Vilinga vya Miluwa 12
12
Mapakeso akwavo lalo
1A simbu eyi vene Mwene Helonde#12:1 MWENE HELONDE: Helonde Angilipa 1 *, uje washwanene mu Palesitina. washangumukile kupakesa mbunga ya mu cikungulukilo. 2Watsiile Yakomba ndolome ya Yowano na moko ya mukwale. 3Co omo wamwene ngeci cuma eci cavwaelelesele vaYunda, co watwaleleo vene wakutile Petulu. (Eci calingiwile a simbu ya Ciwano ca Makende Akujeneka Musima.) 4#Kut 12:1-27 Co omo vakwatele Petulu vamwakele mu kamenga, co vamwanene ku vimunga viwana vya mashwalale mu munga imo na imo mwakele mashwalale vawana kumunyunga. Helonde wayongwele kumusompesa ku mesho a mbunga omo Ciwano ca Pasovala cineti laja. 5Ngecivene, Petulu vamunyungilile mu kamenga, oloni vanu va mu cikungulukilo vamulombelelele manene kuli Njambi.
Petulu vamutundisa mu kamenga
6Vutsiki vuje vene simbu kanda Helonde amutuule nakumutwala kuli vanu, Petulu walalele mukati ka vaka-kumunyunga vavali. Vamukutile mu malyenge avali, co lalo kwakele vaka-kunyunga ku cikolo ca kamenga. 7Co vwasi-vwasi kangelo ka Mwene wemanene kuje, co muje mu mulili mwatwililile ceke. Uje kangelo waningangele Petulu a citsili wendekele ngwendi, “Induka vwasi!” Co aje vene malyenge akele ku mavoko endi awile. 8Asinoni uje kangelo wendekele ngwendi, “Lizitike mwiva wove, co zala vin̄aku vyove.” Co Petulu walingile ngacije, co kangelo wendekele ngwendi, “Zala cikoveyo cove, co njikave.” 9Co Petulu watuukile anja ya kamenga wamukavele, kazivukile ngeci cije calingile kangelo capwile ca vushunga, wayongwele ngwendi ali nakumona cimona. 10Omo vatuvakanene munga ya vaka-kunyunga yakulivanga, naije yamucivali, co akukotoka vetele ku lipito lya cikuvo lije lyakushokolwela cikolo ku nganda. Co cikolo calishokolokelele cikeco vavenya, co vatuukile. Vendele mu tapalo, co vwasi-vwasi uje kangelo wasezele Petulu.
11Asinoni Petulu wanangukile cuma cije calingiwile kuli ikeye, co wendekele ngwendi, “Ololo njinazivuka ngwange cinapu ca vushunga! Kuma Mwene natumu kangelo kendi kuli yange nakunjitundisa ku nzili ya Helonde na ku vyoshe vije vaYunda vashakele ngeci vilingiwe.”
12Omo wanangukile cuma eci, Petulu waile ku njuvo ya Maliya vaina ya Yowano Mako, kuje vanu vavangi vakungulukilile nakulombela. 13Co omo Petulu watotele ku lipito lya anja, co mumbanda umo muka-kupanga lizina lyendi Londa wezile nakutolililako. 14Wazivile lijwi lya Petulu, co wavwaelelele manene ngeci washatukilile mukati kujeneka kushokolola lipito, co wavalekele ngwendi Petulu nemana anja ku cikolo. 15Vamukumbulwile ngwavo, “Unazaluka!” Oloni ikeye wakele nakwendeka ngwendi mwa vushunga vene. Ngecivene, vakumbulwile ngwavo, “Amo kangelo kendi.”
16Oloni Petulu wakele nakutota. Co omo vashokolwele lipito vamumwene, co valikomokelele. 17Oloni wavanyateyeye na livoko lyendi ngeci voloke, co wavalumbunwinine vati Mwene wamutundisile mu kamenga. Co wavalekele ngwendi, “Lekeniko Yakomba vyuma evi na vaka-kukulaela veka.” Asinoni wavasezele waile ku mutambela weka.
18Omo kwakile, kwakele citanga cakama manene akati ka vaka-kunyunga kamenga, cuma muka cinalingiwa kuli Petulu? 19Co Helonde waanene lishiko ngeci vashakezeke Petulu, oloni kuvamuwanene. Wehozwele vaje vaka-kunyunga, co washikile ngeci vavatsiye.
Asinoni Helonde watundile mu Yundeya waile ku Sesaliya, co wakakele kuje.
Kutsa kwa Helonde
20Helonde waluvalele manene na vanu va ku Tile na ku Sindone, ngecivene, vaile mu mbunga yavo vakamone Helonde. Akulivanga valambelelele Mbalasitase muka-kunyunga ku lipela ngeci avakwase. Asinoni vaile kuli Helonde nakumulomba ngeci kukale kwoloka, omwo lifuti lyavo lyakele nakutambula vyakulya vyakutunda ku lifuti lya mwene.
21A litangwa limo livaangwile, Helonde wazalele vikoveyo vyendi vya vumwene, co watumbamene a litanda lyendi, co wendekele kuli vanu. 22Co vanu vatambekele ngwavo, “Kesi munu alinakwendeka embwe, oloni njambi!” 23Aje vene kangelo ka Mwene wapupile Helonde, omwo kaanene kasingimiko kuli Njambi. Co mainyo vamulile, co watsile.
24Oloni lijwi lya Njambi lyatwaleleo, co lyakele nakukula.
25Co Mbanambase na Saulu vamanesele vipangi vyavo, co velukile ku Yelusalema amo na Yowano Mako.
Currently Selected:
Vilinga vya Miluwa 12: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
