2 Samwele 18
18
Avisalome vamufungulula nakumutsiya
1Mwene Ndaviti wakungulwile vanu vendi voshe amolika, co wavaangunwine mu vimbunga vya vanu 1,000 na vimbunga vya vanu 100, co waakele vamyata kupwa vaka-kuvashika. 2Asinoni wavatumine mu vimbunga vitatu, amo na Yowave, na Avishai ndolome ya Yowave, na Itai wa ku Ngate, co umo na umo wapwile muka-kushika wa mbunga imo. Co mwene wendekele kuli vanu vendi ngwendi, “Nange njiya neni amolika.”
3Co vamukumbulwile ngwavo, “Yove kuwapandele kuya amo netu embwe. Citozi kesi kwangula, nga yetu tukatewa kuvakombuko mbunge nambe nga litambelo lya vanu vetu vakavatsiya kuvakombuko mbunge, oloni yove uli na seo kuli yetu kutuvakana yetu 10,000. Mwamuvwa nga yove usala muno mu nganda nakututumina vukwaso.”
4Co mwene wakumbulwile ngwendi, “Mwoshe mumunayongola munapu mwamuvwa mukemwo munjikalinga.” Mwene wemanene kumukulo wa cikolo omo vanu vendi vakele nakutuuka mu vimbunga vya vanu 1,000 na vimbunga vya vanu 100. 5Ngecivene, mwene washikile Yowave, na Avishai, na Itai ngwendi, “Omwo ali yange, kesi mukavulumune owo mukwenje Avisalome.” Co Mashwalale voshe vazivileko omo Ndaviti washikile vamyata vendi.
6Mashwalale va Ndaviti vaile nakulwisa vaIsalele mu shwata ya Efalime. 7VaIsalele vavafungulwile kuli mashwalale va Ndaviti, kwapwile kufungulula kwakukalu manene, co a litangwa lije, vanu vakupwa 20,000 vatsile. 8Nzita yakele mu lifuti mwoshe, vanu vavangi vatsililile mu shwata kutuvakana vaje vavatsiilile mu nzita.
9Co kukasumuka, Avisalome waliwanene na vanu vamo va Ndaviti. Avisalome walondele a kavalu, co omo wakele nakwita mwisi ya muti wakama wa oke wakulifwa ngwe musivi, mutwe wendi wasakamenene mu minango. Co kavalu watewele, oloni Avisalome wasalele alinakujenjela a mukambwila. 10Umo wa vanu va Ndaviti wamumwene, co walekele Yowave ngwendi, “Shukulu, njinamono Avisalome alinakujenjela ku muti wa oke!”
11Yowave wamukumbulwile ngwendi, “Nga unamumono, co omwo vikajo kuwamutsiile a simbu ije vene? Nga njinakwana mavundungulu likumi a siliva na mwiva.”
12Oloni uje munalume wamukumbulwile ngwendi, “Nameme nga unjana mavundungulu 1,000 a siliva, nga kunjasa kujundula livoko lyange ali muna mwene. Yetu voshe twazivileko omo mwene washikile yove, na Avishai, na Itai, ngwendi, ‘Omwo ali yange, kesi mukavulumune owo mukwenje Avisalome.’ 13Oloni nga kunjononokele mwene, co njitsiya Avisalome, nga mwene nakaviziva, omwo kukwesi vyakushweka kuli mwene, yove kuukanjamena embwe.”
14Co Yowave wendekele ngwendi, “Kunjasa kuviisa simbu yange yakwendeka nove.” Ngecivene, wanonele makunga atatu waativile a nulo ya Avisalome oku acili nakuyoya, oku ajenjela ku muti wa oke. 15Asinoni mashwalale va Yowave vakupwa likumi vazengelekele Avisalome, co vamutsulile.
16Yowave washikile vaimbe lupembo lwakumanesa nzita, co mashwalale valikelele kusheka vaIsalele. 17Asinoni vambatele civimbi ca Avisalome, vacumbilile mu mbulu yakulova mu shwata, valundikileo mutumbo wakama wa mamanya. Co vaIsalele voshe vatewele, vaile ku membo avo.
18Omo Avisalome wakele nakuyoya, walitungilile limanya lya canukiso cendi vavenya mu Cana ca Mwene, omwo ikeye kakele na mwana wakushwana lizina lyendi.#18:18 OMWO IKEYE KAKELE NA MWANA WAKUSHWANA LIZINA LYENDI: Omwo vana vendi va vanalume vatsile omo te kanda vacikole. Ngecivene, walukile limanya lije lizina lyendi, na ku litangwa lya lelo vacili nakulitumbula ngwavo Limanya lya Avisalome.
