Vilinga vya Miluwa 15

Kulikungulula kwa ku Yelusalema

1 # VaLe 12:3 Oloni vanalume vamo vatundile ku Yundeya vaile ku Antyoke vashangumukile kulongesa vaka-kukulaela ngwavo, “Kumwasa kwovoka kuvanga mutuuke ngwe ku Lishiko lya Mosesa.” 2Co Paulu na Mbanambase valikananganene manene navo a cuma eci, ngecivene, vayongwele ngeci Paulu na Mbanambase na vamo veka vanu va mu Antyoke vaye ku Yelusalema nakulimona na miluwa na vakulunu a n̄anda eyi.

3Ngecivene, cikungulukilo cavatumine, co omo vetile mu Fonisiya na mu Samaliya, co vambulwile vati vaje kesi vaYunda vatengulukilile kuli Njambi, co muzimbu ou wanenele kuvwaelela kwakama kuli vaka-kukulaela voshe. 4Omo vetele mu Yelusalema, cikungulukilo na miluwa na vakulunu vavatambwile, co vambulwile vyoshe vije vyalingile Njambi ali vakevo. 5Oloni vaka-kukulaela vamo vaje vakundamene ku munga ya vaFaliseo vakatukile, co vendekele ngwavo, “Vaje kesi vaYunda vanapande kutuuka nakuvaleka ngeci vononoke Lishiko lya Mosesa.”

6Miluwa amo na vakulunu vakungulukile amo nakuyongola cihula eci. 7#Vil 10:1-43 Co omo vasimutwiiye simbu yakama Petulu wakatukile nakwendeka ngwendi, “Vakwetu, mwazivuka ngeci simbu yalaja Njambi waangwile yange akati keni nakwambulula Vin̄anda Vyavivwa kuli vaje kesi vaYunda, ngeci vazive nakukulaela. 8#Vil 2:4; 10:44 Co Njambi, uje azivuka viyongola vya munu woshe, washolwele vukaleo vwendi vwa vaje kesi vaYunda akuvana Munzinzime Wakujela, ngwe mwatwanene yetu. 9Co kamwesele kaangu akati ketu na vakevo, oloni wavasambesele ku vivi vyavo omwo vakulaelele. 10Ngecivene, omwo vikajo ololo mushaka kweseka Njambi nakutwika citele a myongo ya vaka-kukulaela cije nameme vakukulwila vetu nameme yetu kutwasa kucambata? 11Embwe! Tukulaela, co twovoka a kutetela kwa Mwene Yesu, ngwe vakevo lalo.”

12Mbunga yoshe volokele kuluu omo vazivile Mbanambase na Paulu vaana vukaleo vwoshe vwa vizivukiso na vikomokeso vije vyalingile Njambi muli vakevo ali vaje kesi vaYunda. 13Omo vamanesele kwendeka, co Yakomba wendekele ngwendi, “Njitolilileni vakwetu! 14Simoni ololo natulumbunwina vati Njambi akulivanga wezile nakusholola cizemo cendi kuli vaje kesi vaYunda mukwangulao vamo akati kavo ngeci vapwe vanu vendi. 15Majwi a vaka-kwimanena analitombola mwamuvwa na vyuma evi. Ngwe muje muvyendeka visoneka ngwavyo,

16‘Shukulu Kalunga alinakwendeka ngwendi,

munima ya vyuma evi njikeluka

nakwilwisa lalo vumwene vwa Ndaviti.

Njikavutungulula nakuvukolesa lalo.

17Ngecivene, vanu voshe vakaija kuli yange,

voshe vaje kesi vaYunda vaje vanjinasana kupwa vange.

18 # Amo 9:11-12 Mukemwo mwalinakwendeka Shukulu Kalunga,

uje washolwele vyuma evi ku san̄ulu.’ ”

19Yakomba wendekele ngwendi, “Mu viyongola vyange ngwange, kutwapandele kupesa vaje kesi vaYunda vaje valinakutengulukila kuli Njambi. 20#Kut 34:15-17; VaLe 17:10-16; 18:6-23 Oloni tunapande kuvasonekela mukanda wakuvaleka ngwetu kesi valye vyakulya vyakujeneka kujela omwo vanavikombelela ku tumponya nakulitenga ku vupangala, co lalo kesi valye kasitu wakutikinya nameme kulya maninga. 21Omwo Lishiko lya Mosesa vanalilava simbu yakama mu masinangonge a Litangwa na Litangwa Lyakuhwima lyoshe, co majwi endi valinakuwambulula mu vinganda vyoshe.”

