Vilinga vya Miluwa 23

1Paulu wakengele shwii ali ije Munga, co wendekele ngwendi, “Vavushoko vwange vaIsalele! Viyongola vyange vinapu vya vushunga a ngila ije injinayoyo nayo ku mesho a Njambi nakweta ku litangwa lya lelo.” 2Co Ananiyasi Muka-kukombelela Wakama washikile vaje vemanene kuyehi na Paulu ngeci vamupupe ku kanwa. 3#Mat 23:27-28 Asinoni Paulu wendekele kuli ikeye ngwendi, “Mwa vushunga vene Njambi akakupupa, yove civumbe cakukwita mufwitilo wakutoka! Utumbama kuno mukunjisompa ngwe ku Lishiko, oloni yove unapokola Lishiko akushika ngeci vanjipupe!”

4Vaje vanalume vakele kuyehi na Paulu vendekele kuli ikeye ngwavo, “Ulinakushaula Muka-kukombelela Wakama wa Njambi!”

5 # Kut 22:28 Co Paulu wakumbulwile ngwendi, “Vavushoko vwange vaIsalele, kunjazivukile ngwange ou ikeye Muka-kukombelela Wakama. Omwo visoneka vinendeka ngwavyo, ‘Kesi wendeke cuma cacivi ali uje alinakushwana vanu vove.’ ”

6 # Vil 26:5; Fili 3:5 Oloni omo Paulu wamwene ngacije vamo vamuje mu munga vapwile vaSanduki, co vakwavo vapwile vaFaliseo, watambekele ku Munga ngwendi, “Vavushoko vwange vaIsalele! Yange nji kaFaliseo, muna vaFaliseo. Valinakunjisompa kuno omwo a cinyangavili njilinaco ngeci vatsi vakasanguka!”

7Co omo wendekele evi, aje vene vaFaliseo na vaSanduki vashangumukile vimata, co vaka-Munga valipangele. 8#Mat 22:23; Mak 12:18; Luk 20:27 (Omwo vaSanduki vendeka ngwavo vanu kuvakasanguka ku vatsi, co lalo kukwesi tungelo nambe minzinzime, oloni vaFaliseo vakulaela mu vyuma vyoshe evi vitatu.) 9Asinoni vanu vendekele manene, co vamo valongisi va majwi a Lishiko vaje vakele ku munga ya vaFaliseo vemanene nakwendeka na nzili ngwavo, “Kutwawanene cuma cimo cacivi canalingi ou munalume! Amo mwavushunga munzinzime nambe kangelo nendeka kuli ikeye!”

10Co omo vimata vanu valikananganene manene, uje muka-kushika mashwalale wazivile lyova ngwendi amo Paulu vamutavozola. Ngecivene, washikile mashwalale vendi kukovela akati ka mbunga ije ngeci vakatundiseo Paulu nakumutwala ku vinjuvo vyakunyungila.

11Ku vutsiki vuje vene Mwene wemanene kuyehi na Paulu wendekele ngwendi, “Kesi uzive lyova! Unaana vukaleo vwove ali yange muno mu Yelusalema, co unapande kulinga cifwa cimo lalo na mu Loma.”

Vutumbe vwakutsiya Paulu

12Alikaki mutondo vamo vaYunda valikungulwile nakutumba vutumbe. Valisingile cisingo ngeci kuvali vyakulya nambe kunwa kuvanga noo vanatsii Paulu. 13Kwakele vanu vakutuvakana makumi awana vaje vatumbile vutumbe ovu amo. 14Co vaile kuli vakulunu va vaka-kukombelela na kuli vakulunu vendekele ngwavo, “Tunalisingi tuvavoshe ngwetu kutwasa kulya vyakulya nambe kunwa kuvanga noo tunatsii Paulu. 15Ngecivene, ololo ngwetu yeni na vaka-Munga tumeni lijwi kuli muka-kushika mashwalale va vaLoma ngeci atume Paulu kuli yeni, mulikwise ngwe mushaka kuwana vukaleo vwavuvwa ali ikeye. Oloni yetu tulivwaesela cimweja kumutsiya simbu kanda acete kuno.”

