2 Vimyene 19
19
Mwene alomba Isaya kumunangula
(Isa 37:1-7)
1Omo Mwene Hezekiya wazivile muzimbu wavo, watavozwele vuzalo vwendi mukuviilila, co wazalele cikeleya, waile ku Njuvo ya Shukulu Kalunga. 2Watumine Elyakime, mwata wa ku lipela na Shevana muka-kusoneka wa mu mbanja na vaka-kukombelela va vakulunu kuli Isaya muka-kwimanena muna Amoze. Navo lalo vazalele vikeleya. 3Awa akewo majwi avalekele Hezekiya ngeci vaambulule kuli Isaya ngwavo, “Litangwa lya lelo linapu litangwa lya tuyando, vanatuhisa, co tuli mu vusiwa. Tunalifu na munakazi uje ashaka kukita, oloni kesi na nzili yakukita. 4Mwene wa vaAsilya natumu Lambashake mwata wendi wakama kushaula Njambi wakuyoya. Shukulu Kalunga Njambi yove azive kushaula oku nakuhisa vaje vanendekelemo. Ngecivene, lombela kuli Njambi ali vanu vetu vaje vacili nakuyoya.”
5Omo Isaya watambwile majwi awa kuli Mwene Hezekiya, 6co wamukumbulwile ngwendi, “Shukulu Kalunga nakuleke ngwendi kesi utave vaAsilya vakutewese na lingwavo lyavo ngeci ikeye kasa kumyamena embwe. 7Shukulu Kalunga akazivisa mwene lingwavo lije likamwilwisila kwimbo lyavo, co Shukulu Kalunga akamutsiila kuje vene.”
VaAsilya valishungwiya lalo
(Isa 37:8-20)
8Lambashake mwata wa vaAsilya welukile, co wawanene ngeci mwene natundu ku Lakishe, alinakulwa na nganda ya muyehi ya Limbena, ngecivene, waile kuje nakumwihula. 9Lijwi lyetele kuli vaAsilya ngeci nzita ya vaka-Ingito, ije yatwamenenene Mwene Tilehaka wa ku Sundane, yakele nakwija nakuvalwisa. Omo mwene wazivile evi, co watumine mukanda kuli Mwene Hezekiya wa mu Yunda, 10wamulekele ngwendi, “Uje njambi iwakulaela nakuleke ngwendi kunjasa kukufungulula, oloni kesi ukulaele vyuma evi embwe. 11Unazivi laja vyakalingi mwene wa vaAsilya ku lifuti lyoshe lije lyanayongola kunyongesa. Kuma yove wayongola ngeci wasa kutewa ndi? 12Vakukulwila vange vanyongesele vinganda vya Ngozane na Halane na Lezefe, co vatsiile vanu va ku Mbetendene vaje vakele mu Telasale, njambi yavo naumo wai wavamenene. 13Vali kulijo vimyene va vinganda vya Hamate na Alepande na Sefalevaime na Hena na Ivaha?”
14Mwene Hezekiya watambwile uje mukanda kuli vaje miluwa, co waulavele. Asinoni waile ku Njuvo ya Shukulu Kalunga, co waakele uje mukanda kulutwe lwa Shukulu Kalunga, 15#Kut 25:22 co walombelele ngwendi, “Shukulu Kalunga, Njambi ya Isalele, yove watumbama akamwa ya vakelumbi va mambava, yove lika wapwa Njambi, yove washwana vumwene vwoshe vwa mu kaye. Yove watangele kaye na lilu. 16Ololo Shukulu Kalunga, kenga a vyuma evi vilinakulingiwa kuli yetu, tolilila ku vyuma vyoshe vije vyalinakwendeka Senakelivi vyakushaula yove Njambi wakuyoya. 17Shukulu Kalunga, yetu voshe twazivuka ngeci vimyene vaAsilya vananyongesa miyati yaingi, co vanapwisa mafuti avo vingundu, 18vanenyeka vinjambi vavo, vaje kuvapwile vinjambi va vushunga, oloni vifwa lika vya viti na mamanya vije valingile na mavoko a vanu. 19Ololo, Shukulu Kalunga Njambi yetu, twamene ku movoko a vaAsilya, ngeci miyati yoshe ya mu kaye vazivuke ngeci yove lika Shukulu Kalunga, wapwa Njambi.”
