2 Samwele 17
17
Hushai atanganesa Avisalome
1Kukwetile simbu yakama, omo Ahitofele wendekele kuli Avisalome ngwendi, “Njitave njangule vanalume 12,000, vutsiki vuno njikavangeye Ndaviti. 2Njikamulwise simbu najuka, co njikamujujwisa na lyova, vanu vendi voshe vakatewa. Co njikatsiya lika mwene, 3asinoni njikelwisa vanu vendi voshe kuli yove, ngwe shombolwa eluka kuli munalume wendi. Yove ushaka kutsiya lika munu umo, co voshe vakasalao vakakala mwamuvwa.” 4Kunangula oku kwasholokele kwakuvwa manene kuli Avisalome na kuli vantwama va Isalele voshe.
5Co Avisalome wendekele ngwendi, “Ololo saneni Hushai, co tuzive omo endeka.” 6Omo Hushai wetele, Avisalome wendekele kuli ikeye ngwendi, “Ahitofele natunangula mu ngila eyi, co twasa kukavamo ndi? Nga kesi mukemwo, co tuleke vati tulinga.”
7Ngecivene, Hushai wamukumbulwile ngwendi, “Kunangula oku kwanaminangula Ahitofele kesi kwakuvwa embwe. 8Yove wazivuka ngeci isho Ndaviti na vanu vendi vapwa vaka-kulwa va nzili, co lalo vakevo vatewesa manene ngwe mbeya#17:8 MBEYA: Mbeya wapwa kasitu wakama wa nzili manene wakulifwa ngwe ndumba. uvanevila vana vendi mu civulili. Isho wapwa lishwalale wamukalu, vutsiki kesi kukala amo na vanu vendi. 9A simbu ino vene amo navanda mu linzenzengoma nambe ku mutambela ukwavo. Omo Ndaviti alwisa vanu vove, co woshe akazivako akendeka ngwendi vanu vove vanavafungulula. 10Co nameme vanalume vakusimpa, vaje kuvesi na lyova ngwe vindumba, vakakala na lyova omwo munu woshe mu Isalele nazivuka ngeci isho wapwa lishwalale wamukalu, na vanu vendi vaka-kulwa manene. 11Kunangula kwange kunapu oku, kungulula vaIsalele voshe uvake amo kutunda ku shongo imo ya lifuti, kweta ku shongo ikwavo, vapwe vavangi ngwe lishen̄avu lya ku ngenge ya mema a kalunga, co yove vavenya vene uvatwamenene mu nzita. 12Co tukawana Ndaviti kwoshe kuje kwali, co tukamulwisa simbu kanda azivuke vika vilingiwa. Naumo wai akasalao nambe ikeye nambe vanu vendi. 13Nga ikeye akatewela mu nganda, co vanu vetu voshe vakanena mikole, co tukamukokela mu cana. Co kukukasala lalo limanya limo akamwa ya lilundu.”
14Avisalome na vaIsalele voshe vendekele ngwavo, “Kunangula kwa Hushai kunapu kwakuvwa manene kutuvakana kunangula kwa Ahitofele.” Shukulu Kalunga wavwaesele ngeci kunangula kwakuvwa kwa Ahitofele kesi vacikave, ngeci vukalu vukaije ali Avisalome.
Ndaviti ananguka, co atewa
15Ngecivene, Hushai walekele Zandoke na Aviyatale vaka-kukombelela, kunangula kuje kwanangwile Avisalome na vantwama va Isalele, co nakunangula kuje kwanangwile Ahitofele. 16Co Hushai wendekele lalo ngwendi, “Zambulako ololo! Tuma munu kuli Ndaviti ngeci kesi akalale lalo vutsiki a myava ya mu mambo embwe, oloni akajavuke vwasi Yondau, ngeci ikeye na vanu vendi voshe kesi vakavakwate nakuvatsiya.”
17Yonatana muna Aviyatale na Ahimaza muna Zandoke vavandamenene ku lisima lya kavwelu-vwelu lya Enelongele, anja ya Yelusalema, co ngamba wa munakazi wakele nakuyako nakuvanangula vije vilinakulingiwa, ngeci vakevo vaye nakulekako Mwene Ndaviti omwo kuvapandele kuvamona vakovela mu nganda. 18Oloni nameme ngoco mukwenje umo wavamwene, walekele Avisalome, ngecivene, Yonatana na Ahimaza vazambwile kukavanda mu njuvo ya munalume umo wa ku Mbahulime. Ikeye wakele na lisima kuyehi na njuvo yendi, co vakovelelemo. 19Co munakazi wa uje munalume wanonele cifwiko, nakufwika ku lisima, washandeleo vimbuto, co naumo wai wazivukile cuma cimo. 20Vamyata va Avisalome vezile ku njuvo nakwihula uje munakazi ngwavo, “Ahimaza na Yonatana vali kuli?”
Co wavakumbulwile ngwendi, “Vanajavuka laja ndonga.”
Co vaje vanu vavashakezekele oloni kuvavawanene, ngeci velukile ku Yelusalema. 21Co omo vanai laja, co Ahimaza na Yonatana vatuukile mu lisima, vaile nakwambulula kuli Mwene Ndaviti. Vamulekele vutumbe vwa Ahitofele vwakumulwisa, vendekele ngwavo, “Zambula ujavuke ndonga.” 22Ngecivene, Ndaviti na vanu vendi vashangumukile kujavuka Yondau, omo litangwa lyatuukile, lajoko vanajavuka.
23Omo Ahitofele wamwene ngeci kuvakavele kunangula kwendi, walondele a cimulu cendi welukile kwimbo lyendi. Omo wamanesele kuvwaesa vyendi vyoshe, walishukikile ikeye vavenya. Vamutsindile mu mbumbo ya naanga yendi.
24Ndaviti wetele ku nganda ya Mahanaime, a simbu ije Avisalome na vaIsalele vanajavuka laja Yondau. 25(Avisalome wengisile Amasa mu mwela wa Yowave kupwa muka-kushika nzita. Amasa wapwile muna Njetela kaIshimela. Vaina Avingaile, muna Nahashe ndokazi ya Zeluya vaina ya Yowave.) 26Avisalome na vanu vendi vatungile cilombo cavo mu lifuti lya Ngilyande.
27Omo Ndaviti wetele ku Mahanaime, waliwanene na Shovi muna Nahashe, wa ku nganda ya Lamba mu Amoni, na Makile muna Amiyele, wa ku Londembale, na Mbazilai, wa ku Longelime mu Ngilyande. 28Vanenele malonga, na vindeo vya vuma, na tumbilititi, na tiliku, na mbale ya maumwa, na vunga, na makasha-kasha a vimbuto, na makunde, na vyelu vyakasheke, 29na vuki, na mavele, na vimanga, na mavele akutunda ku vingombe. Vavinenele kuli Ndaviti na vanu vendi ngeci valye, omwo vayongwele ngwavo, “Vanu vanajuka vali na njala na lihwila mu mambo.”
The Bible in Mbunda ©The Bible Society of Zambia, 2006