2 Samwele 19
19
Yowave endekela Ndaviti
1Yowave vamulekele ngwavo Mwene Ndaviti alinakulila, co ali na vusiwa manene omwo Avisalome. 2Co a litangwa lije kujolela omwo kuhyana kwatengulukile vusiwa kuli mashwalale voshe va Ndaviti, omwo vazivile ngeci mwene alinakulila munendi. 3Co velukile mu nganda volokele kuluu, ngwe mashwalale vaje vali na shwamwa omwo vanatewe ku nzita. 4Mwene walifwikile ku cihanga cendi walilile manene ngwendi, “Kekange munange! Munange Avisalome! Avisalome munange!”
5Co Yowave waile ku njuvo ya mwene wendekele kuli ikeye ngwendi, “Ku litangwa lya lelo unazivisa manene vanu vove shwamwa, vanu ava vanamena mwonyo wove na myonyo ya vana vove va vanalume na ava va vanakazi, na vanakazi vove, na mashano vove va mbanja. 6Unashaula ava vakuzema nakusingimika ava vakuzinda! Eci cinasholoka ngeci vamyata vove, na vanu, vanapu vangoco kuli yove. Njinamono ngeci yove unesi kuvwaelela nga Avisalome kayoya ku litangwa lya lelo, co yetu voshe kutwatsa. 7Ololo ya ukatakamese vanu vove. Njilisinga mu lizina lya Shukulu Kalunga ngeci nga kuulingimo, co imene mutondo-tondo naumo wai akakala nove. Co ovu vukapwa vukalu vwakama manene kutuvakana vuje vuunakala nakuyanda navwo mukuyoya kwove kwoshe.” 8Co mwene wakatukile, waile wakatumbamene kuyehi na cikolo ca nganda. Co vanu vendi vazivile ngwavo ali kuje, co voshe vezile vakungulukile kuli ikeye.
Ndaviti eluka ku Yelusalema
A simbu ije, vaIsalele voshe vatewele, munu na munu waile kwimbo lyendi. 9Co vanu voshe va mu lifuti valijokotesele akati kavo. Valyendekesele umo na mukwavo ngwavo “Mwene Ndaviti watuyoyesele ku vitozi vetu. Ikeye watupatwile kuli vaFilisitiya, co ololo natewa kuli Avisalome naseza lifuti. 10Twavwavesele mazi Avisalome nakumupwisa mwene, oloni vanamutsiila mu nzita. Ngecivene, omwo vikajo kukwesi munu elwise Mwene Ndaviti?”
11Co vin̄anda vije vakele nakwendeka vaIsalele vyetele kuli Mwene Ndaviti. Ngecivene, watumine Zandoke na Aviyatale vaka-kukombelela kukehula vantwama va ku Yunda ngwavo, “Omwo vikajo yeni munapu vakumanesela akukwasa kwilwisila mwene mu lipela lyendi? 12Yeni munapu vavushoko vwange, tunapu muvila umo na maninga amo, co omwo vikajo mupwa vakumaneselako kuya nakukanjishaka?” 13Ndaviti wavalekele lalo vendekele kuli Amasa ngwavo, “Yove unapu kavushoko kange. Kutunda ku ololo njikakupwisa mukulunu wa mashwalale kwinga mu mwela wa Yowave. Nga kunjilisingimo, co Njambi anjihise njitse!” 14Co majwi a Ndaviti akokele vimbunge vya vanu voshe va mu Yunda, co vamutuminine majwi ngeci eluke na vamyata vendi voshe.
15Omo mwene welukile, vamusheshele vanu voshe va mu Yunda ku Ndonga ya Yondau, vaje vatundile ku Ngilingale kwija nakumujavwisa ndonga. 16#2 Sam 16:5-13 A simbu ije vene, Shimei kaMbenjemani muna Ngela wa ku Mbahulime wazambwilile ku Yondau nakushesha Mwene Ndaviti. 17Wezile na vanalume 1,000 va ku muyati wa Mbenjemani. Na Ziva, ngamba ya vaka-naanga ya Saulu lalo, wezile na vana vendi likumi na vatanu, na vangamba makumi avali, vakevo valivangele kweta omo mwene kanda acete. 18Co vajavukilile a myava nakujavwisa vanu va mwene nakulinga vyoshe vije vyashakele mwene.
Ndaviti azivila ngozi Shimei
Omo mwene walivwaeselele ngeci ajavuke, co Shimei watsikamene asi ku mesho a mwene, 19wendekele ngwendi, “Shukulu kalombo, njisambese ku vuvi vuje vunjalingile a litangwa lije watundile mu Yelusalema. Kesi ukale na likiti-kiti nange nambe kuvuyongola lalo. 20Njazivuka, shukulu, ngwange njaviisa, mukemwo njinapu wakulivanga kutunda ku miyati ya ku kunto kwija nakukushesha yove Shukulu ku litangwa lya lelo.”
21Avishai muna Zeluya wendekele ngwendi, “Shimei napande kutsa omwo ikeye wasingile uje yaangwile Shukulu Kalunga kupwa mwene.”