Mukanda kuli vaka-kukulaela vaje kesi vaYunda

22Asinoni miluwa na vakulunu, amo na cikungulukilo coshe vayongwele kwangula vamo vanalume mu munga yavo ngeci vavatume ku Antyoke amo na Paulu na Mbanambase. Vaangwile vanalume vavali vaje vavasingimikile manene vaka-kukulaela, Yundasa ivasanene Mbalasambasa na Silasi, 23co vavatumine amo na mukanda wakuya kuli vakevo ngwavo,

“Vakwetu, yetu miluwa na vakulunu, tunatumu viindu vyetu kuli yeni voshe vakwetu kesi vaYunda ku cisemwa mulinakukala mu Antyoke na mu Silya na mu Silisha. 24Tunazivi ngwavo vamo vanalume va ku mbunga yetu vanaija nakumipesa nakumitanganesa na vije vanendeka, vakevo kuvatambwile vilongesa vyakutunda kuli yetu embwe. 25Co twalikungulwile nakulizivasana tuvavoshe kwangula vamo tunganda nakuvatuma kuli yeni. Vaija na vasamba vetu vatwazema manene Mbanambase na Paulu, 26vaje vaanene myonyo yavo mukupangela Mwene yetu Yesu Kilistu. 27Tunatumu Yundasa na Silasi vaje vakumileka vyuma vimolika vije vitulinakusoneka. 28Omwo Munzinzime Wakujela amolika netu tunalizivasana ngeci kutwapandele kumitwika citele ceka lalo kuvanga lika mashiko awa ngwetu, 29kesi mulye vyakulya vije vyakukombelela ku tumponya, kesi mulye maninga, kesi mulye kasitu wakutikinya, co litengeni ku vupangala. Mukakala mwamuvwa nga mulinyunga nakujeneka kulinga vyuma evi. Viindu vyeni.”

30Ngecivene, vaje tunganda vavatumine vaile ku Antyoke kuje vakakungulwile mbunga yoshe ya vaka-kukulaela nakuvana uje mukanda. 31Co omo vanu valavele uje mukanda, vavwaelelele manene a muzimbu wakuvatakamesa. 32Co Yundasa na Silasi vaje vapwile vaka-kwimanena, vendekele simbu yakama navo mu kuvasimpisa nakuvatakamesa. 33Co omo vakele kuje simbu imo, vaka-kukulaela vavatumine mu kwoloka, co velukile kuli vaje vavatumine. 34Oloni Silasi wayongwele kukala kuje vene.#15:34 OLONI SILASI WAYONGWELE KUKALA KUJE VENE: Kunungulula kumo vesi 34 yaimo.

35Oloni Paulu na Mbanambase vasalele ku Antyoke, co amolika na vakwavo veka vavangi valongesele nakwambulula lijwi lya Mwene.

Paulu na Mbanambase valyangunuka

36Co a simbu imo Paulu wendekele kuli Mbanambase ngwendi, “Twiluke tukendwise vakwetu mu vinganda vyoshe muje mutwambulwile lijwi lya Mwene tukamone vati muvali nakuyoyela.” 37Mbanambase washakele ngeci vaye amo na Yowano Mako, 38#Vil 13:13 oloni Paulu wayongwele ngeci kuvapandele kuya amo nendi omwo Yowano Mako kakele amo navo na ku shongo ya vungenzi vwavo oloni welukile wavasezele mu Pamefiliya. 39Co valingile vimata vyakama akati kavo, ngecivene, valyangunukile, Mbanambase wambatele Mako vakovelele mu vwato, co vajavukile vaile ku Sepulasi, 40Oloni Paulu waangwile Silasi, co waile nendi, vaka-kukulaela vavakundikile kukunyunga kwa kutetela kwa Njambi. 41Wetile mu Silya na mu Silisha nakutakamesa vikungulukilo.

Currently Selected:

Vilinga vya Miluwa 15: MBB

Highlight

Copy