Vilinga vya Miluwa 13

Mbanambase na Saulu vavaangula nakuvatuma

1Mu cikungulukilo ca ku Antyoke kwakele vamo vaka-kwimanena na valongisi, Mbanambase na Simyoni (uje vatumbwile ngwavo Wakuzivala), na Lusiyasi (uje watundile ku Silene) na Manaene, (uje uvalelelele amo na Nguvulu Helonde),#13:1 HELONDE: Helonde Antipase, uje washwanene mu Ngalileya (kenga Luka 3:1). na Saulu. 2A simbu ije vapangelele Mwene nakulikela kulya, co Munzinzime Wakujela wendekele kuli vakevo ngwendi, “Njaangunwineniko Mbanambase na Saulu vapange vipangi vije njinavasanena.”

3Co vakevo valikelele kulya, co valombelele vavakambekele mavoko nakuvatuma.

Mu Sepulasi

4Ngecivene, omo Munzinzime Wakujela wavatumine, Mbanambase na Saulu vaile ku Seleusiya, co vatundile kuje vajavukile nakuya ku lin̄anda lya ku Sepulasi. 5Omo vetele ku Salamisi vambulwile lijwi lya Njambi mu masinangonge a vaYunda. Co Yowano Mako wakele amo navo mukuvakwasa mu vipangi.

6Vendele mu lin̄anda mwoshe nakweta ku Pafose kuje vakawanene umo muka-manseno lizina lyendi Mbala-Yesu, kaYunda uje walitumbwile vavenya kupwa muka-kwimanena. 7Ikeye wapwile musamba wa nguvulu wa muje mu lin̄anda lizina lyendi Selengiyase Pauluse, uje wapwile munalume wa mana. Nguvulu wasanene Mbanambase na Saulu omwo washakele kuziva lijwi lya Njambi. 8Oloni vavavindikile kuli muka-manseno Elyamase (eli likelyo lizina lyendi lya mu ciNgiliki), uje wesekele kutundisa nguvulu kukukulaela. 9Asinoni Saulu, uje vatumbwile lalo Paulu, washulile na Munzinzime Wakujela wakengele shwii uje muka-manseno, 10co wendekele ngwendi, “Yove muna Liyavola! Yove unapu citozi ca vyuma vyoshe vyavivwa. Muli yove munashulu miyati yoshe ya linyanyamena, co yove simbu yoshe ulinakweseka kutengulula vushunga vwa Mwene kuvupwisa makuli! 11Co livoko lya Mwene likashuluka ali yove ololo vene, co ukapwa kapuputwa kuukasa kumona ceke ca litangwa a simbu imo.”

Aje vene Elyamase wazivile mbundu yakuzivala ifwika ku mesho endi, co wendanganene noku-noku kweseka kuwana umo ngeci amukwate ku livoko nakumutwamenena. 12Omo nguvulu wamwene vije vyalingiwile wakulaelele, omwo walikomokelele manene a vilongesa vya Mwene.

Mu Antyoke mu Pisindiya

13Paulu na vakwavo vajavukile kutunda ku Pafose, co vezile ku Pelenga nganda ya mu Pamefiliya, co Yowano Mako wavasezele welukile ku Yelusalema. 14Oloni vatundile ku Pelenga vetele ku Antyoke mu Pisindiya, co a Litangwa Lyakuhwima vaile ku sinangonge, co vatumbamene. 15Omo valavele Lishiko lya Mosesa na visoneka vya vaka-kwimanena, co vakulunu va sinangonge vatumine lijwi kuli vakevo ngwavo, “Vandolome, tumishaka ngeci mwendeke kuli vanu nga muli na lijwi lyakuvatakamesa.” 16Co Paulu wemanene wavolwesele na livoko lyendi washangumukile kwendeka ngwendi,

“Vavushoko vwange vaIsalele neni kesi vaYunda mulikuno vaka-kulemesa Njambi, njitolilileni! 17#Kut 1:7; 12:51 Njambi ya vanu va Isalele waangwile vakukulwila vetu nakuvapwisa muyati wakama a simbu ije vakele vangenzi mu Ingito. Co Njambi wavatundisile mu Ingito na nzili yendi yakama, 18#Kul 14:34; Kwi 1:31 co wavanyungile mu mambo myaka makumi awana. 19#Kwi 7:1; Yos 14:1 Co wanyongesele miyati itanu na ivali mu lifuti lya Kanana, co wapwisile lifuti lije vushwana vwa vanu vendi. 20#Maa 2:16; 1 Sam 3:20 Co vyuma evi vyoshe vyalingiwile a myaka yakupwa 450.

