Vilinga vya Miluwa 11

Vukaleo vwa Petulu ku cikungulukilo mu Yelusalema

1Miluwa na vaka-kukulaela voshe va mu Yundeya vazivile ngwavo vaje kesi vaYunda navo lalo vanatambula lijwi lya Njambi. 2Ngecivene, omo Petulu waile ku Yelusalema, vaka-kukulaela vaje vakutuuka vamujokotesele ngwavo, 3“Omwo vika unalile na vaje kanda vatuuke?” 4Ngecivene, Petulu wavalekele vukaleo vwakushula vwa vyuma vije vyalingiwile kutunda akushangumuka ngwendi,

5“Omo njakele nakulombela mu nganda ya Yopa, co njamwene cimona. Njamwene cuma cimo cilinakuzezumukila asi cakulifwa ngwe nanga yakama yakukuta ku vimbango viwana catundile mwilu, co cemanene kuyehi nange. 6Njashumbilile mukati njamwene vimuna na tusitu, tusitu vakukalava na tuzila. 7Co njazivile lijwi lyendekele kuli yange ngwalyo, ‘Katuka, Petulu, tsiya ava tusitu ulye.’ 8Oloni njendekele ngwange, ‘Embwe Mwene! Omwo kanda njicilye cuma cimo cakujwala nambe cakujeneka kujela.’ 9Oloni lijwi lyatundile mwilu lyendekele lalo ngwalyo, ‘Vije vyanajelesa Njambi kesi uvitumbule ngwove vyakujwala.’ 10Eci calingiwile visimbu vitatu, co cije cuma vaciilwisile lalo mwilu. 11A simbu ije vene vaje vanalume vatatu vavatumine kuli yange kutunda ku Sesaliya vetele ku njuvo kuje kunjakele. 12Co Munzinzime wanjilekele kuya amo navo kujeneka kulisindiya. Ava vandolome vaka-kukulaela vatanu na umo vaile amo nange ku Sesaliya, co tuvavoshe twakakovelele mu njuvo ya Konelyasi. 13Co watulekele muje wamwene kangelo uje wemanene mu njuvo yendi, co wendekele kuli ikeye ngwendi, ‘Tuma vanu ku Yopa kuli munalume umo lizina lyendi Simoni Petulu. 14Ikeye akendeka majwi kuli yove aje akakwovola yove na naanga yove.’ 15Co omo njashangumukile kwendeka, Munzinzime Wakujela washulukile ali vakevo ngwe mwashulukilile ali yetu lalo akulivanga. 16#Vil 1:5 Asinoni njanukile vije vyendekele Mwene ngwendi, ‘Yowano wambwitikile na mema, oloni yeni vakamimbwitika na Munzinzime Wakujela.’ 17Nga Njambi waanene vaje kesi vaYunda vwana vumolika ngwe vuje vwatwanene yetu omo twakulaelele kuli Mwene Yesu Kilistu, cooni yange yange iyajo ngeci njivindike Njambi?”

18Omo vazivile majwi awa, valikelele kumujokotesa, co valemesele Njambi vendele ngwavo, “Kuma Njambi naana lalo ava kesi vaYunda simbu yakutenguluka ngeci vayoye.”

Cikungulukilo ca ku Antyoke

19 # Vil 8:1-4 Vaka-kukulaela vamo vaje vashandokele a mapakeso a simbu ije vatsiile Setefano vaile kulyala ku Fonisiya na ku Sepulasi na ku Antyoke vambulwile lijwi kuli vaYunda lika. 20Oloni vaka-kukulaela vamo, vanalume vatundile ku Sepulasi na ku Silene vaile ku Antyoke vakambulwile lijwi kuli vaje kesi vaYunda lalo, vavalekele Vin̄anda Vyavivwa vya Mwene Yesu. 21Cooni nzili ya Mwene yakele ali vakevo, co mbunga yakama ya vanu vakulaelele nakutengulukila kuli Mwene.

22Muzimbu wevi wetele ku cikungulukilo mu Yelusalema, ngecivene, vatumine Mbanambase ku Antyoke. 23Omo Mbanambase wetele kuje wamwene muje vati Njambi navezikisilamo vanu, wavwaelelele nakuvalambelela voshe ngeci vapwe va kulongwa na vaka-vushunga kuli Mwene na vimbunge vyavo vyoshe. 24Omwo Mbanambase wapwile munu wamuvwa, washulile na Munzinzime Wakujela nakukulaela, co vanu vavangi vavanenele kuli Mwene. 25Asinoni Mbanambase waile ku Tasisi kukashakezeka Saulu. 26Co omo wakamuwanene wamutwalele ku Antyoke, mu mwaka woshe wamutunu ava vavali valiwanene na vanu va mu cikungulukilo nakulongesa mbunga yakama. Co ku Antyoke kuje vaka-kukulaela vashangumukile kuvatumbula ngwavo vaka-Yesu.

27A simbu ije vene vaka-kwimanena vamo vafumine ku Yelusalema vaile ku Antyoke. 28#Vil 21:10 Umo wavo lizina lyendi Angambase wemanene na nzili ya Munzinzime wambulwile vuka-kwimanena ngwendi njala ya lyangengela ilinakwija ano asi oshe. (Co eci calingiwile omo Kalaundyase wapwile nguvulu.) 29Ngecivene, vandongisi vayongwele ngwavo umo na umo akati kavo akatume vukwasi ngwe mwanasela mukukwasa vakwavo vaka-kukulaela vaje vakele mu Yundeya. 30Co valingile cuma eci, vaanene vimbongo kuli Mbanambase na Saulu ngeci vavitwale kuli vakulunu va cikungulukilo.

Currently Selected:

Vilinga vya Miluwa 11: MBB

Highlight

Copy