Vilinga vya Miluwa 10

Petulu na Konelyasi

1Kwakele munalume umo mu Sesaliya lizina lyendi Konelyasi uje wapwile ntwama wa mashwalale va Loma vavatumbwile ngwavo, “Mashwalale va Itali.” 2Wapwile munalume wa kulongwa, ikeye na naanga yendi yoshe vakomokele Njambi. Wakwasele lalo manene vanu vakuutwa, co simbu yoshe wakele nakulombela kuli Njambi. 3Yapwile ola yamucitatu ku cingwezi omo wamwene mwamuvwa cimona muje mwamwene kangelo ka Njambi wezile kuli ikeye nakwendeka ngwendi, “Konelyasi!”

4Co ikeye wakengele kuli uje kangelo shwii na lyova wendekele kuli ikeye ngwendi, “Vika, Mwene?”

Co kangelo wendekele ngwendi, “Malombelo ove na vwana vwove vinete kuli Njambi, vinapu vyakukwanukilao. 5Co ololo tuma vanalume vamo ku Yopa kuli munalume umo lizina lyendi Simoni Petulu. 6Ikeye ali ku njuvo ya Simoni muka-kufutungula vilambu, njuvo yendi ili ku kenge ya mema a kalunga.” 7Asinoni uje kangelo waile, co Konelyasi wasanene vangamba vavali va mu njuvo yendi na lishwalale. Lishwalale uje wapwile umo wa vaka-kumupangela. Wapwile wa kulongwa. 8Wavalekele vije vyalingiwile, co wavatumine ku Yopa.

9Alikaki, omo vakele nakuya nakushwenya kuyehi na Yopa, Petulu walondele ku mulili wa akamwa ya njuvo a simbu ya mutanya ngeci akalombele. 10Co wazivile njala washakele kulya, oloni simbu vakele nakuvwaesa vyakulya wamwene cimona. 11Co wamwene lilu linashokoloka na cuma cimo cakulifwa ngwe nanga yakama cazezumukilile asi cakukuta ku vimbango viwana. 12Mukati kaco mwakele miyati yoshe ya tusitu, tusitu vakukalava na tuzila. 13Co lijwi lyendekele kuli ikeye ngwalyo, “Katuka, Petulu, tsiya ava tusitu ulye!”

14Oloni Petulu wakumbulwile ngwendi, “Embwe Mwene! Omwo kanda njicilye cuma cimo cakujwala nambe cakujeneka kujela.”

15Co lijwi lyendekele kuli ikeye lalo ngwalyo, “Vije vyanajelesa Njambi kesi uvitumbule ngwove vya mazilo.” 16Eci calingiwile visimbu vitatu, co cije cuma vaciilwisile lalo mwilu.

17Omo Petulu simbu acilikomokela a cije cimona mucinalumbunukila, kengeni, vanalume vaje vatumine Konelyasi vehwile ku njuvo ya Simoni, co a simbu ije vemanene ku cikolo. 18Co vatambekele nakwihula ngwavo, “Kuli mungenzi kuno wa lizina lya Simoni Petulu ndi?”

19Co Petulu anga wacikele nakuyongola mucinalumbunukila cimona omo Munzinzime wendekele kuli ikeye ngwendi, “Kenga! Vanalume vatatu valinakukushakezeka. 20Ngecivene, katuka shuluka uyeko, co kesi ulisindiye kuya navo omwo yange njinavatumu.” 21Co Petulu washulukile asi, co wendekele kuli vaje vanalume ngwendi, “Yange vene munalume uje imulinakushakezeka. Omwo vika munaija kuno?”

22Co vakumbulwile ngwavo, “Ntwama wa mashwalale Konelyase ikeye natutumu kuno. Ikeye munalume wamuvwa muka-kulemesa Njambi, co lalo vaYunda voshe vamusingimika. Kangelo ka Njambi wamulekele kukulanya uye ku njuvo yendi ngeci akazive vije viwukendeka.” 23Ngecivene, Petulu walanyele vaje vanalume, co wavasindiiye ngeci valalele vutsiki vuje.

Alikaki walivwaesele waile amo navo, navamo vaka-kukulaela va mu Yopa vaile amo nendi. 24Co alikaki vetele mu Sesaliya kuje Konelyasi wakele nakumuvandamena, amo na vavushoko na vasamba vaje vaalanyele. 25Omo Petulu wakele nakukovela, Konelyasi wamusheshele, co watsikamene a mavuli ku myanja yendi nakumulemesa. 26Oloni Petulu wamukatwile. Wendekele kuli ikeye ngwendi, “Imana, omwo nange lalo njinapu nji munu.” 27Co Petulu wakele nakwendeka kuli Konelyasi omo vakovelele mu njuvo, co vawanenemo vanu vavangi vanakunguluka laja. 28Co wendekele kuli vakevo ngwendi, “Yeni munazivuka ngweni kaYunda lishiko lyendi kulimutavesa kwendela nambe kulizema na ava kesi vaYunda. Oloni Njambi nanjimwesa yange ngeci kesi njiyongole munu umo ngwange wakujwala nambe ngwange wakujeneka kujela. 29Ngecivene, omo unanjisana njinaija na vimata vyai. Njikwihula ngwange omwo vika unanjisanena?”