“Munima yevi wavanene maako noo a simbu ya Samwele muka-kwimanena. 21#1 Sam 8:5; 10:21 Co valombele ngeci vakale na mwene, co Njambi wavanene Saulu muna Kishe wa ku muyati wa Mbenjemani ngeci apwe mwene yavo a myaka makumi awana. 22#1 Sam 13:14; 16:12; Mya 89:20 Co omo wamutundisile, Njambi wapwisile Ndaviti mwene yavo. Eci cikeco cendekele Njambi ali ikeye ngwendi, ‘Njinawana Ndaviti muna Njesi ikeye munalume injazema, uje akalinga vyoshe vije njishaka ngeci avilinge.’ 23Ikeye Yesu wa ku naanga ya Ndaviti uje Njambi wamupwisile Muyoyesi wa vanu va Isalele ngwe mwakulaesele laja. 24#Mak 1:4; Luk 3:3 Simbu kanda Yesu ashangumuke vipangi vyendi, Yowano wambulwile kuli vanu voshe va Isalele ngeci vatenguluke ku vivi vyavo nakuvambwitika. 25#Mat 3:11; Mak 1:7; Luk 3:16; Yow 1:20,27 Co omo Yowano wetele kuyehi nakumanesa vipangi vyendi, wendekele kuli vanu ngwendi, ‘Munjiyongola ngweni yange iya? Yange kesi uje imulinakuvandamena. Oloni tolilileni! Alinakwija munima yange, co yange kunjapandele nameme kutundisa vin̄aku ku myanja yendi.’

26“Vavushoko vwange vaIsalele, vatekulwila va Avilahama, co neni voshe kesi vaYunda mulikuno vaka-kulemesa Njambi, muzimbu ou wakwovoka vanautumu kuli yetu! 27Omwo vanu vaje valinakuyoya mu Yelusalema na vantwama vavo omwo kuvazivukile ngeci ikeye napu Muyoyesi, nambe kuzivisisa majwi a vaka-kwimanena aje avakalava a Litangwa na Litangwa lyoshe Lyakuhwima. Nameme ngoco valingisile majwi a vaka-kwimanena kupwa a vushunga omo vawanenene Yesu mulonga. 28#Mat 27:22-23; Mak 15:13-14; Luk 23:21-23; Yow 19:15 Co nameme kuvawanene vukaleo ngeci vamutwale ku kutsa, oloni valombele Pilato ngeci amutsiye. 29#Mat 27:57-61; Mak 15:42-47; Luk 23:50-56; Yow 19:38-42 Co omo vanalingi vyoshe vije ngwe muvyendeka Visoneka ali ikeye, vamutundisile a cilindakando nakumwaka mu mbumbo. 30Oloni Njambi wamusangwile ku vatsi, 31#Vil 1:3 co a matangwa amangi washolokele kuli vaje wendele navo kutunda ku Ngalileya nakweta ku Yelusalema. Vakevo ololo vanapu vakaleo vendi kuli vanu va Isalele. 32Yetu tuli kuno mukuminenela Vin̄anda Vyavivwa, vije Njambi wakulaesele vakukulwila vetu kuvilinga, 33#Mya 2:7 vikevyo natulingila yetu vatekulwila vavo mukusangwila Yesu ku mwonyo ngwe muvanasoneka mu Mwaso wamucivali ngwavo,

‘Yove unapu u Munange,

litangwa lya lelo njinapu nji Isho.’

