2 Vimyene 20
20
Mushongo wa Mwene Hezekiya nakwinduka kwendi
(Isa 38:1-8, 21-22; 2 Miz 32:24-26)
1A matangwa aje Mwene Hezekiya wavinjile, co washakele kutsa. Isaya muka-kwimanena muna Amoze waileko nakukamumona, co wendekele kuli ikeye ngwendi, “Shukulu Kalunga nendeka ngwendi vwaesa mwamuvwa vyuma vyoshe, omwo kuwinduka embwe, oloni utsa. ” 2Hezekiya wakengesele cihanga cendi ku civumbe, co walombelele ngwendi, 3“Shukulu Kalunga, anuka ngeci yange njakupangela nakukukulaela na kulongwa, simbu yoshe njinakele nakulinga vije viwashakele ngeci njivilinge.” Co walilile manene.
4Co Isaya watundile kuli mwene, oloni omo simbu kanda acete mukati ka mbanja ya lipela, Shukulu Kalunga wamulekele ngwendi, 5“Iluka lalo kuli Hezekiya muka-kushwana vanu vange, co endeka kuli ikeye ngwove, ‘Yange Kalunga, Njambi ya kukulwila yove Ndaviti, njinazivi lilombelo lyove, co njamono misozi yove. Njikakukangwisa, omo kuneti matangwa atatu ukaya ku Njuvo yange. 6Njikawezelela myaka likumi na itanu kukuyoya kwove. Njikakwamena yove na nganda eyi ya Yelusalema kuli mwene wa Asilya. Njikamena nganda eyi, omwo lizina lyange na omwo cikulaeso njalingile kuli ngamba yange Ndaviti.’ ”
7Asinoni Isaya walekele tutumwa twa mwene kwaka likende lya mukuyu a lizimbo, ngeci enduke. 8Co Mwene Hezekiya wehwile ngwendi, “Cimweso mukajo cikamwesa ngeci Shukulu Kalunga akanjikangwisa, omo kuneti matangwa atatu, ngeci njase kuya ku Njuvo ya Shukulu Kalunga?”
9Isaya wamukumbulwile ngwendi, “Shukulu Kalunga akakwana cimweso cakumwesa ngeci ikeye akanyunga cikulaeso cendi. Co ololo, yove ushaka munzinze uye kulutwe manambo likumi indi wiluke munima manambo likumi?”
10Hezekiya wakumbulwile ngwendi, “Cacasi munzinze kuya kulutwe manambo likumi, nakwiluka lalo munima manambo likumi.”
11Isaya walombelele kuli Shukulu Kalunga, co Shukulu Kalunga welwisile munzinze munima manambo likumi a vindendelo vyatungile Mwene Ahaze.
Miluwa vakutunda ku Mbambilone
(Isa 39:1-8)
12A simbu ije vene mwene wa ku Mbambilone, Melondake Mbalandane, muna Mbalandane, wazivile ngeci Mwene Hezekiya nakele nakuvinja, co wamutumine mukanda amo na vwana. 13Hezekiya watambwile mwamuvwa vaje miluwa, co wavamwesele vufuko vwendi, siliva na ngolinde na n̄undu na mazi akunika lwengo lwaluvwa na vitwa vyoshe vya mashwalale vendi. Wavamwesele vyuma vyoshe vyakele mu milili yendi yakutulikila na mu vumwene vwendi. 14Asinoni Isaya muka-kwimanena waile kuli Mwene Hezekiya, co wamwihwile ngwendi, “Vanu ava vanatundu kulijo? Vikajo vanendeka kuli yove?”
Hezekiya wamukumbulwile ngwendi, “Vanatundu ku lifuti lya kulyala, ku Mbambilone.”
15“Vikajo vanamono mu lipela?”
Hezekiya wamukumbulwile ngwendi, “Vanamono vyuma vyoshe. Njavamwesa vyuma vyoshe vya mu milili yakutulikila.”
16Co Isaya walekele mwene ngwendi, “Shukulu Kalunga Muka-nzili yoshe nendeka ngwendi, 17#2 Vim 24:13; 2 Miz 36:10 simbu ilinakwija omo vyuma vyoshe vya mu lipela lyove, na vyuma vyoshe vije vakukulwila vove vatulikile kweta ku litangwa lya lelo, vakavitwala ku Mbambilone. Nacimo cai cikasalao. 18#2 Vim 24:14-15; Ndan 1:1-7 Vatekulwila vove vamo va a mbunge vakavatwala, co vakavapwisile vayunuke ngeci vakapange mu lipela lya mwene wa ku Mbambilone.”
19Co Mwene Hezekiya wayongwele ngwendi kukakala kwoloka na vushunga a simbu yakuyoya kwendi, co wakumbulwile ngwendi, “Lijwi wanjileke lyakutunda kuli Shukulu Kalunga linapu lyalivwa.”
Kutsa kwa Mwene Hezekiya
(2 Miz 32:32-33)
20Vyuma vyoshe vije vyalingile Mwene Hezekiya na vilinga vyendi vyakunyanyama, na muje mwendile lishali lya mema na muna ndonga ngeci vinene mema mu nganda, vyoshe vavisoneka mu Livulu lya Mizimbu ya Vimyene va mu Yunda. 21Hezekiya watsile, co munendi Manase wamushwanene kupwa mwene.
The Bible in Mbunda ©The Bible Society of Zambia, 2006