2 Samwele 23
23
Majwi a Ndaviti akumanesela
1Ndaviti muna Njesi wapwile munu uje Njambi wamupwisile wakama, uje Njambi ya Yakomba wamwangwile kupwa mwene, ikeye wapwile muka-kumanga myaso yaivwa ya Isalele. Awa akewo majwi a Ndaviti akumanesela.
2Munzinzime wa Shukulu Kalunga
alinakwendekela muli yange,
majwi endi ali a ndaka yange.
3Njambi ya Isalele nendeka,
muka-kunyunga Isalele
nendeka kuli yange ngwendi,
“Mwene muka-kushwana na vushunga,
muka-kushwana nakwononoka Njambi,
4napu ngwe ceke ca mutondo
omo litangwa lituuka mutondo
omo kukwesi mashelwa,
ngwe litangwa livyakumisa mwila
omo nyonzi inavatuka.”
5Omu mukemwo mwakavezikisila Njambi
vatekulwila vange,
omwo nalikumiiya nange cikumiiyo kucesi kuhwa,
na lizivasano lije kulyesi kuhwa,
na cikulaeso cije kucesi kutenguluka.
Evi vyoshe vikevyo vinjishaka,
kuje kukekwo kukapwa kuhyana kwange,
mwa vushunga Njambi akavisholola.
6Oloni vanu vaka-kuvyana Njambi,
vanafu ngwe mambimbo akumbila kuti,
aje kuvasa kukwata na mavoko.
7Kuvanga kupangesa cikuvo nambe likunga,
vakawenyeka oshe njwa.
Mashwalale va Ndaviti va lutsimo
(1 Miz 11:10-41)
8Awa akewo mazina a mashwalale va Ndaviti va lutsimo, wakulivanga wapwile Yosheve Mbashevete wa ku Takemone, ikeye wapwile ntwama ya “Vatatu”#23:8 VATATU: Kunungulula kumo kwalaja mu ciHevelu ngwavo, wamucitatu. walwisile vanalume 800 na likunga lyendi, co voshe wavatsiile mu nzita imolika.
9Wamucivali wakutsimana kuli vaje vatatu wapwile Elyazale muna Ndondo, wa ku cikota ca Aho. Litangwa limo ikeye na Ndaviti valwisile vaFilisitiya vaje valikungulwile kulwa nzita. Co vaIsalele vonwele, 10oloni ikeye wasalele, co walwile na vaFilisitiya noo livoko lyendi lyakele na cingole, co kasele kupangesa mukwale wendi. Co a litangwa lije Shukulu Kalunga wahyanene nzita yakama. Omo nzita yahwile, co vaIsalele velukile kuje kwakele Elyazale, co wambatele vintelo vya vaje vatsile.
11Wamucitatu wakutsimana kuli vaje vatatu wapwile Shamema muna Ange wa ku Halale. VaFilisitiya vakungulukilile ku Lehi, kuje kwakele lihya lya makunde. Co vaIsalele vatewele vaFilisitiya, 12oloni Shamema wasalele nemana mu lihya, co walivingiiye, watsiile vaFilisitiya. Co a litangwa lije Shukulu Kalunga wahyanene nzita yakama.
13Omo simbu ya kuteja yakele kuyehi, co vaje vatatu va ali vaje “Makumi Atatu” vashelumukilile ku linzenzengoma lya Andulame, kuje kwakele Ndaviti, a simbu ije mbunga ya vaFilisitiya vakele nakutunga cilombo cavo mu Cana ca Lefaime. 14A simbu ije Ndaviti wakele mu cimpaka ca a lilundu, co mbunga imo ya vaFilisitiya vakele mu Mbetelehema. 15Ndaviti wakele na mangunge akwiluka kwimbo, co wendekele ngwendi, “Tawe, nga na munu wakunjiilako akanjishakeleko mema akunwa a mu lisima lya kuyehi na cikolo ca ku Mbetelehema!” 16Co vaje mashwalale va lutsimo vatatu, valicikininine kwita mukati ka cilombo ca vaFilisitiya, kuya nakutekula mema mu lisima, co vawanenele kuli Ndaviti. Oloni kaanwile, waetilile kuwapwisa ngwe n̄ombelo kuli Shukulu Kalunga, 17co wendekele ngwendi, “Yove Shukulu Kalunga, yange kunjasa kuwanwa! Cipwa ngwe njilinakunwa maninga ava vanu valambwile myonyo yavo!” Ngecivene, wavyanene kuwanwa.
