2 Samwele 20
20
Shemba atengulukila mwene
1 #
1 Vim 12:16; 2 Miz 10:16 Kuje ku Ngilingale, kwakele munu umo vilinga vyendi vyapwile vyavivi manene, lizina lyendi Shemba muna Mbikile, wa ku muyati wa Mbenjemani, ikeye wembile lupembo nakutambeka ngwendi, “Kutwesi na mutambela muli Ndaviti, co kutwesi na vushwana muli muna Njesi, yeni vanu va Isalele, munu na munu eluke kwimbo lyendi.” 2Ngecivene, vaIsalele vasezele Ndaviti, co vaile na Shemba, oloni vanalume va Yunda vakavele Ndaviti, kutunda ku Yondau nakweta ku Yelusalema.
3 #
2 Sam 16:22
Omo Ndaviti wetele ku lipela lyendi mu Yelusalema, wasanene vaje mashano va mbanja likumi vaje vasezele ngeci vanyunge lipela, wavaakele mu njuvo nakuvanyungilamo. Vavaanene vyoshe vije vivashakele, oloni kalalele navo lalo. Mukuyoya kwavo kwoshe vavanyungile mu cifwa cangacije vene, vayoyele ngwe vifwile.
4Mwene wendekele kuli Amasa ngwendi, “Ya ukanjisanene vanalume va mu Yunda voshe, co indele mutondo wije amo navo.” 5Amasa waile nakuvasana, oloni kelukile a simbu ije yamulekele mwene. 6Ngecivene, mwene wendekele kuli Avishai ngwendi, “Shemba akatunenela vukalu kutuvakana Avisalome. Ya na vanu vange muye nakumukava, kutewa akakovela mu vinganda vya vivumbe, co akatuvomboloka.” 7Ngecivene, vanu va Yowave, na vaka-kunyunga mwene, na mashwalale voshe vatundile mu Yelusalema amo na Avishai vaile nakukava Shemba. 8Omo vetele ku limanya lyakama ku Ngimbiyone, Amasa waliwanene navo. Yowave wazalele vya nzita, na mukwale wakele mu cindalo cawo a mbunda yendi. Co omo wakele nakwenda, mukwale washolomokele mu cindalo cawo. 9Co Yowave wendekele kuli Amasa ngwendi, “Unenduka vati musamba wange?” Wamukwatele ku munjezi na livoko lyendi lya cilyo ngeci amutsembe. 10Amasa kamwene mukwale wakwatele Yowave mu livoko lyendi lyacimwoshe, Yowave wamutivile mwimo, co mila yendi yalundumukilile asi. Aje vene watsile, oloni Yowave kamutsulile lalo embwe.
Asinoni Yowave na ndolome yendi Avishai vaile nakukavangeya Shemba. 11Co umo wa vanu va Yowave wemanene ku civimbi ca Amasa wasanene ngwendi, “Munu woshe uje napu wa Yowave na Ndaviti, akave Yowave!” 12Civimbi ca Amasa, calyalangele mu maninga, calalele mukati ka ngila. Co munu wa Yowave omo wamwene ngeci vanu voshe vakele nakwimanao, watundisile cije civimbi mu ngila wacitwalele mu shwata, wacifwikile kambilititi. 13Omo vanatundisa laja civimbi mu ngila, co vanu voshe vakavele Yowave nakushakezeka Shemba.
14Shemba wetile mu lifuti lya miyati yoshe ya Isalele, co wetele ku nganda ya Avele Mbete Maka, vanu voshe va ku cikota ca Mbikile vakungulukile, vamukavele na mu nganda. 15Co vanu va Yowave vazivile ngwavo Shemba ali kuje, ngecivene, vaile nakuzengeleka nganda. Vendile mitumbo ya livu anja ya civumbe, co vashangumukile lalo kwinda kwisi ya civumbe ngeci ciwe. 16Muje mu nganda mwakele munakazi umo wakunyanyama watambekele oku ali akamwa ya civumbe ngwendi, “Tolilileni! Tolilileni! Lekeni Yowave aije kuno, njishaka kwendeka nendi.” 17Ngecivene, Yowave waile, co uje munakazi wamwihwile ngwendi, “Yove Yowave ndi?”
Yowave wamukumbulwile ngwendi, “Eyo, yange vene.”
Munakazi wamulekele ngwendi, “Njitolilileni, shukulu.”
Yowave wamukumbulwile ngwendi, “Njinakutolilila.”
18Co munakazi wendekele ngwendi, “Laja vakele nakwendeka ngwavo, ‘Ya ukehule mana mu nganda ya Avele!’ Co mukemwo muvakele nakulinga vene. 19Nganda yetu yapwa yakama, vanu vamwo vapwa va kwoloka na kulongwa mu Isalele. Omwo vikajo ushaka kuyinyongesa? Kuma yove ushaka kuviisa vushwana vwa Shukulu Kalunga ndi?”
20Co Yowave wamukumbulwile ngwendi, “Kesi mukemwo embwe! Kunjasa kuviisa nambe kunyongesa nganda yeni! 21Ovu kesi vukevwo vutumbe vwetu embwe. Tunakatukila munalume umo vatumbula Shemba muna Mbikile, natundu ku lifuti lya malundu lya Efalime, ikeye washangumukile kutengulukila Mwene Ndaviti. Muneneni ou munu, co njikatunda muno mu nganda.”
Uje munakazi wendekele ngwendi, “Tukakumbilila mutwe wendi akamwa ya civumbe.” 22Asinoni waile kuli vanu va muje mu nganda na vutumbe vwendi, co vatapele mutwe wa Shemba vaumbilile akamwa ya civumbe kuli Yowave. Co Yowave wembile lupembo lwa cizivukiso kuli vanu vendi ngeci vatunde muje mu nganda, co velukile kwimbo. Yowave nendi lalo welukile ku Yelusalema kuli mwene.
Vamyata va Ndaviti
23Yowave wapwile muka-kushika mashwalale voshe va mu Isalele, Mbenaya muna Yehoyanda wapwile mukulunu wa vaka-kunyunga Ndaviti, 24Andonilame wapwile mukulunu wa vaka-kupanga vipangi vya mavoko, Njosefati muna Ahilunde wapwile mukulunu wa vaka-kusoneka mizimbu, 25Sheva wapwile muka-kusoneka mu mbanja, Zandoke na Aviyatale vapwile vaka-kukombelela, 26co Ila wa ku nganda ya Njaile nendi lalo wapwile umo wa vaka-kukombelela va Ndaviti.
The Bible in Mbunda ©The Bible Society of Zambia, 2006