Vilinga vya Miluwa 24

VaYunda vavangela Paulu

1Omo kwetile matangwa atanu Ananiyasi Muka-kukombelela Wakama waile ku Sesaliya na vakulunu vamo na lyaako umo lizina lyendi Tetulase. Vasholokele ku mesho a Nguvulu Felikisi nakumuleka mulonga wa Paulu. 2Co vasanene Paulu ngeci akovele mukati, co Tetulase washangumukile kwana mulonga ngwendi,

“Shukulu Felikisi! Kutwamenena kwove kwa mana cinatunenela kwoloka simbu yakama, co vyuma vyavingi vinatenguluka ngeci lifuti lyetu likale mwamuvwa. 3Cuma eci twacitambula kwoshe-ikwoshe a simbu yoshe-iyoshe, co tunakushangala manene. 4Kunjasa kumbila simbu yove, oloni njikulomba mu ngozi yove ngeci utolilile ku majwi etu awa amandondo. 5Omwo twawana ou munalume kupwa muka-muuka, washangumukile kulinga mpindangano akati ka vaYunda mu kaye koshe, co ikeye lalo ntwama ya munga ya vaNazalite. 6Ikeye lalo wesekele kujwalesa Njuvo ya Shukulu Kalunga, oloni twamukwatele.#24:6 IKEYE LALO WESEKELE..., OLONI TWAMUKWATELE: Kunungulula kumo majwi ali mu 6b-8a vanawatundisamo. Twashakele kumusompa ngwe ku Mashiko etu vavenya, 7oloni Lisiyase muka-kushika mashwalale wezile, co na nzili yakama watutambwileye. 8Lisiyase waanene lishiko ngeci vaka-kumwana mulonga vanapande kwija ku mesho ove. Nga wihula ou munalume, yove vavenya wasa kuwana kuli ikeye vyuma vyoshe evi tunamuwanena mulonga.” 9VaYunda voshe valizivasanene a mulonga ou nakwendeka ngwavo vyuma vyoshe evi vyapwile vya vushunga.

Paulu alyamena ku mesho a Felikisi

10Co nguvulu washovweyeye Paulu ngeci endeke, co Paulu wendekele ngwendi,

“Njazivuka ngwange yove unapu u lyaako wa lifuti eli myaka yaingi, co njinavwaelela mukulyamena ku mesho ove. 11Ngwe wasa kuwana yove vavenya kukwetile matangwa akutuvakana likumi na avali omo njaile ku Yelusalema mukulemesa. 12VaYunda kuvanjiwanene njilinakulinga vimata na munu umo mu Njuvo ya Shukulu Kalunga, nambe vakevo kuvanjiwanene njilinakushongangeya vanu, nambe mu masinangonge nambe kwoshe-ikwoshe mu nganda. 13Nambe vase kukwana vukaleo vwa mulonga ou valinakunjana ololo. 14Oloni njitava cuma eci kuli yove ngwange, njikalemesa Njambi ya vakukulwila vetu akukava Ngila ya Mwene ije vakevo vendeka ngwavo inapu ya makuli. Oloni njakulaela mu vyuma vyoshe vije vanasoneka mu Lishiko lya Mosesa na mu mavulu a vaka-kwimanena. 15Njili na cinyangavili muli Njambi ngeci vakevo valinavyo vyuma evi, vikevyo evi, vanu voshe vavavwa na ava vavavi vakasanguka ku vatsi. 16Ngecivene, njilinakulinga na nzili yange yoshe ngeci njikale na citaku-taku cakutungukwa ku mesho a Njambi na ku mesho a vanu.

17 # Vil 21:17-28 “Omo njatundile ku Yelusalema myaka yaingi, njelukileko kutwala vimbongo kuli vanu vange nakukakombelela vin̄ombelo. 18Omo yapwile simbu ije njakele nakulinga eci vanjiwanene mu Njuvo ya Shukulu Kalunga omo njinamanesa kulijelesa. Kunjakele na mbunga ya vanu yai, nambe kulinga muyoyo. 19Oloni vamo vaYunda vatundile ku lifuti lya Asiya vakele kuje, vakevo vanapande kwija ku mesho ove nakunjana mulonga nga valinavimo nange. 20Nambe ava vanalume vali kuno vendeke mulonga uka vanjiwanene nawo omo njemanene ku mesho a Munga, 21#Vil 23:6 kuvanga cuma cimo cije njendekele omo njemanene ku mesho avo ngwange, ‘Mulinakunjisompa ku litangwa lya lelo omwo njinakulaela ngwange vatsi vakasanguka.’ ”

22Asinoni Felikisi uje walilongesele mwamuvwa vin̄anda vya Ngila ya Mwene wemikile kuje kusompa. Wavalekele ngwendi, “Omo Lisiyase muka-kushika mashwalale aija asinoni njikavatula mulonga wove.” 23Asinoni washikile uje mukulunu wanyungile Paulu ngeci anyunge mwamuvwa Paulu, oloni napande kumwanako kupatuka kumo nakutava vasamba vendi ngeci vamukwase.

Paulu ku mesho a Felikisi na Ndulusila

24Omo kwetile matangwa amo Felikisi wezile na munakazi wendi Ndulusila, uje wapwile kaYunda. Co wasanene Paulu nakumutolilila omo wakele nakwendeka akukulaela kuli Yesu Kilistu. 25Oloni omo Paulu wakele nakusimutwiya a vuvwa na akulinyunga na akwija kwa Litangwa Lyakusompa, Felikisi wazivile lyova wendekele ngwendi, “Ololo wasa kuya. Njikusana lalo omo njiwana simbu.” 26A simbu ije vene wayongwele ngwendi amo Paulu amwanako vimbongo vimo, omwo a viyongola evi, ngecivene, wasanene-sanene Paulu a simbu na simbu nakusimutwiya nendi.

27Oloni omo kwetile myaka ivali, Posiyase Fesitase washwanene mu mwela wa Felikisi kupwa nguvulu. Felikisi washakele kuvwaelelesa vaYunda, co wasezele Paulu mu kamenga.

Currently Selected:

Vilinga vya Miluwa 24: MBB

Highlight

Copy