Vilinga vya Miluwa 9

Kutenguluka kwa Saulu

(Vilinga vya Miluwa 22:6-16; 26:12-18)

1A simbu ije vene Saulu wakele na muuka wakushungwiya kutsiya vandongisi va Mwene. Waile kuli Muka-kukombelela Wakama, 2co wakalombele mikanda ya vukaleo yakuya nayo ku masinangonge aje akele mu Ndamasiku, ngecivene, nga akawana vamo vaka-kukava Ngila ya Mwene, munakazi nambe munalume, avakwate nakuvatwala ku Yelusalema.

3Omo Saulu wetele kuyehi na nganda ya Ndamasiku, vwasi-vwasi ceke cakuvyazima cakutunda mwilu camutwililile nakumuzengeleka. 4Co wawililile asi wazivile lijwi lyendekele kuli ikeye ngwalyo, “Saulu, Saulu! Vika ulinakunjiyandesela?”

5Co Saulu wehwile ngwendi, “Yove iya, Mwene?”

Co lijwi lyakumbulwile ngwalyo, “Yange Yesu, uje iwulinakuyandesa. 6Oloni katuka uye mu nganda, co vakakuleka viwunapande kulinga.”

7Vanalume vaje vendele amo na Saulu vemanene, kuvendekele lijwi na limo lyai, vazivile lijwi oloni kuvamwene munu naumo wai. 8Ngecivene, Saulu wakatukile asi watonene mu mesho, oloni kasele kumona cuma. Ngecivene, vamukwatele ku livoko nakumutwala ku Ndamasiku. 9A matangwa atatu kasele kumona, a simbu ije kalile nambe kunwa cuma cimo.

10Mu Ndamasiku mwakele muka-kukulaela lizina lyendi Ananiyasi. Wamwene cimona cije Mwene wendekele kuli ikeye ngwendi, “Ananiyasi!” Co ikeye wakumbulwile ngwendi, “Yange uno Mwene.”

11Co Mwene wamulekele ngwendi, “Katuka uye ku Ngila Yakushungama ku njuvo ya Yundasa ukehuleko munalume umo natundu ku Talisi lizina lyendi Saulu. Omwo ikeye alinakulombela, 12co mu cimona cendi namono munalume umo lizina lyendi Ananiyasi naija nakumukambeka mavoko ngeci ase kumona lalo.”

13Oloni Ananiyasi wakumbulwile ngwendi, “Mwene, vanu vavangi vananjileka vyowo munalume na vyuma vyavingi vyavikalu vyanalingi ku vanu vove mu Yelusalema. 14Co naija lalo kuno ku Ndamasiku na moko yakutunda kuli vakulunu va vaka-kukombelela mukukwata voshe vaje vakulemesa.”

15Oloni Mwene wendekele kuli ikeye ngwendi, “Ya, omwo njinamwangula ngeci anjipangele, mukusholola lizina lyange kuli vaje kesi vaYunda na kuli vimyene na kuli vanu va Isalele. 16Omwo yange njikamuleka vyoshe vije vyanapande kuyanda omwo lizina lyange.”

17Ngecivene, Ananiyasi waile, co wakakovelele mu njuvo muje mwakele Saulu, co wakambekele mavoko endi ali ikeye wendekele ngwendi, “Ndolome yange Saulu, Mwene nanjitumu, Yesu vavenya, uje washolokele kuli yove mu ngila omo wakele nakwija kuno. Nanjitumu ngeci wase kumona lalo, co ushule na Munzinzime Wakujela.” 18Co vwasi- vwasi vyuma vyakufwa ngwe mavanda a visi vyatundile a mesho endi, co wasele kumona lalo. Asinoni wakatukile nakumumbwitika, 19omo walile vyakulya, co wakele na nzili lalo.

Saulu ambulula mu Ndamasiku

Saulu wakele matangwa amandondo lika na vandongisi mu Ndamsiku. 20Co waile ku masinangonge washangumukile kwambulula ngeci Yesu ikeye Muna Njambi.

21Co voshe vaje vamuzivukile valikomokelele, co vehwile ngwavo, “Kuma ou kesi uje munalume wakele mu Yelusalema uje wakele nakutsiya voshe vaje valemesele Yesu ndi? Co kuma kezile kuno mukukwata vaka-kukulaela ngeci avatwale kuli vakulunu va vaka-kukombelela ndi?”

22Oloni Saulu wakele na nzili manene, wavayesele vaYunda vaje vakele mu Ndamasiku, wavalekele ngwendi Yesu wapwile Wakuvwavesa.

