Vilinga vya Miluwa 20

Ku Masendoniya na Akaya

1Omo uje muyoyo wolokele kuluu, Paulu wasanene vaka-kukulaela, co wendekele kuli vakevo majwi akuvasimpisa nakuvaselesa. Asinoni wakatukile waile ku Masendoniya. 2Co wetile mu mitambela ije nakutakamesa vanu na majwi amangi. Co waile ku Akaya, 3kuje wakatumbamene vingonde vitatu. Wakele nakulivwaesela ngeci aye ku Silya omo wawanene ngeci vaYunda vamukele munga yakumulwisa, ngecivene, wayongwele kwiluka nakutuvakana mu Masendoniya. 4Co Sopata muna Pihase, uje watundile ku Mbeleya waile amo nendi, na Alisitakase na Sekundase vatundile ku Tesalonika, Ngayase watundile ku Ndembe, Taikikase na Tolofimase, vatundile ku lifuti lya Asiya, na Timateo. 5Valivangele kuya kulutwe, co vakatuvandamenene mu Tolowase. 6Omo Ciwano ca Makende Akujeneka Musima cineti twajavukile kutunda ku Filipu, co munima ya matangwa atanu twaliwanene navo mu Tolowase kuje twakele simano yoshe.

Vungenzi vwa Paulu vwakumanesela ku Tolowase

7A litangwa lya Sapalalo#20:7 LITANGWA LYA SAPALALO: Nambe, Litangwa lya Calumingo. cingwezi twalikungulwile amo nakulya. Paulu wendekele kuli vanu, co watwaleleo manene kwendeka noo mukati ka vutsiki, omwo wayongwele kuya alikaki. 8Co mu mulili wa akamwa ya njuvo muje valingilile cikungulukilo mwakele vindeya vyavingi. 9Co mukwenje umo lizina lyendi Yutikase watumbamene mu njanena, omo Paulu wakele nakwendeka, Yutikase wakele nakunenguka, co akukotoka waile mu tulo, co wawililile asi kutunda kuje ku mulili wa akamwa wa njuvo yamucitatu ya vinjuvo vyakulilundakana. Omo vamukakwile te natsi. 10Oloni Paulu washulukile asi washuluvalele ali ikeye nakumuvumbatela. Co wendekele ngwendi, “Kesi mulishoshomwene, omwo acili nakuyoya!” 11Asinoni walondele ku mulili wa akamwa wakapazwile likende walile. Munima yakusimutwiya navo simbu yakama noo a mungulungengu, co waile. 12Co vatwalele uje mukwenje kwimbo alinakuyoya, co eci cavazembelekele manene.

Kutunda ku Tolowase kuya ku Miletase

13Oloni twalivangele kuya ku vwato nakujavuka kuya ku Asose, kuje twaile nakushaka Paulu ngeci akovele mu vwato. Watushikile kulinga evi, omwo waile kuje na ngila ya nunda. 14Omo waliwanene netu mu Asose, twamulondesele mu vwato twaile nendi ku Mitilene. 15Twatundile kuje mu vwato, co alikaki twetele ku Chiyose. Omo kwetile litangwa limo twetele ku Samose, co litangwa lyakwatako twetele ku Miletu. 16Paulu wayongwele kutuvakana ku Efeso ngeci kesi ombile simbu mu lifuti lya Asiya. Wakele mu vwasi vwakweta mu Yelusalema nga citava a litangwa lya Pentekosita.

Majwi a Paulu akushika vakulunu va mu Efeso

17Omo Paulu wakele mu Miletu watumine lijwi ku Efeso lyakusana vakulunu va cikungulukilo ngeci valiwane nendi. 18Omo vezile, wendekele kuli vakevo ngwendi, “Mwazivuka muje munjakele neni simbu yoshe, tunde a litangwa lyakulivanga njetele mu lifuti lya Asiya. 19Nakulilumbilisa kwoshe amo na misozi njapangele vipangi vyange ngwe ngamba ya Mwene mu visimbu vyakukaluwa vije vyezile kuli yange omwo a matumbe a vaYunda akunjilwisa. 20Mwazivuka ngweni kunjalikelele kulinga cuma cimo cije capwile cakumikwasa omo njambulwile nakulongesa mu mbunga na mu vinjuvo vyeni. 21Kuli vaYunda na kuli vaje kesi vaYunda voshe njavanangwile ngeci vatenguluke ku vivi vyavo nakwija kuli Njambi nakukulaela kuli Mwene yetu Yesu. 22Co ololo, mukwononoka kuli Munzinzime Wakujela njilinakuya ku Yelusalema, kunjizivuka vika vikalingiwa kuli yange kuje. 23Njazivuka lika ngwange mu nganda mwoshe Munzinzime Wakujela nanjinangula ngwendi kamenga na vukalu vinanjivandamena. 24#2 Tim 4:7 Oloni njinayongola ngwange mwonyo wange kuwesi na seo kuli yange, njishaka lika kumanesa vipangi vyange nakumanesa vipangi vije vyanjanene Mwene Yesu ngeci njivilinge, vikevyo kwambulula Vin̄anda Vyavivwa vya kutetela kwa Njambi.

25“Co njinendangana akati keni muvavoshe, kwambulula Vumwene vwa Njambi. Co ololo njinazivuka ngwange naumo wai weni akanjimona lalo. 26Ngecivene, njimileka vukaleo ku litangwa lya lelo vene ngwange, nga umo weni azimbala, yange kunjesi na mulonga wai. 27Omwo kunjalikelele kwambulula kuli yeni vutumbe vwoshe vwa Njambi. 28Ngecivene, linyungeni, co lalo nyungeni vutanga vwoshe vuje vwanamyana Munzinzime Wakujela ngeci muvunyunge. Pweni tunyungi va cikungulukilo ca Njambi, cije calilingililile ikeye vavenya a n̄ombelo ya kutsa kwa Munendi. 29Njazivuka ngwange omo njiya, tungunga va vukalu vakaija akati keni, co kuvakatetela vutanga. 30Co simbu ikaija omo vamo vanalume va mu mbunga yeni vakendeka makuli mukuungumuna vaka-kukulaela ngeci vavakave. 31Ngecivene, nyanyameni, co anukeni ngweni mutanya na vutsiki a myaka itatu njalongesele umo na umo weni na misozi yaingi.

32“Co ololo njilinakumikundika kuli Njambi ngeci aminyunge na muzimbu wa kutetela kwendi, uje wasa kumitungisa nakumyana vivezikiso vije vyali navyo Njambi vya vanu vendi voshe. 33Kunjashakele siliva ya munu nambe ngolinde nambe vuzalo. 34Yeni vavenya mwazivuka ngeci njinakala nakupanga na mavoko ange awa mukuwana vije yange na vavusamba vange twashakele. 35Njamimwesa mu vyuma vyoshe ngeci akupanga na nzili manene mu ngila eyi tunapande kukwasa vaka-kuzeya, kwanuka majwi aje Mwene Yesu vavenya wendekele ngwendi, ‘Muli kujolela kwakama manene mukwana kutuvakana mukutambula.’ ”

36Co omo Paulu wamanesele kwendeka, watsikamene a mavuli amo navo walombelele. 37Voshe valilile omo vamuvumbatelele nakumutsemba nakumusalesa. 38Vakele na vusiwa vwakama manene omwo wendekele ngwendi kuvakamumono lalo. Co vamusindikiiye nakumwetesa ku vwato.

Currently Selected:

Vilinga vya Miluwa 20: MBB

Highlight

Copy