22Oloni Ndaviti wendekele kuli Avishai na ndolome yendi Yowave ngwendi, “Iyajo nehula viyongola vyeni? Kuma yeni mushaka kunjaka mu vukalu ndi? Ololo yange njinapu mwene wa vaIsalele, co kukwesi lalo kaIsalele ivakatsiya ku litangwa lya lelo wai.” 23Co Ndaviti wendekele kuli Shimei ngwendi, “Njendeka nakukukulaesa ngwange kuukatsi.”
Ndaviti azivila ngozi Mefimboshete
24 #
2 Sam 9:1-13; 16:1-4 Asinoni Mefimboshete, mutekulu wa Saulu, wezile nakushesha mwene. Ikeye kajwelele ku mendi endi, nambe kuteula munjezi wendi, nambe kukusha vuzalo vwendi kutunda a simbu ije mwene watundile mu Yelusalema noo welukile nakushwana. 25Omo Mefimboshete watundile ku Yelusalema kwija nakushesha mwene, co mwene wendekele kuli ikeye ngwendi, “Mefimboshete, omwo vika kuwaile nange?”
26Mefimboshete wamukumbulwile ngwendi, “Shukulu, ngwe muuzivukila, yange njapwa nji cilema. Njalekele ngamba yange ngwange anjivwaesele cimulu cange ngeci njilondeo njiye nove, oloni ikeye wanjikwisile. 27Ikeye wanjikutiiye vya makuli kuli yove shukulu, oloni yove wafwa ngwe kangelo ka Njambi, ngecivene, linga vyoshe vije vinapu vyavivwa kuli yove. 28Voshe va ka naanga ya tate vapandele kuvatsiya kuli yove shukulu, oloni yange wanjitavesele kulya ku mesa yove. Co ololo kunjesi na nzili yakulomba lalo vuvwa kuli yove shukulu.”
29Mwene wamukumbulwile ngwendi, “Kesi wendeke lalo vyavingi. Njavwaesa laja ngeci yove na Ziva mulipangele vufuko vwa Saulu.”
30Mefimboshete wamukumbulwile ngwendi, “Taveni ngeci vyoshe vipwe vya Ziva. Yange njapwisamo omo shukulu neluka mwamuvwa mu nganda.”
Ndaviti azivila ngozi Mbazilai
31 #
2 Sam 17:27-29
Mbazilai, kaNgilyande, nendi wezile kutunda ku Longelime nakujavwisa mwene Ndonga Yondau. 32Mbazilai wapwile kakulukazi, wa myaka makumi atanu na atatu. Ikeye wafukile manene, co wakwasele mwene vyakulya omo mwene wakele ku Mahanaime. 33Mwene wendekele kuli ikeye ngwendi, “Tuye amo nange ku Yelusalema, co njikakunyunga.”
34Oloni Mbazilai wamukumbulwile ngwendi, “Kunjiyoyo lalo simbu yakama, omwo vikajo njiila na shukulu ku Yelusalema? 35Yange lajoko njili na myaka makumi atanu na atatu, co kunjesi lalo na senga. Kunjasa kuziva vyakulya indi vitovala nambe vyakunwa, co kunjasa kuziva majwi a vaka-kwimba. Njikakuyandesa ngoco shukulu. 36Yange kunjishaka cikandelela cangacije embwe. Ngecivene, njikakusindikiyako lika kamandondo musambwa ya Yondau. 37Co ukanjitava njiiluke kwimbo njikatsile kuyehi na vimbumbo vya visemi vange. Munange Cimehame ou, ikeye akakupangela, ya nendi, shukulu, ngeci akakukwase ngwe ku viyongola vyove.” 38Mwene wamukumbulwile ngwendi, “Njikaya nendi njikamulingila vyoshe viwushaka. Co njikakulingila cuma coshe ciwulomba.” 39Asinoni Ndaviti na vanu vendi voshe vajavukile Ndonga ya Yondau. Co watsembele Mbazilai wamuvezikisile, asinoni Mbazilai welukile kwimbo lyavo.
Yunda na Isalele valizungila mwene
40Omo mwene najavuka laja, vanalume va mu Yunda voshe na litambelo lya vanalume va mu Isalele vamusindikiiye, waile ku Ngilingale, co Cimehame waile amo nendi. 41VaIsalele voshe vaile kuli mwene nakwendeka kuli ikeye ngwavo, “Shukulu, omwo vikajo vandolome vetu, vanu va ku Yunda, vakwambatele nakukujavwisa Yondau, na naanga yove, na vanu vove?”
42Co vanalume va ku Yunda vakumbulwile ngwavo, “Tunalingi eci omwo mwene wapwa kavushoko ketu wa a mbunge. Cooni cuma mukajo camiluvalesa? Yetu kutwalile vyakulya vya mwene, nambe mwene katwanene cuma cimo embwe.”
43Co vaIsalele vakumbulwile vanalume va ku Yunda ngwavo, “Tuli na mitambela likumi muli mwene kutuvakana yeni, omwo vikajo munatushawila ngeci? Kesi yetu vakulivanga kusimutwiya vyakwiluka kwa mwene ndi?”
Oloni vanalume va ku Yunda vapangesele majwi a vukalu manene kutuvakana majwi a vanalume va Isalele.
The Bible in Mbunda ©The Bible Society of Zambia, 2006