16Oloni mwehwa wa Paulu wa munalume wazivile vutumbe ovu, ngecivene, waile ku vinjuvo vyakunyungila, co walekele Paulu. 17Asinoni Paulu wasanene umo wa vaje vamyata wendekele kuli ikeye ngwendi, “Twaleni ou mukwenje kuli muka-kushika mashwalale, alinavimo ashaka kumuleka.” 18Ngecivene, uje mukulunu wamutwalele nakumwetesa kuli uje muka-kushika mashwalale wendekele ngwendi, “Cinzinda Paulu nanjisanene nakunjilomba ngeci njinene ou mukwenje kuli yove, omwo alinavimo vyashaka kukuleka.”

19Muka-kushika mashwalale wamukwatele ku livoko nakumutwala ikeye vavenya, co wamwihwile mu vushweke ngwendi, “Vyuma mukajo ushaka kunjileka?”

20Co wendekele ngwendi, “Vaka-kushwana vaYunda vanalizivasana kukulomba imene ngeci utwale Paulu kuli vaka-Munga, kulikwisa ngeci vaka-Munga vashaka kuwana vukaleo vwavuvwa ali ikeye. 21Oloni kesi uvatolilile, omwo kuvali vanalume vakutuvakana makumi awana vaje vakavanda nakumuvandamena. Vanalisingi ngeci kesi valye vyakulya nambe kunwa kuvanga noo vanamutsii. Vanalivwaesela cimweja kulinga cuma eci, co vanavandamena lika yove ngeci uvatave.”

22Co uje muka-kushika mashwalale wendekele ngwendi, “Kesi ulekeko munu umo ngwove unanjilekako cuma eci.” Co washikile uje mukwenje ngeci aye.

Paulu vamutuma kuli Nguvulu Felikisi

23Asinoni uje muka-kushika mashwalale wasanene vamyata vendi vavali, co wendekele ngwendi, “Ambateni mashwalale vakupwa 200 valivwaesele vaye ku Sesaliya, amo na makumi atanu na avali a vaka-kwendela a tuvalu na mashwalale vakupwa 200 vaka-kulwa na makunga, livwaeseleni kukatuka a ola yamucitanu na viwana vutsiki vuno vene. 24Vwaesa tuvalu vamo ngeci alondeo Paulu, co mweteseni mwamuvwa kuli Nguvulu Felikisi.” 25Co uje muka-kushika mashwalale wasonekele mukanda muje mwakele majwi awa,

26“Kalaundyase Lisiyase, kuli Shukulu, Nguvulu Felikisi. Viindu. 27VaYunda vakwatele ou munalume nakushaka kumutsiya. Omo njazivile ngeci kuma napu mundambo wa mu Loma, ngecivene, njaile na mashwalale vange mukumwamena. 28Co njashakele kuzivuka vika vakele nakumuvangela, ngecivene, njamutwalele kuli vaka-Munga yavo. 29Njawanene ngeci nacimo canalingi cai ngeci atse nambe kumwaka mu kamenga. Vakele nakumuvangela vyuma vije vyakundama ku vihula vya mashiko avo vavenya. 30Co omo vanjilekele ngeci vanamutumbila vutumbe, vwasi-vwasi njayongwele kumutuma kuli yove. Njalekele vaje valinakumuvangela ngeci vamuwanene mulonga ku mesho ove.”

31Ngecivene, mashwalale vakavele mashiko vavaanene. Co ku vutsiki vuje vene vambatele Paulu nakumutwala ku Antipatilise. 32Co alikaki vaje mashwalale velukile ku vinjuvo vyakunyungila nakuseza vaje vaka-kwendela a tuvalu ngeci vaye nendi amo. 33Omo vezile ku Sesaliya, co vaanene uje mukanda kuli nguvulu, co vetesele Paulu kuli ikeye. 34Nguvulu walavele uje mukanda nakwihula Paulu ku lifuti kuje kwatundile. Omo wawanene ngeci Paulu watundile ku Silisha, 35wendekele ngwendi, “Njikaziva vyove omo vaka-kukuvangela vanaija.” Co washikile ngeci Paulu vanapande kumunyungila mu lipela lya nguvulu.

Currently Selected:

Vilinga vya Miluwa 23: MBB

Highlight

Copy