2 Samwele 21
21
Kutsa kwa vatekulwila va Saulu
1Omo Ndaviti washwanene, kwakele njala ya lyangengela myaka itatu yoshe yamutunu. Ngecivene, Ndaviti wehwile Shukulu Kalunga a vyuma evi, co Shukulu Kalunga wendekele ngwendi, “Saulu na naanga yendi vali na mulonga wakutsiya omwo vatsiile vanu va ku Ngimbiyone.” 2#Yos 9:3-15 (VaNgimbiyone kuvapwile vaIsalele embwe, vapwile muyati waundondo wa vaAmoli vaje vavakulaesele kuvanyunga kuli vaIsalele, oloni Saulu wavanyongesele omwo washungwiiye vanu va Isalele na Yunda.) 3Ngecivene, Ndaviti wasanene vaNgimbiyone, co wavehwile ngwendi, “Vika njikamilingila? Njishaka kumifwetela a vuvi vuje vwalingiwile kuli yeni, ngeci muvezikise vanu va Shukulu Kalunga.”
4Co vamukumbulwile ngwavo, “Vin̄anda vyetu na Saulu, na naanga yendi kuvyasa kuhwa na siliva nambe na ngolinde, co lalo kutushaka kutsiya kaIsalele umo.”
Co Ndaviti wavehwile ngwendi, “Cooni mushaka ngeci njimilingile vika?”
5Co vamukumbulwile ngwavo, “Saulu washakele kutunyongesa ngeci kesi kusaleo umo wakuyoya akati ketu mu Isalele. 6Ngecivene, twane vatekulwila vendi va vanalume vatanu na vavali, ngeci tukavashukikile ku mesho a Shukulu Kalunga ku Ngimbeya, kwimbo lya Saulu, mwene uje yaangwile Shukulu Kalunga.”
Co mwene wavakumbulwile ngwendi, “Njikamyanavo.”
7 #
1 Sam 20:15-17; 2 Sam 9:1-7 Oloni omwo acikulaeso cakujela cije calingile na Yonatana, Ndaviti waameneneo Mefimboshete muna Yonatana, mutekulu wa Saulu. 8#1 Sam 18:19 Nameme ngoco, Ndaviti wambateleo Alemoni na Mefimboshete vana vavali va vanalume vaje Lizepa muna Aiya wakitilile kuli Saulu, co lalo wambatele vana va vanalume vatanu vatekulu va Saulu va munendi wa munakazi Melambe, yakitilile kuli Andelyele muna Mbazilai, wa ku Mehola. 9Co Ndaviti wavanene kuli vanu va ku Ngimbiyone, co vavashukikile a munkinda ku mesho a Shukulu Kalunga, voshe vatanu na vavali vatsililile amolika. Yapwile simbu ya cisika, yakushangumuka kuteja mbale ya maumwa, omo vavatsiile.
10Asinoni Lizepa lishano lya Saulu lya mbanja, muna Aiya, wanonele cikeleya, co walilingilile munzinze ikeye vavenya a limanya kuje kwakele vivimbi, wakele kuje kutunda kukushangumuka kuteja noo nyonzi ya Kuhu yanyokele. Co a simbu ya mutanya wakele nakuvingila tuzila a vivimbi, co ku vutsiki wakele nakuvinyunga ku tusitu.
11Omo Ndaviti wazivile vije vyalingile Lizepa, 12#1 Sam 31:8-13 waile nakwambata vitsiya vya Saulu na munendi Yonatana kuli vanu va ku Njembeshe mu Ngilyande. (Vije vivevile mushandangala yangoco ya Mbete Shane, kuje vaFilisitiya vashukikile vivimbi a litangwa lije vatsiile Saulu a Munkinda wa Ngilembowa.) 13Ndaviti wanonele vitsiya vya Saulu na Yonatana, co lalo wakungulwile vitsiya vya vaje vanu vatanu na vavali vavashukikile. 14Asinoni vatsindile vitsiya vya Saulu na Yonatana mu mbumbo ya Kishe ishe ya Saulu, mu Zela mu lifuti lya Mbenjemani, ngecivene, valingile vyoshe vije vyashikile mwene. Co munima yevi, Njambi wakumbulwile malombelo avo aa lifuti.
Vinzita vyakulwisa makisi-kisi a vaFilisitiya
(1 Miz 20:4-8)
15Kwakele lalo nzita mukati ka vaFilisitiya na Isalele, Ndaviti na vanu vendi vaile nakulwa na vaFilisitiya. Omo vakele nakulwa nzita, co Ndaviti wazeyele. 16Likisi-kisi umo lizina lyendi Ishembimbenombe, wambatele likunga lya vunengu vulemu vwalyo vwapwile makilo atatu na litambelo washwelele mukwale wauwa, co ikeye wayongwele ngeci atsiye Ndaviti. 17#1 Vim 11:36; Mya 132:17 Oloni Avishai muna Zeluya wezile kuli Ndaviti nakumukwasa, walwisile uje likisi-kisi, co wamutsiile. Asinoni vanu va Ndaviti vamulombele ngwavo, “Kesi ukaye netu lalo ku nzita, yove unapu manda ya Isalele, co kutushaka lalo ngeci tukujeneke.”
18Munima yevi kwakele lalo nzita na vaFilisitiya ku Ngove, mu nzita ije Simbekai wa ku Husha watsiile likisi-kisi lizina lyendi Safe.
19Kwakele lalo nzita ikwavo na vaFilisitiya ku Ngove, Elehanane muna Njaile wa ku Mbetelehema watsiile Lahemi, shongo ya Ngolyata wa ku Ngate, muyunda wa likunga lyendi wapwile ngwe mukambo wa muka-kutunga vinanga.
20Co lalo kwakele nzita ikwavo ku Ngate, kwakele likisi-kisi wazemene manene kulwa, wakele na milavo itanu na umo ku livoko limo na limo, na milavo itanu na umo ku cilyato cimo na cimo.
21Ikeye wayeluwisile vaIsalele, co Yonatana, muna Shamema, ndolome ya Ndaviti wamutsiile.
22Ava makisi-kisi vawana vapwile vatekulwila va makisi-kisi va ku Ngate, vavatsiile kuli Ndaviti na vanu vendi.
The Bible in Mbunda ©The Bible Society of Zambia, 2006