Vilinga vya Miluwa 22

1“Vandolome vange na vatate, njitolilileni omo njilinakulyamena ku mesho eni!” 2Co omo vamuzivile alinakwendeka kuli vakevo mu ciHevelu, co volokele manene kuluu, co Paulu wendekele ngwendi,

3 # Vil 5:34-39 “Yange nji kaYunda, njasemukilile ku Talisi mu Silisha, oloni vanjilelelele muno mu Yelusalema, co njalilongesele kuli Ngamalyele. Njatambwile mwamuvwa vilongesa mu Mashiko a vakukulwila vetu, co njalikundikile kuli Njambi ngwe mumunafu yeni voshe mulikuno litangwa lya lelo. 4Njapakesele noo njatsiile vanu vaje vakavele eyi Ngila ya Mwene. Njakutile vanalume na vanakazi nakuvatwala mu kamenga. 5#Vil 8:3; 26:9-11 Muka-kukombelela Wakama na vaka-Munga voshe vasa kutava ngeci vukaleo ovu njilinakwendeka vunapu vwa vushunga. Njatambwile mikanda kuli vakevo yakusonekela kuli vavushoko vwange vaYunda mu Ndamasiku, ngecivene, njaile kuje mukukwata ava vanu njivanene ku Yelusalema mu malyenge ngeci vavanyanyamese.

Paulu avaleka kutenguluka kwendi

(Vilinga vya Miluwa 9:1-19; 26:12-18)

6“Omo njakele nakuya nakweta kuyehi na Ndamasiku, akati ka litangwa, co vwasi-vwasi ceke cakuvyazima cakutunda mwilu catwile nakunjizengeleka. 7Co njawililile asi, co njazivile lijwi lyendekele kuli yange ngwalyo, ‘Saulu, Saulu! Vika ulinakunjiyandesela?’ 8Co njehwile ngwange, ‘Yove iyajo, Mwene?’ Co wanjikumbulwile ngwendi, ‘Yange Yesu wa ku Nazaleta, uje iwulinakuyandesa.’ 9Vaje vanalume vendele amo nange vamwene ceke, oloni kuvazivile lijwi lya uje wendekele kuli yange. 10Co njehwile ngwange, ‘Mwene vikajo ushaka ngeci njivilinge?’ Co Mwene wendekele kuli yange ngwendi, ‘Katuka uye mu Ndamasiku, co kuje vakakuleka vyuma vyoshe vije vyanakwimikila Njambi ngeci uvilinge.’ 11Co njapwile nji kapuputwa omwo ya cije ceke cakuvyazima, co vaje njendele navo vanjikwatele ku livoko nakunjitwala ku Ndamasiku.

12“Mu nganda muje mwakele munalume umo lizina lyendi Ananiyasi, wa kulongwa muka-kwononoka Lishiko lyetu, co vamusingimikile manene kuli vaYunda voshe vaje vakele mu Ndamasiku. 13Wezile kuli yange, co wemanene kuyehi nange wendekele ngwendi, ‘Ndolome yange Saulu mona lalo!’ A simbu ije vene njamwene lalo nakukenga kuli ikeye. 14Co wendekele ngwendi, ‘Njambi ya vakukulwila vetu nakwangula ngeci uzivuke cizango cendi nakumona Ngamba yendi wa vushunga nakumutolilila omo endeka na lijwi lyendi. 15Omwo ukapwa u mukaleo wendi mukuleka vanu voshe vije viwunamono na vije viwunazivi. 16Co ololo, vikajo uvandamena? Katuka ngeci vakumbwitike, co vivi vyove vavikushe akulombela kuli ikeye.’

Paulu vamusana ngeci ambulule kuli vaje kesi vaYunda

17“Omo njelukile ku Yelusalema, co a simbu ije njakele nakulombela mu Njuvo ya Shukulu Kalunga, njamwene cimona, 18mu cimona cije njamwene Mwene endeka kuli yange ngwendi, ‘Zambula utunde mu Yelusalema vwasi-vwasi, omwo vanu vali muno kuvasa kutambula vukaleo vwove vwa ali yange.’ 19Co njakumbulwile ngwange, ‘Mwene, vakevo vanazivuka mwamuvwa ngwavo njaile ku masinangonge nakukwata nakupupa vaje vakulaelele kuli yove. 20#Vil 7:58 Co omo mukaleo wove Setefano muvamutsiile, nange vene kunjakele, nakutava kutsa kwendi, co njanyungile vikoveyo vya vaje vamutsiile.’ 21Co Mwene wendekele kuli yange ngwendi, ‘Ya, omwo njikakutuma kulyala kuli vaje kesi vaYunda.’ ” 22Vanu vatolililile kuli Paulu noo wendekele evi, oloni vashangumukile kutambeka manene ngwavo, “Kutwamushakele ou munalume! Mutsiyeni! Kapandele kuyoya!” 23Vakele nakutambeka manene nakunikumuna ku vinanga vyavo, nakushawila livu mwilu. 24Co uje muka-kushika mashwalale washikile vanu vendi ngeci vatwale Paulu ku vinjuvo vyakunyungila, co wavalekele ngeci vamupupe nakuwana omwo vikajo vaYunda vakele nakutambeka mukumulwisa. 25Oloni omo vamukutile ngeci vamupupe, Paulu wendekele kuli mukulunu uje wemanene kuje ngwendi, “Kuma linapu lishiko kupupa mundambo wa mu lifuti lya Loma uje kuvasompelo ngeci vawane mulonga wanalingi ndi?”

26Omo uje mukulunu wazivile evi, waile kuli uje muka-kushika mashwalale wamwihwile ngwendi, “Ushaka kulinga vika? Ou munalume napu mundambo wa mu lifuti lya Loma!”

27Ngecivene, uje muka-kushika waile kuli Paulu nakumwihula ngwendi, “Njileke, kuma yove u mundambo wa mu lifuti lya Loma ndi?”

Co Paulu wamukumbulwile ngwendi, “Eyo.”

28Co uje muka-kushika mashwalale wendekele ngwendi, “Yange ovu vundambo vwa mu lifuti lya Loma njavulandele na vimbongo vyavingi manene.”

Oloni Paulu wamukumbulwile ngwendi, “Oloni yange vunapu vwakusemukila.”

29Ngecivene, aje vene vaje vanalume vashakele kwihula Paulu vamujenjukile nakuya, co uje muka-kushika mashwalale wazivile lyova omo wanangukile ngeci kuma Paulu wapwile mundambo wa mu lifuti lya Loma, oloni wamwakele mu malyenge.

Paulu ku mesho a Munga

30Oloni uje muka-kushika mashwalale washakele kuwana mwamuvwa cuma muka vaYunda vakele nakuvangela Paulu, ngecivene, alikaki washikile ngeci vazitule malyenge Paulu, co washikile vakulunu va vaka-kukombelela na vaka- Munga voshe vakunguluke. Asinoni watwalele Paulu nakumwimika ku mesho avo.

Currently Selected:

Vilinga vya Miluwa 22: MBB

Highlight

Copy