Majwi a Isaya kuli mwene
(Isa 37:21-38)
20Asinoni Isaya watumine majwi akuleka Mwene Hezekiya akukumbulula ku lilombelo lya mwene ngwendi 21Shukulu Kalunga nendeka ngwendi,
“Nganda ya Yelusalema inakuzindi,
co ilinakukujola yove Senakelivi.
22Yove unayongola ngwove
iyajo iwunashaula nakuyeluwisa?
Yove unanjizivisa shwamwa yange
Njambi ya Isalele wakujela.
23Yove watumine miluwa vove
nakulishasha kuli yange
ngwove na matemba ove oshe,
wafungulwile minkinda yailaja
ya Lembanone. Walishashele ngeci
yove washinjile miti yailaja ya kendale,
na miti yaivwa ya sipelese,
co ngwove waketele ku vishwata vyakuzika manene.
24Lalo walishashele ngwove
wendile masima, co wanwile mema
a mu mafuti a vaka-kwija,
lalo ngwove mendi a mashwalale vove
alyatangelele mu Ndonga ya Nailo
nakuyumisa cau.
25“Kuma kuwazivile ngeci yange Kalunga
njayongwele laja vutumbe ovu ndi?
Co ololo njinavusholola.
Njakwanene nzili yakutengulula
vinganda vya vimpaka kuvipwisa
mitumbo ya vishwashwa.
26Vanu vakelemo kuvakele na nzili,
oloni vazeyele nakuziva lyova.
Vafwile ngwe mwila wa mu lihya
nambe ngwe shaku yakukolela
a ciluli ca njuvo,
co ipekumuka na lihunzi
lyakutundilila mu ngangela.
27“Oloni njazivuka kalesi yove,
na vije viwukalingi na kuje kuukai.
Njazivuka nomu muukanjilwisila.
28Njatambula laja muzimbu wakuluvala kwove,
na kulyalesa kwove,
co njikakumwesa ngeci yange njapwa iya,
omwo njikakutwala kwoshe kuje njishaka.”
29“Eci cikeco cimweso ca vije vikasholoka.
Mwaka uno na mungolosika,
mukalya lika vimbuto vyakulimenena mu shwata,
oloni mungolosikulula mukalima tiliku nakuyiteja,
co mukakuna mikolovozi ya vushuka vwa vinyu,
nakulya vushuka vwakwo.
30Co vaje vakasala mu Yunda vakayoya mwamuvwa,
ngwe vimena vije vitwala mizi yavyo manene mu livu,
co viima vushuka.
31Mu Yelusalema mukakala vanu,
co a Munkinda wa Siyone akakala vaje vanovoka,
omwo Shukulu Kalunga nayongola vyuma evi ngeci visholoke.”
32“Omu mukemwo mwanendeka Shukulu Kalunga ali mwene wa vaAsilya ngwendi,
‘Kakakovela mu nganda eyi,
nambe kwashamo mukili umo embwe.
Kukwesi mashwalale vali na vintelo
vakaija kuyehi na nganda eyi,
nambe kuzengelekako cimpaka.
33Ikeye akeluka lalo mu ngila ije yezililile,
kujeneka kukovela mu nganda.
Yange Kalunga, njinendekamo.
34Njikamena nganda eyi nakuyinyunga,
omwo lizina lyange,
na omwo cikulaeso njalingile
kuli ngamba yange Ndaviti.’ ”
35Co vutsiki vuje vene kangelo ka Shukulu Kalunga waile ku cilombo ca vaAsilya, watsiile mashwalale vakupwa 185,000. Co alikaki mutondo, vavawanene voshe vanatsi! 36Asinoni Senakelivi mwene wa vaAsilya watundileko, welukile ku Nenevayi. 37A litangwa limo, omo wakele nakulemesa mu njuvo ya njambi yendi Nisoloke, vana vendi vavali va vanalume, Andalameleke na Shalezele, vamutsiile na mikwale yavo, co vatewelele ku lifuti lya Alalate. Munendi Esalehandone wamushwanene kupwa mwene.
The Bible in Mbunda ©The Bible Society of Zambia, 2006