30Co Konelyasi wendekele ngwendi, “Yapwile ngwe simbu ino vene kuneti laja matangwa atatu omo njakele nakulombela mu njuvo yange a ola yamucitatu ku cingwezi. Co vwasi-vwasi munalume umo wazalele vuzalo vwakutoka wemanene kulutwe lwange 31co wendekele kuli yange ngwendi, ‘Konelyasi! Njambi nazivi kulombelo kwove, co nanuka vipangi vyove vyavivwa. 32Tuma munu ku Yopa ngeci akasane munalume umo lizina lyendi Simoni Petulu. Ali ku njuvo ya Simoni muka-kufutungula vilambu, uje njuvo yendi ili ku kenge ya mema a kalunga.’ 33Ngecivene, njatumine vwasi-vwasi vanu kuli yove, co unavwaesa omo unaija. Ololo yetu voshe tuli kuno ku mesho a Njambi tunavandamena kutolilila vyuma vyoshe ovyo vyanakuleka Mwene ngeci uvyendeke.”

Kwambulula kwa Petulu

34 # Kwi 10:17 Co Petulu washangumukile kwendeka ngwendi, “Mwa vushunga vene njinamono ngwange Njambi kesi na kahangu. 35Oloni woshe amukomoka nakulinga vije vyavivwa vakamutambula kuli ikeye, kukwesi mulonga nambe ikeye wakundama ku muyati uka nambe uka. 36Munazivuka muzimbu watumine ku vanu va Isalele, mukwambulula Vin̄anda Vyavivwa vya kwoloka ali Yesu Kilistu, ikeye Mwene wa vanu voshe. 37Mwazivuka vije vyalingiwile mu lifuti lyoshe lya Isalele, kushangumuka ku Ngalileya munima ya Yowano uje wambulwile muzimbu wakumbwitika. 38Mwazivuka vya Yesu wa ku Nazaleta na muje Njambi wamuvwavesele Munzinzime Wakujela na nzili. Wendanganene kwoshe-ikwoshe nakulinga vyavivwa nakukangwisa voshe vaje vakele mwisi ya nzili ya Liyavola, omwo Njambi wakele amo nendi. 39Co yetu tuvakaleo ku vyoshe vije vyalingile mu lifuti lya Isalele na mu Yelusalema. Co vamutwalele ku kutsa nakumushukika a cilindakano. 40Oloni Njambi wamusangwile ku vatsi omo kwetile matangwa atatu, co wamusholwele, 41kesi ku vanu voshe, oloni kuvanga kuli vakaleo vaje vaangwile laja Njambi, yetu vene, vaje valile nakunwa amo nendi omo nasanguka ku vatsi. 42Co watushikile ngeci twambulule lijwi kuli vanu nakwambulula vukaleo ngeci ikeye napu uje vene yavwavesele Njambi kupwa lyaako lya vaka-kuyoya na vatsi. 43Kuli ikeye vaka-kwimanena voshe vendekele vyendi ngwavo munu woshe akulaela kuli ikeye vakamusambesa ku vivi vyendi a lizina lyendi lya nzili.”

Vaje kesi vaYunda vatambula Munzinzime Wakujela

44Omo Petulu acili nakwendeka, Munzinzime Wakujela washulukile ali voshe vaje vakele nakutolilila muzimbu wendi. 45Co vaje vaYunda vaka-kukulaela vezile amo na Petulu kutunda ku Yopa valikomokelele omwo Njambi wetilile vwana vwendi vwa Munzinzime Wakujela ali vaje kesi vaYunda lalo. 46Omwo vavazivile valinakwendeka mu vindaka vyeka nakushangazala vukama vwa Njambi. Asinoni Petulu wendekele ngwendi, 47“Vanu ava vanatambula Munzinzime Wakujela, ngwe mutwamutambwile yetu lalo. Ngecivene, kuma kuli umo lalo asa kuvavindika ngeci kesi tuvambwitike mu mema ndi?” 48Ngecivene, washikile ngeci vavambwitike mu lizina lya Yesu Kilistu. Asinoni vamulombele ngwavo akale navo matangwa amandondo.

Currently Selected:

Vilinga vya Miluwa 10: MBB

Highlight

Copy