Vilinga vya Miluwa 26

Paulu alyamena ku mesho a Angilipa

1Angilipa wendekele kuli Paulu ngwendi, “Ololo uli na simbu yakulyamena yove vavenya.” Co Paulu wolwele livoko lyendi nakulyamena ngwendi,

2“Mwene Angilipa! Njamono ngwange njavezika akulyamena yange vavenya ku litangwa lya lelo ku mesho ove a vyuma vyoshe valinakunjivangela vaYunda, 3omwo unazivuka mwamuvwa futisi na vyendeka vya vaYunda. Ngecivene, njilinakukulomba ngwange unjitolilile nakusimpa.

4“VaYunda voshe vazivuka vati njinayoyo tunde ku vukwenje vwange. Vazivuka kuyoya kwange kwoshe, akulivanga mu lifuti lyange vavenya na mu Yelusalema. 5#Vil 23:6; Fili 3:5 Simbu yoshe vanazivuka, nga vali na cizango cakutava vukaleo ovu, tunde akulivanga njayoyele ngwe umo wa vaka-munga yetu yakulemesa, munga ya vaFaliseo. 6Co ololo njinemana kuno ngeci vanjisompe omwo a cinyangavili njilinaco mu cikulaeso ca Njambi cije calingile kuli vakukulwila vetu, 7cuma cije vene miyati likumi na ivali ya vanu vetu vakengelelele ngeci vacitambule omo valemesa Njambi mutanya na vutsiki. Omwo a cinyangavili eci vene, Yove Shukulu, akeo vaYunda valinakunjivangela! 8Omwo vikajo yeni mulikuno munawana kukaluwa akukulaela ngeci Njambi akasangula vatsi?

9“Nange vene njayongwele ngwange njasa kulinga vyuma vyavingi vyakulwisa lizina lya Yesu wa ku Nazaleta. 10Evi vikevyo njalingile mu Yelusalema. Njatambwile moko yakutunda kuli vakulunu va vaka-kukombelela nakwaka mu kamenga vanu va Njambi vavangi, co omo vavasompelele kutsa, nange lalo njatavele kutsa kwavo. 11#Vil 8:3; 22:4-5 Co visimbu vyavingi njavanyanyamesele mu masinangonge nakweseka kuvasindiya ngeci vavyane kukulaela kwavo. Co njaluvalele manene navo ngeci njaile ku vinganda vyeka nakuvayandesa.

Paulu avaleka kutenguluka kwendi

(Vilinga vya Miluwa 9:1-19; 22:6-16)

12“ Mukemwo a vutumbe ovu vene njakatukile nakuya ku Ndamasiku na moko na lishiko lyakutunda kuli vakulunu va vaka-kukombelela. 13A ngila omo simbu yapwile akati ka mutwe, Yove Mwene, njamwene ceke cakuvyazima manene kutuvakana litangwa catundile mwilu canjizengelekele na vanu vaje njendele navo. 14Co tuvavoshe twawililile asi, co njazive lijwi lyendekele kuli yange mu ciHevelu ngwalyo, ‘Saulu, Saulu! Vika ulinakunjiyandesela? Ulinakulivulumuna yove vavenya omwo ulinakulyamena, ngwe ngombe wakulimisa alyatangela ku citi ca shukulu yendi.’ 15Co njehwile ngwange, ‘Yove iyajo, Mwene?’ Co Mwene wakumbulwile ngwendi, ‘Yange Yesu, uje iwulinakuyandesa. 16Oloni katuka. Njinasholoka kuli yove mukukwimika ngeci upwe u ngamba yange. Unapande kuleka vakweni vije viwunamono ali yange ku litangwa lya lelo na vije vinjikakumwesa kulutwe. 17Njikakwamena kuli vanu va Isalele na kuli vaje kesi vaYunda kuje kunjikakutuma. 18Ukatonesa mesho avo nakuvatundisa ku lisusulungu nakuvatwala ku ceke nakuvatundisa ku nzili ya Satana nakuvatwala kuli Njambi, ngeci akukulaela kwavo kuli yange vakavasambese ku vivi vyavo nakutambula mwela wavo akati ka vanu vaje vanaangula Njambi.’

Paulu avaleka vipangi vyendi

19“Ngecivene, Mwene Angilipa, njononokele cimona cije njamwene catundile mwilu. 20#Vil 9:20,28-29 Oloni akulivanga njambulwile mu Ndamasiku, co mu Yelusalema, asinoni na mu lifuti lyoshe lya Isalele na akati ka vaje kesi vaYunda, njambulwile ngeci vanapande kutenguluka ku vivi vyavo nakwiluka kuli Njambi nakulinga vyuma vije vimwesa ngeci vanatenguluka. 21Omwo a cuma eci akeo vanjikwatelele vaYunda mu Njuvo ya Shukulu Kalunga, co vashakele kunjitsiya. 22Oloni na ku litangwa lya lelo Njambi nanjikwasa, ngecivene, njinemana kuno mukwana vukaleo vwange kuli yeni voshe, vakulunu na vanike. Vije vinjendeka vinapu vimo vije vendekele vaka-kwimanena na Mosesa ngeci vikalingiwa, 23#Isa 42:6; 49:6; 1 Koli 15:20 ngwavo Wakuvwavesa napande kuyanda nakupwa umo wakulivanga kusanguka ku vatsi nakwambulula ceke cakwovoka kuli vaYunda na kuli vaje kesi vaYunda.”

24Co omo Paulu wakele nakulyamena mu ngila eyi, Fesitase watambekele kuli ikeye ngwendi, “Ove Paulu unazaluka! Kulilongesa kwove kwakama kulinakukuzalwisa!”

25Oloni Paulu wakumbulwile ngwendi, “Kunjazalukile, Yove Mwene Fesitase! Njilinakwendeka majwi amavwa a vushunga. 26Omwo Mwene uzivukz vyuma vyoshe evi, co njendeka kuli yove nakusimpa. Njazivuka mwa vushunga ngwange unatambula vyuma evi cimo na cimo, omwo vyuma evi kuvyalingiwilile mu vushweke embwe. 27Mwene Angilipa, unakulaela vaka-kwimanena ndi? Njazivuka ngwange unakulaela!”

28Co Angilipa wendekele kuli Paulu ngwendi, “Mu simbu eyi yaindondo lika uyongola ngwove wasa kunjipwisa Muka-Yesu ndi?”

29Co Paulu wakumbulwile ngwendi, “Nambe mu simbu yaindondo nambe mu simbu yakama, lilombelo lyange kuli Njambi linapu ngeci yove neni voshe mulinakunjitolilila litangwa lya lelo mupwe ngwe yange, oloni kesi na malyenge awa embwe!”

30Asinoni mwene, amo na nguvulu na Mbenisi na voshe vaje vakele navo vakatukile, 31co omo vakatukile valyendekesele ngwavo, “Ou munalume kalingile cuma cimo cije canapande kutsila nambe kumwaka mu kamenga.” 32Co Angilipa wendekele kuli Fesitase ngwendi, “Nga ou munalume katwalele n̄anda yendi kuli Nguvulu nga tunamwecela.”

Currently Selected:

Vilinga vya Miluwa 26: MBB

Highlight

Copy