Ndaviti vamuleka nzimbu ya Avisalome
19Asinoni Ahimaza muna Zandoke wendekele kuli Yowave ngwendi, “Njitave njishatukile kuli mwene njikamuleke muzimbu wauvwa, ngwange Shukulu Kalunga nakwamena ku vitozi vove.”
20Co Yowave wamukumbulwile ngwendi, “Embwe, lelo kuwasa kutwala muzimbu wauvwa, ukalinga eci ku litangwa lyeka, oloni kesi lelo embwe, omwo muna mwene natsi.” 21Asinoni Yowave wendekele kuli ndungo yendi kaSundane ngwendi, “Ya ukaleke mwene evi viwunamono.” Uje ndungo wakandelelele, co waile nakushatuka.
22Ahimaza welukilile lalo kuli Yowave ngwendi, “Kunjesi na mulonga a vyoshe vije vikalingiwa, nange njitave njikaleke mwene muzimbu ou.”
Yowave wamwihwile ngwendi, “Omwo vika ushakela kutwala muzimbu ou, munange? Kuukawanao cikandelela cai.”
23Ahimaza wendekele ngwendi, “Vyoshe vilingiwa vilingiwe ngano, yange njishaka lika kuya.”
Co Yowave wendekele ngwendi, “Unapande kuya.” Ngecivene, Ahimaza waile nakushatuka washelumukile ku ngila yakwita mu Cana ca Yondau, co vwasi-vwasi watuvakanene uje ndungo. 24Ndaviti watumbamene ku mwela uje wakele mukati ka vikolo vivali, cimo cakukovelela, cikwavo cakutuukila mu nganda. Co muka-kunyunga walondele akamwa ya civumbe, wemanene akamwa ya cikolo ca ciluli, wakengele noku-noku, wamwene munu endi lika alinakwija nakushatuka. 25Co uje muka-kunyunga watambekele nakuleka mwene, co mwene wendekele ngwendi, “Nga ikeye ali endi lika, alinakwija na muzimbu wauvwa.” Co uje munu wakele nakushatuka washwenyele kuyehi.
26Co lalo uje muka-kunyunga wamwene munu endi lika alinakwija nakushatuka, co wasanene uje muka-kunyunga ku cikolo ngwendi, “Kenga! Kulinakwija munu mukwavo lalo alinakushatuka!”
Mwene wamukumbulwile ngwendi, “Nou lalo alinakwija na muzimbu wauvwa.”
27Uje muka-kunyunga wendekele ngwendi, “Njamona mwali nakushatukilamo ou munu wakulivanga, ngwe mwakashatuka Ahimaza.”
Mwene wamukumbulwile ngwendi, “Ikeye napu munu wamuvwa, alinakwija na muzimbu wauvwa.”
28Co Ahimaza watambekele lijwi lyakukandelela mwene, walyumbilile asi ku mesho a mwene, wendekele ngwendi, “Shangazala Shukulu Kalunga Njambi yove, ou nakwana nzili yakufungulula vanu vaje vakutengulukilile shukulu nakukulwisa!”
29Co mwene wehwile ngwendi, “Vati mukwenje Avisalome alimwamuvwa ndi?”
Ahimaza wakumbulwile ngwendi, “Shukulu, omo mwata wove Yowave nanjitumine, njazivile muyoyo wakama manene, oloni kunjazivukile indi wapwile wavika.”
30Co mwene wamulekele ngwendi, “Imana tai okwo,” co waile nakwimana kuje.
31Co ndungo wa kaSundane nendi lalo wetele walekele mwene ngwendi, “Njili na muzimbu wove wauvwa shukulu! Ku litangwa lya lelo Shukulu Kalunga nakwana nzili yakufungulula voshe vaje vakutengulukilile nakukulwisa!”
32Mwene wehwile ngwendi, “Vati mukwenje Avisalome alimwamuvwa ndi?”
Uje ndungo wamukumbulwile ngwendi, “Njishaka ngeci eci calingiwile kuli ikeye, cikalingiwa lalo kuli vitozi vove voshe shukulu, na kuli voshe vaje vakutengulukilile nakukulwisa.”
33Co mwene wakele na vusiwa manene. Walondele ku mulili wa akamwa ya cikolo, co walilile. Waile nakulila, nakutambekela ngwendi, “Kekange munange! Munange Avisalome! Avisalome munange! Cinapandele nga yange kunjatsa kwinga mu mwela wove, kekange munange! Avisalome munange!”
The Bible in Mbunda ©The Bible Society of Zambia, 2006