34 # Isa 55:3 “Co eci cikeco cendekele Njambi akumusangula ku vatsi ngwendi kakavolela mu mbumbo embwe,

‘Njikakwana vivezikiso vyakujela vya vushunga

vije njakulaesele Ndaviti.’

35 # Mya 16:10 “Ngwe mwanendeka lalo mu visoneka vyeka ngwendi,

‘Kuukatava ngamba yove wa kulongwa kuvolela mu mbumbo embwe.’

36“Omwo Ndaviti wapangele cizango ca Njambi a simbu yendi vavenya, co watsile, co vamutsindile na vakukulwila vendi, co muvila wendi wavolelele mu mbumbo. 37Oloni eci kucalingiwile kuli uje yasangwile Njambi ku vatsi embwe. 38Yeni voshe vavushoko vwange vaIsalele munapande kuzivuka ngeci mwa vushunga muli Yesu mukemwo valinakwambulula kuli yeni muzimbu wakusambesa kwa vivi. 39Co munapande kuzivuka ngeci woshe uje akulaela kuli ikeye napatuka ku vivi vyoshe kuje Lishiko lya Mosesa kulyasele kumipatuka. 40Nyanyameni ngeci vije vivendekele vaka-kwimanena kesi vilingiwe kuli yeni.

41 # Hamba 1:5 ‘Kengeni, yeni vaka- kuyeluwisa! Co likomokeleni na kutsa!

Omwo cuma cije cinjilinga litangwa lya lelo

cinapu cuma cije kumukakulaela, nameme vamilumbunwinaco!’ ”

42Omo Paulu na Mbanambase vatuukile mu sinangonge, co vanu vavashikile lalo kwiluka kuli vakevo a Litangwa Lyakuhwima likwavo nakuvaleka vyuma evi. 43Omo vanu vatundile kuje ku sinangonge, vaYunda vavangi na vaje kesi vaYunda vavangi vaje vapwile va kulongwa ku futisi ya vaYunda vakavele Paulu na Mbanambase. Vaje miluwa vendekele kuli vakevo nakuvatakamesa kukakateya akuyoyela mu kutetela kwa Njambi.

44Co a Litangwa Lyakuhwima likwavo kwasalele lika vavandondo mu nganda munu woshe wezile mukuziva lijwi lya Mwene. 45Omo vaYunda vamwene vimbunga, co vakele na lifuwa, vavyanene vije vyendekele Paulu nakumushaula. 46Oloni Paulu na Mbanambase vendekele nakusimpa ngwavo, “Cinapande ngeci lijwi lya Njambi valyendeke kuli yeni akulivanga. Oloni omwo mwalivyanene, co munaliyongola yeni vavenya ngweni kumwapandele kutambula mwonyo wa myaka yoshe, co tumiseza nakuya kuli vaje kesi vaYunda. 47#Isa 42:6; 49:6 Omwo eli likelyo lishiko lyanatwana Mwene ngwendi,

‘Njinamipwisa ceke kuli vaje kesi vaYunda,

ngeci vaka-kaye voshe vovoke.’ ”

48Omo vaje kesi vaYunda vazivile eci, vavwaelelele nakushangazala lijwi lya Mwene, co vaje vavaangwililile ku mwonyo wa myaka yoshe vakulaelele.

49Co lijwi lya Mwene lyashandokelele kwoshe-ikwoshe mu mutambela uje. 50Oloni vaYunda vashongangeyeye vaka-kutwamenena va mu nganda na vanakazi vakutsimana vaje kesi vaYunda vaje va kulongwa. Co vashangumukile kupakesa Paulu na Mbanambase nakuvasheka mu mutambela wavo. 51#Mat 10:14; Mak 6:11; Luk 9:5; 10:11 Oloni miluwa vatotomwene likungu ku myanja yavo kupwa cihiso ca vanu vamuje mu mutambela, co vaile ku Ikoniyame. 52Co vaka-kukulaela mu Antyoke vashulile nakuvwaelela na mu Munzinzime Wakujela.

Currently Selected:

Vilinga vya Miluwa 13: MBB

Highlight

Copy