Vilinga vya Miluwa 21

Paulu aya ku Yelusalema

1Co twavasalesele nakuvaseza. Twajavukile nakushungama musambwa, co twetele ku Kose, co alikaki twetele ku Londese, co kutunda kuje twaile ku Patala. 2Co kuje twawanene vwato vwakuya ku Fonisiya, co twakovelelemo nakujavuka mukuya vungenzi vwetu. 3Omo twetele kuje twasele kumona Sipulase, co twajavukile nakuya ku mbwela ku Silya. Co twetele ku cikuma ca ku Tile, kuje vatundisile vivala mu vwato. 4Co kuje twawanene vaka-kukulaela vamo, co twakele navo simano. Co na nzili ya Munzinzime Wakujela valekele Paulu ngeci kesi aye ku Yelusalema. 5Oloni omo simbu yetu yakukala navo yahwile, twakatukile twaile vungenzi vwetu. Co vakevo voshe, amo na vanakazi vavo na vanike, vatusindikiiye kututuwisa mu nganda nakuya ku kenge ya mema a kalunga kuje tuvavoshe twakatsikamene nakulombela. 6Asinoni twalisalesele navo, twakovelele mu vwato vwetu a simbu ije, co vakevo velukile kwimbo.

7Omo twaile vungenzi vwetu, kutunda ku Tile nakweta ku Putolemaise, kuje twendwisile vaka-kukulaela nakukala navo litangwa limo. 8#Vil 6:5; 8:5 Alikaki twakatukile nakweta ku Sesaliya. Kuje twakakele ku njuvo ya Filipu muka-kwambulula, umo wa vanalume vatanu na vavali vaje vavaangwile mu Yelusalema kupwa vakwasi. 9Co wakele na vana vendi vawana va vanakazi vazike vaje vakele nakwambulula muzimbu wa Njambi. 10#Vil 11:28 Twakele kuje matangwa amo omo Angambase muka-kwimanena watundile ku Yundeya. 11Co ikeye wezile kuli yetu, wanonele mwiva wa Paulu, waukutile ku mendi endi na ku mavoko endi wendekele ngwendi, “Eci cikeco canendeka Munzinzime Wakujela ngwendi, ou vavenya mwiva vakamukuta vaYunda mu Yelusalema mu cifwa eci, co vakamwana ku mavoko a vaje kesi vaYunda.” 12Omo twazivile ngeci, yetu na vanu vaje vakele kuje twalambelelele Paulu ngeci kesi aye ku Yelusalema. 13Oloni wakumbulwile ngwendi, “Vikajo mulinakulinga? Kulila nakupokola mbunge yange? Njinalivwaesela cimweja kesi lika kunjikuta mu Yelusalema embwe, oloni nameme kutsila vene muje omwo a lizina lya Mwene Yesu.”

14Co kutwasele kumusindiiya, twalikelele nakwendeka ngwetu, “Cizango ca Mwene cilingiwe.”

15Omo twakele kasimbu kuje, co twalongekeyeye vivala vyetu nakuya ku Yelusalema. 16Co vamo vandongisi vatundile ku Sesaliya navo lalo vaile amo netu, co vatutwalele ku njuvo ya uje munalume itwakatukilile, Manasone watundile ku Sipulase, uje wapwile muka-kukulaela tunde ku matangwa a kunima.

Paulu akameneka Yakomba

17Omo twetele mu Yelusalema, vaka-kukulaela vatutambwile nakujolela. 18Alikaki Paulu waile netu nakumona Yakomba, co na vakulunu voshe vakeleko. 19Omo Paulu wavendwisile nakuvaleka vukaleo vwa vyuma vyoshe vije vyalingile Njambi akati ka vaje kesi vaYunda a vipangi vyendi. 20Co omo vazivile evi, voshe vashangazalele Njambi. Co vendekele ngwavo, “Ndolome yetu Paulu, wasa kumona vaYunda vavangi-vangi vanapu vaka-kukulaela ololo, co vakevo lalo vanalikutiiya ku Lishiko. 21Vanavaleka ngwavo unakala nakulongesa vaYunda vaje vali mu mafuti a vaje kesi vaYunda kuvyana Lishiko lya Mosesa, kuvaleka ngeci kesi vatuule vana vavo nambe kukava vilika vya vaYunda. 22Vakaziva ngwavo unete laja muno. Vika tunapande kulinga? 23Eci cikeco tushaka ngwetu ucilinge. Kuli vanalume vawana kuno vaje vanalisingi. 24#Kul 6:13-21 Ya amo navo ukalikumbasane navo mu cilika cakulijelesa, co fweta ndando yavo, ngecivene, vakateule ku mitwe yavo. Mu ngila eyi vene munu woshe akazivuka ngeci vyoshe vije vanakala nakwendeka ali yove kesi vya vushunga, oloni yove kuma ulinakuyoya mukwononoka Lishiko lya Mosesa. 25#Vil 15:29 Oloni ali vaje kesi vaYunda vanapu vaka-kukulaela, tunavatumina laja mukanda wakuvaleka ngwetu tunayongola ngwetu kuvapandele kulya vyakulya vije vanakombelela ku tumponya, nambe maninga, nambe kasitu wakutikinya, co vanapande kulitenga ku vupangala.”