23 # 2 Koli 11:32-33 Omo kwetile matangwa amangi, vaYunda valikungulwile amo nakutumba matumbe akutsiya Saulu, 24oloni vamulekele vya vutumbe vwavo. Mutanya na vutsiki vakele nakunyunga ku vikolo vya ku nganda ngeci vamutsiye. 25Oloni vutsiki vumo vandongisi va Saulu vamwakele mu mutonga nakumusosela anja ya civumbe mu njanena.

Saulu mu Yelusalema

26Co omo Saulu waile ku Yelusalema wesekele kulikumbasana amo na vandongisi. Oloni kuvakulaelele ngeci ikeye napu ndongisi, co voshe vamutewele. 27Oloni Mbanambasa wamukwasele nakumutwala kuli miluwa. Co wavalumbunwinine muje Saulu wamwene Mwene a ngila na muje Mwene wendekele kuli ikeye. Co lalo wavalekele kusimpa kwa Saulu omo wambulwile mu lizina lya Yesu mu Ndamasiku. 28Ngecivene, Saulu watumbamene amo navo wetile mu Yelusalema mwoshe nakwambulula mu lizina lya Mwene nakusimpa. 29Ikeye lalo wasimutwiiye nakulikanangana na vaYunda vaje vendekele ciNgiliki, oloni vashakele kumutsiya. 30Omo vaka-kukulaela vazivile cuma eci, vatwalele Saulu ku Sesaliya nakumutuma ku Tasisi.

31Ngecivene, vikungulukilo vyoshe mu Yundeya na mu Ngalileya na mu Samaliya vakele na simbu ya kwoloka. Akukwasa kwa Munzinzime Wakujela vikungulukilo vyakolele nakuliwezelela, ngwe akuyoya kwavo mukukomoka Mwene.

Petulu ali mu Linda na mu Yopa

32Petulu wendanganene kwoshe-ikwoshe, co a simbu imo waile nakusikamesa vanu va Njambi vaje vakele mu Linda. 33Kuje kwakele munalume umo lizina lyendi Aeneyase uje wapwile muka-kalepa kasele kutunda a vulili a myaka itanu na itatu. 34Co Petulu wendekele kuli ikeye ngwendi, “Aeneyase, Yesu Kilistu akukangwise. Katuka jandula vulili vwove.” Aje vene Aeneyase wakatukile. 35Co vanu voshe vakele mu Linda na mu Shalone vamumwene, vakulaelele kuli Mwene.

36Mu Yopa mwakele munakazi umo lizina lyendi Tambita, uje wapwile muka-kukulaela. (Lizina lyendi mu ciNgiliki ikeye Ndokasi, kulumbunuka ngwavo “shonge.”) Simbu yendi yoshe wakele nakulinga vyavivwa nakukwasa tuutu. 37A simbu ije vene wavinjile, co watsile. Vajwelesele muvila wendi nakuulangeka ku mulili wa akamwa ya njuvo.#9:37 MULILI WA AKAMWA YA NJUVO: Kenga Mateo 24:17. 38Yopa yakele kuyehi na Linda, co omo vandongisi vaje vakele mu Yopa vazivile ngwavo Petulu ali mu Linda vatumine lijwi na vanalume vavali kuli ikeye ngwavo, “Mwane, munapande kwija vwasi kuno kuli yetu.” 39Ngecivene, Petulu wakatukile waile navo. Omo wetele vamutwalele ku mulili wa akamwa kuje vifwile voshe vamuzengelekele nakulila nakumumwesa vimbinja na vikoveyo vije vyalingile Ndokasi a simbu wakele nakuyoya. 40Oloni Petulu wavatuwisilemo voshe muje mu mulili, co watsikamene asi nakulombela, asinoni watengulukilile ku civimbi ca Ndokasi, co wendekele ngwendi, “Tambita, induka!” Co watonene, co omo wamwene Petulu, watumbamene. 41Co Petulu wamushwenyele nakumukwata ku livoko nakumwindula. Asinoni wasanene vaka-kukulaela voshe na vaje vifwile, co wavaneneye oku alinakuyoya. 42Co n̄anda eyi yashandokelele mu Yopa mwoshe, co vanu vavangi vakulaelele kuli Mwene. 43Co Petulu watumbamene matangwa amangi mu Yopa amo na Simoni muka-kufutungula vilambu.

Currently Selected:

Vilinga vya Miluwa 9: MBB

Highlight

Copy