2 Samwele 22
22
Mwaso wa Ndaviti wakuhyana
(Mya 18)
1Omo Shukulu Kalunga waamenene Ndaviti kuli Saulu na vitozi vendi voshe, Ndaviti wembilile mwaso ou Shukulu Kalunga ngwendi,
2Shukulu Kalunga ikeye muka-kunjinyunga,
ikeye wapwa cimpaka cange cakukola.
3Njambi yange ikeye wapwa cishwamo cange,
muli ikeye mukemwo munjitewela.
Ikeye wapwa ntelo yange,
muka-kunjamena nakunjinyunga mwamuvwa.
Ikeye muyoyesi wange,
ikeye muka-kunjinyunga nakunjamena,
ku vukalu vwoshe.
4Njitambeka kuli Shukulu Kalunga,
co ikeye anjamena ku vitozi vange.
Shangazaleni Shukulu Kalunga!
5Kutsa kwanjizengelekele ngwe linimbwa,
mankimba akunjinyongesa anjifwikile.
6Kutsa kwanjizengelekele ngwe linimbwa,
co vinganjo vya mbumbo vyanjishwikile.
7Mu simbu yange ya tuyando,
njatambekele kuli Shukulu Kalunga,
njatambekele kuli Njambi yange ngeci anjikwase.
Mu Njuvo yendi wazivile lijwi lyange,
ikeye watolililile ku mutambi wange wa akukwasa.
8Omo Njambi waluvalele,
asi aningangele nakujaja,
na maluvula a minkinda alinikile nakushengenya.
9Co vwisi vwatuukile
mu majulu endi,
mulangi wakunyongesa,
na manungu a tuhya
vyatundile mu kanwa kendi.
10Watavwile lilu nakulisholola,
wezile ano asi,
co lishelwa lyakuzivala vwii
lyakele mwisi ya mendi endi.
11Wapulwile a kelumbi,
wendelele a mambava a lihunzi.
12Wavandele mulisusulungu,
mashelwa a kuhima a nyonzi amufwikile.
13Ceke catwile kulutwe lwendi,
kwashukumine manungu a tuhya.
14Asinoni Shukulu Kalunga walumine mwilu,
co lijwi lya Njambi Muka-nzili yoshe valizivile.
15Co ikeye washele mikili yendi,
nakushandola vitozi vendi,
nakuhyahyata kwa mihyato
wavashekele.
16A masima a mema a kalunga asholokele,
luvula lwa asi lwasholokele,
omo Shukulu Kalunga waluvalelele vitozi vendi,
co wavaluvalesele na vukalu.
17Shukulu Kalunga
wolwele livoko lyendi oku ali mwilu
nakunjikwata,
wanjijavulwile mu mema akulova.
18Wanjamenene ku vitozi vange va nzili,
na kuli voshe vaje vanjizinda
omwo vanjihyanene nzili.
19Omo njakele mu tuyando
vanjilwisile,
oloni Shukulu Kalunga
wanjinyungile.
20Wanjikwasele nakunjitundisa mu vushonde,
wanjamenene omwo wavwaelelele nange.
21Shukulu Kalunga anjana
cikandelela
omwo nji muka-kulinga mwamuvwa,
ikeye anjivezikisa
omwo kunjesi na mulonga.
22Njinononoka lishiko
lya Shukulu Kalunga,
co kunjakengesele nima
Njambi yange.
23Njinanyungu mashiko endi oshe,
kunjavyanene kwononoka
mashiko endi embwe,
24nazivuka ngeci kunjesi na mulonga,
co njalinyunga ku vuvi.
25Ngecivene, anjana cikandelela
omwo njikalingi vyavivwa,
omwo azivuka ngeci
kunjesi na mulonga.
26Shukulu Kalunga,
yove wapwa wa kulongwa,
kuli vaje va kulongwa kuli yove,
co wapwa wamuvwa kuli vaje vavavwa.
27Yove wapwa wakujela kuli vaje vakujela,
oloni ukamwesa vukalu kuli vaka-vuvi.
28Yove ukamena vaje vaka-kulikeesa,
oloni ukakeesa vaje vaka-kulyalesa.
29Yove Shukulu Kalunga wapwa ceke cange,
tundisa lisusulungu lyange.
30Unjana nzili yakulwisa vitozi vange,
na nzili yakufungulula vimpaka vyavo.
31Ou Njambi vilinga vyendi
vyapwa vyakulumbunuka,
na majwi endi apwa akulitulao!
Ikeye wapwa ntelo ya voshe vaje
vatewela muli ikeye.
32Shukulu Kalunga endi lika ikeye Njambi.
Njambi endi lika ikeye cimpaka cetu.
33Ikeye Njambi muka-kunjana nzili,
ikeye atwamenena muka-vushunga
mu ngila yendi.
34 #
Hamba 3:19
Ikeye ashatukisa mendi ange ngwe shonge,
anjinyunga mwamuvwa a minkinda.
35Ikeye anjilongesa kulwa vinzita,
ngeci njase kunana vuta vwa lusipa vwakukola.
36Yove Shukulu Kalunga,
u muka-kunjinyunga nakunjamena,
kunyunga kwove kunanjitsimanesa.
37Yove unanjinyungu kutewa vanjifungulula,
co nalumo lwai njinau.
38Njisheka vitozi vange nakuvafungulula,
kunjilikela noo njinavanyongesa.
39Njivawisila asi,
co kuvasa lalo kwindukao,
valala ku myanja yange omo njinavafungulula.
40Unjana nzili yakulwa nzita
nakufungulula vitozi vange.
41Yove usheka vitozi vange
ngeci vatunde kuli yange,
co njinyongesa vaje vanjizinda.
42Vatambeka ngeci vavakwase,
oloni naumo wai avamena.
Vatambeka kuli Shukulu Kalunga,
oloni kavakumbulula.
43Njavatsenene tsenu-tsenu,
vafwile ngwe likungu,
njavalyatangelele ngwe lindova
lya mu vingila.
44Wanjamenene kuli vanu vange
vaje vanjitengulukilile,
nakunjipwisa muka-kushwana miyati,
vanu vaje kunjazivukile,
ololo vanjipangela.
45Vaka-kwija vatsikama kuli yange,
omo vaziva lijwi lyange,
co vanjononoka.
46Kusimpa kwavo kulinakuhwa,
valinakwija nakujaja
kutunda mu vimpaka vyavo.
47Shukulu Kalunga wayoya!
Shangazaleni muka-kunjilwila!
Shangazaleni vukama vwa nzili ya Njambi
muka-kunjamena.
48Ikeye anjihyanesa ku vitozi vange,
nanjifungulwila miyati yoshe,
49nakunjamena ku vitozi vange.
Yove Shukulu Kalunga,
unanjihyanesa ku vitozi vange
nakunjinyunga ku vanu vavakalu.
50 #
Lom 15:9
Ngecivene, njikakushangazala akati ka miyati,
njikakwimbila myaso yakukushangazala.
51Njambi akana kuhyana kwakama,
kuli mwene uje yalyangwilile,
ikeye amwesa cizemo cije kucesi kutenguluka
kuli uje yanaangula,
kuli Ndaviti na vatekulwila vendi ku myaka yoshe.
The Bible in Mbunda ©The Bible Society of Zambia, 2006