Evi vikevyo vyapwile vilinga vyakwamuka vya mashwalale vaje vatatu vakutsimana.
18Avishai ndolome ya Yowave, (vaina Zeluya) wapwile ntwama ya vaje “Makumi Atatu va Lutsimo.” Ikeye walwile na vanalume 300 na likunga lyendi, co wavatsiile, watsimanene akati ka vaje “Makumi Atatu.” 19Watsimanene manene kuli vaje “Makumi Atatu”, co wapwile ntwama yavo, oloni ikeye katsimanene ngwe vaje “Vatatu.” 20Mbenaya muna Yehoyanda wa ku Kambizele wapwile lishwalale mukwavo wa lutsimo, walingile vilinga vyavingi vya nzili, watsiile vaMowavi vavali vakele na nzili ngwe vindumba. A simbu imo washelumukile mu mbulu, watsiile ndumba a litangwa lya mema akukonda. 21Co lalo watsiile kaIngito umo, wapwile munalume wakutunuka wakwatele likunga mu livoko lyendi. Co Mbenaya wamulwisile na mulamu wendi, wanyangwile likunga mu livoko lya kaIngito, co wamutsiisilelyo. 22Evi vikevyo vilinga vyakwamuka vya Mbenaya, ikeye wapwile umo wa ali vaje “Makumi Atatu.” 23Ikeye watsimanene akati ka vaje “Makumi Atatu”, oloni kakele na lutsimo ngwe vaje “Vatatu” embwe. Co Ndaviti wamupwisile mukulunu wa vaka-kumunyunga. 24Vaje vakele akati ka vaje “Makumi Atatu” vapwile ava,
Ashahele ndolome ya Yowave,
na Elehanane muna Ndondo wa ku Mbetelehema,
25na Shamema, na Elika va ku Halonde,
26na Heleze wa ku Pelete,
na Ila muna Ikesha wa ku Tekowa,
27na Aviyezele wa ku Anatote,
na Membunai wa ku Husha,
28na Zalemone wa ku Aho,
na Mahalai wa ku Netofate,
29na Helembe muna Mbana wa ku Netofate,
na Itai muna Limbai wa ku Ngimbeya,
mu lifuti lya Mbenjemani,
30na Mbenaya wa ku Pilatone,
na Hindai wa ku vyana vya kuyehi na Ngasha,
31na Ambiyalembone wa ku Alamba,
na Azemavete wa ku Mbahulime,
32na Elyahamba wa ku Shalembone,
na vana va Yasheni, na Yonatana,
33na Shamema wa ku Halale,
na Ahiyame muna Shalale wa ku Halale,
34Na Elifelete muna Ahashimbai wa ku Maka,
na Elyame muna Ahitofele wa ku Ngilo,
35na Hezelo wa ku Kalemele,
na Palai wa ku Alambe,
36na Ingale muna natane wa ku Zova,
na Mbani wa ku Ngande,
37na Zeleke wa ku Amoni,
na Nahalai wa ku Mbelote,
muka-kwambata ntelo ya Yowave,
38na Ila, na Ngalembe va ku Njatile,
39na Uliya kaHiti.
Voshe vapwile makumi atatu na vatanu na vavali mashwalale va lutsimo.
The Bible in Mbunda ©The Bible Society of Zambia, 2006