinga vya Miluwa 27: MBB

Highlight

Copy