26Asinoni alikaki Paulu waile na vaje vanalume, co walijelesele navo amo. Asinoni wakovelele mu Njuvo ya Shukulu Kalunga nakwana canukiso cakuhwa kwa matangwa akulijelesa, omo vakakombelela n̄ombelo ali umo na umo wavo.

Paulu vamukwata mu Njuvo ya Shukulu Kalunga

27Oloni omo matangwa aje atanu na avali etele kuyehi nakuhwa, co vamo vaYunda vatundile ku lifuti lya Asiya vamwene Paulu mu Njuvo ya Shukulu Kalunga. Co vashangumwine mbunga nakukwata Paulu. 28Co vatambekele ngwavo, “Eni vanalume va Isalele! Tukwaseniko! Ou ikeye munalume uje akai kwoshe-ikwoshe nakulongesa vanu voshe kulwisa vanu va Isalele na Lishiko lya Mosesa naino Njuvo ya Shukulu Kalunga. Co lalo ololo nanena vamo vaje kesi vaYunda muno mu Njuvo ya Shukulu Kalunga nakujwalesa ou mwela wakujela!” 29#Vil 20:4 (Vendekele majwi awa omwo vamwene Tolofimase uje watundile ku Efeso amo na Paulu mu nganda, co vayongwele ngeci Paulu wamutwalele mu Njuvo ya Shukulu Kalunga.)

30Asinoni citanga cakama cashandokele muje mu nganda mwoshe, co vanu voshe vashatukile amo nakukwata Paulu, vamukokelele anja ya Njuvo ya Shukulu Kalunga. Co vwasi-vwasi vashokele vikolo vya ku Njuvo ya Shukulu Kalunga. 31Ije mbunga vashakele kutsiya Paulu, omo vatumine vukaleo kuli muka-kushika mashwalale va vaLoma ngwavo mu Yelusalema mwoshe muli mpindangano. 32Vwasi-vwasi uje muka-kushika mashwalale wambatele vamyata vamo na mashwalale, co vashatukilile ku mbunga. Omo vanu vamumwene ali na mashwalale, co valikelele kupupa Paulu. 33Asinoni uje muka-kushika mashwalale waile kuli Paulu wamukwatele, co washikile ngeci vamukute na malyenge avali. Asinoni wehwile ngwendi, “Iyajo ou munalume? Co vikajo vyanalingi?” 34Vamo muje mu mbunga vatambekele cuma cimo, vakwavo vatambekele cuma ceka. Co kwakele citanga cakama ngeci uje muka-kushika mashwalale kasele kuwana mwamuvwa cuma mukajo cinalingiwa, ngecivene, washikile vanu vendi kutwala Paulu ku vinjuvo vyakunyungila. 35Co vaile nendi noo vetele ku vindondelo, co mashwalale vamwambatele omwo mbunga ije vakele na muuka manene. 36Mbunga yoshe vezile munima yendi oku vatambeka ngwavo, “Mutsiyeni!”

Paulu alyamena

37Omo mashwalale vashakele kutwala Paulu ku vinjuvo vyakunyungila, co wendekele kuli uje muka-kushika mashwalale ngwendi, “Njasa kwendeka cuma cimo kuli yove ndi?”

Co uje muka-kushika mashwalale wamwihwile ngwendi, “Uzivuka kwendeka ciNgiliki ndi? 38Kuma kesi yove kaIngito uje a simbu ya kunima watengulukilile vumwene nakutwamenena vanalume va nzita vakupwa 4,000 mu mambo ndi?”

39Paulu wakumbulwile ngwendi, “Yange nji kaYunda, njasemukilile ku Talisi mu Silisha, co nji mundambo wa nganda ya vulemu. Mwane njitave ngeci njendeke kuli vanu.”

40Co uje muka-kushika mashwalale wamwanene simbu, co Paulu wemanene a vindondelo wolwele livoko lyendi ngeci vanu voloke kuluu. Omo vanu volokele, co Paulu wendekele kuli vakevo mu ciHevelu ngwendi,

Currently Selected:

Vilinga vya Miluwa 21: MBB

Highlight

Copy