Vilinga vya Miluwa 14

Mu Ikoniyame

1Cuma cimolika calingiwile mu Ikoniyame, Paulu na Mbanambase vaile ku sinangonge vakendekele mu ngila ije yanenesele ngeci ije mbunga yakama ya vaYunda na vaje kesi vaYunda vakulaelele. 2Oloni vaYunda vaje vajenekele kukulaela vashongangeyeye vaje kesi vaYunda nakutengulukila vaka-kukulaela. 3Ngecivene, miluwa vakele kuje simbu yakama, vendekele nakusimpa vyuma vya Mwene, uje washolwele ngeci muzimbu wavo wa kutetele wapwile wa vushunga mukuvana nzili yakulinga vizivukiso na vikomokeso. 4Oloni vanu va muje mu nganda valyangunukile, vamo vemanenene vaYunda, vakwavo vemanenene miluwa.

5Asinoni vaje kesi vaYunda na vaYunda vamo amo na vantwama vavo, vayongwele kuyandesa miluwa nakuvasha mamanya. 6Omo miluwa vanangukile eci, co vatewelele ku Lisitala na ku Ndembe vinganda vya mu Likaoniya na ku mitambela yakwatako. 7Co kuje vambulwile Vin̄anda Vyavivwa.

Mu Lisitala na Ndembe

8Mu Lisitala mwakele munalume wakele na vulema vwa mendi tunde akusemuka kwendi kasele kwenda. 9Watumbamene kuje mukutolilila ku majwi a Paulu. Paulu wamwene ngeci nakulaela, co asa kukanguka, ngecivene, wakengele shwii ali ikeye, 10co wendekele kuli ikeye na lijwi lyakama ngwendi, “Katuka wimane lwii na mendi ove!” Co uje munalume wajombokele, co washangumukile kwenda. 11Omo vije vimbunga vamwene vije vyalingile Paulu, co vashangumukile kutambeka mu ndaka yavo vavenya ya Likaoniya ngwavo, “Vinjambi vanaija kuli yetu mu cifwa ca vanu!” 12Valukile Mbanambase lizina ngwavo Zeyase, co lizina lya Paulu ngwavo Helemese, omwo ikeye wapwile ntwama muka-kwendeka. 13Co muka-kukombelela wa njambi Zeyase, uje njuvo yendi yakulemesela yakele anja ya nganda, wanenele vingombe va nkomba na vishani ku cikolo, omwo ikeye na vije vimbunga vashakele kukombelela n̄ombelo kuli miluwa.

14Oloni omo Mbanambase na Paulu vazivile vije vashakele kulinga, vatavozwele vuzalo vwavo nakushatukila mukati ka mbunga nakutambeka ngwavo, 15#Kut 20:11; Mya 146:6 “Omwo vikajo mulinakulinga cuma eci? Netu tunapu tu vanu ngeci mweni! Tulikuno mukwambulula Vin̄anda Vyavivwa, mukumitengulula ku vyuma vyangoco ngeci mwije kuli Njambi wakuyoya, uje watangele lilu na asi na mema a kalunga na vyoshe vilimo. 16Ku myaka ya kunima watavele vanu voshe ngeci vaye mu vingila vyavo vavenya. 17Oloni visimbu vyoshe waanene vukaleo vwakukala kwendi vavenya a vyuma vyavivwa vije vyakalingi, co akamyana nyonzi yakutunda mwilu na vimbuto a simbu yaivwa, akamyana vyakulya nakushulisa vimbunge vyeni nakuvwaelela.” 18Nameme na majwi awa miluwa kuvasele kuvindika mbunga kukombelela n̄ombelo kuli vakevo.

19Oloni vaYunda vamo vatundile ku Antyoke mu Pisindiya na ku Ikoniyame vashongangeyeye vimbunga, co vashele mamanya Paulu nakumukokela anja ya nganda, vayongwele ngwavo natsi. 20Oloni omo vaka-kukulaela vamuzengelekele, wendukile nakwilukila mu nganda. Co alikaki ikeye na Mbanambase vaile ku Ndembe.

Kwiluka ku Antyoke mu Silya

21Omo Paulu na Mbanambase vambulwile Vin̄anda Vyavivwa mu Ndembe, co vapwisile vanu vavangi vaka-kukulaela. Asinoni velukile ku Lisitala na ku Ikoniyame noo vetele ku Antyoke mu Pisindiya. 22Vakolesele vaka-kukulaela nakuvatakamesa ngeci vapwe vaka-vushunga mukukulaela. Vavalongesele ngwavo, “Tunapande kwita mu tuyando twatungi ngeci tukovele mu Vumwene vwa Njambi.” 23Mu cikungulukilo na cikungulukilo vemikilemo vakulunu, co na malombelo nakulikela kulya vavakundikile kuli Mwene uje vakulaelele.

24Omo vetile mu mutambela wa Pisindiya, co vezile ku Pamefiliya. 25Kuje vambululwile lijwi ku Pelenga, co vaile ku Atalya, 26co kutunda kuje vajavukile mu vwato nakwiluka ku Antyoke ku mutambela uje vavakundikile ku kutetela kwa Njambi ku vipangi vije vivamanesele a simbu eyi.

27Omo vetele mu Antyoke vakungulwile amo vanu vaka-cikungulukilo nakuvaleka vyuma vyoshe vije vyalingile Njambi navo na muje Njambi mwashokolwele ngila kuli vaje kesi vaYunda ngeci vakulaele. 28Co vatumbamene kuje simbu yakama amo na vaka-kukulaela.

Currently Selected:

Vilinga vya Miluwa 14: MBB

Highlight

Copy