2 Vimyene 18
18
Mwene Hezekiya wa mu Yunda
(2 Miz 29:1-2, 31:1)
1Mu mwaka wamucitatu omo Hosheya muna Elahe wapwile mwene wa mu Isalele, co Hezekiya muna Ahaze wapwile mwene wa mu Yunda 2omo wakele na myaka makumi avali na itanu, washwanene mu Yelusalema myaka makumi avali na itanu na iwana. Vaina vapwile Aviya, muna Zekaliya. 3Wakavangeyeye vilinga vya kukulwila yendi Mwene Ndaviti, walingile vije vyavwaelelesele Shukulu Kalunga. 4#Kul 21:9 Watundisile mitambela ije vakele nakulemesela vaka-kujeneka kukulaela, wasiwile vimanda vya mamanya, co wavujwile vifwa vya Ashela njambi wa munakazi. Co lalo wapokwele mu vimbazuvwila linyoka wa vunengu uje yafulile Mosesa, ivatumbwile ngwavo Nehushetane. Kweta na ku simbu ije vanu va Isalele vakele nakwenyeka insense kusingimika uje linyoka. 5Hezekiya wakulaelele kuli Shukulu Kalunga, Njambi ya Isalele, co mu Yunda kumwakele lalo mwene wakufwa ngwe ikeye, nambe kunima nambe kulutwe. 6Ikeye wakulaelele kuli Shukulu Kalunga, co wamwononokele, oloni wanyungile mashiko oshe aje Shukulu Kalunga waashikile ali Mosesa. 7Ngecivene, Shukulu Kalunga wakele amo nendi, co wavezikile mu vyuma vyoshe vije vyalingile. Watengulukilile mwene wa Asilya, co kamwononokele. 8Wafungulwile vaFilisitiya, co walwisile membo avo, kutunda ku limbo lyalindondo nakweta ku nganda yakama, amo na Ngaza na membo aje azengelekele ku mutambela uje.
9Mu mwaka wamuciwana omo Hezekiya washwanene, ukewo wapwile mwaka wamucitanu na ivali washwanene Mwene Hosheya mu Isalele, Mwene Shalamanesele wa Asilya walwisile Isalele, co wazengelekele nganda ya Samaliya. 10Mu mwaka wamucitatu omo vaizengelekele, nganda ya Samaliya yawile, wapwile mwaka wamucitanu na umo wakushwana kwa Hezekiya, na mwaka wamucitanu na iwana wakushwana kwa Hosheya. 11Mwene wa vaAsilya watwalele vaIsalele ku Asilya kupwa vinzinda, co vamo wavaakele mu nganda ya Hala, vakwavo wavaakele kuyehi na Ndonga ya Hambole, ku mutambela wa Ngozane, co vakwavo wavaakele mu vinganda vya Mendiya.
12Samaliya yawile omwo vaIsalele kuvononokele Shukulu Kalunga Njambi yavo, oloni vapokwele cikumiiyo cije calikumiiye navo, co kuvononokele mashiko oshe aje avaanene Mosesa ngamba ya Shukulu Kalunga.
VaAsilya vashungwiya Yelusalema
(2 Miz 32:1-19; Isa 36:1-22)
13Mu mwaka wamulikumi na iwana omo Mwene Hezekiya washwanene, Senakelivi, mwene wa mu Asilya, walwisile vinganda vyakele mu cimpaka ca Yunda, co wavifungulwile. 14Hezekiya watumine majwi kuli Senakelivi, uje wakele mu Lakishe ngwendi, “Shukulu njaviisa, nzita yove ilikele, njikufweta vyoshe viwushaka.” Co mwene wakumbulwile ngeci Hezekiya amutumine makilo akupwa 10,000 a siliva na makilo akupwa 1,000 a ngolinde. 15Ngecivene, Hezekiya wamutuminine siliva yoshe ya mu Njuvo ya Shukulu Kalunga na vufuko vwa mu lipela, 16co lalo walamunwine ngolinde ya ku vikolo vya Njuvo ya Shukulu Kalunga na ngolinde ije yafwikile a vimanda vya Njuvo ya Shukulu Kalunga, co waitumine yoshe kuli Senakelivi. 17Co mwene wa vaAsilya watumine mbunga ya mashwalale kutunda ku Lakishe kukalwisa Hezekiya ku Yelusalema, mbunga eyi vaitwamenenene kuli vamyata vendi vatatu. Omo vetele ku Yelusalema, co vashokele ngila kuje kwakele vaka-kupanga vinanga, ku ngenge ya kandonga kaje kakele nakutuwisila mema mu kashali ka akamwa ya lilundu. 18Asinoni ije mbunga ya mashwalale vasanene Mwene Hezekiya, co ikeye wavatuminine vamyata vendi vatatu nakuliwana navo, Elyakime muna Hilikiya, wapwile mwata wa ku lipela na Shevana muka-kusoneka wa mu mbanja na Yowahe muna Asafe, muka-kunyunga vyakusoneka. 19Lambashake umo wa ali vamyata va vaAsilya wavalekele ngwendi mwene ashaka kuzivuka vika vinasimpisa Mwene Hezekiya ngacije. 20Co wehwile ngwendi, “Kuma yove unayongola ngwove wasa kuhyana nzita na majwi lika ndi? Iyajo iwunayongola ngeci akakukwasa kutengulukila Asilya? 21Yove ulinakuyongola ngeci Ingito ikukwasa, oloni eci cinapu ngwe munu apangesa lihongo kupwa mulamu, omo lipokoka, co likulengula mu livoko. Mukemwo mwanafu mwene wa Ingito omo munu ajendamena ali ikeye.”
22Uje mwata wa vaAsilya wendekele lalo ngwendi, “Amo yove unjileka ngwove unajendamena ali Shukulu Kalunga Njambi yove ndi? Hezekiya ikeye wasiwile tuzangu twakulemesela Shukulu Kalunga, amo na mitula, omo walekele vanu va mu Yunda na mu Yelusalema kukalemesela lika ku mutula wa mu Yelusalema. 23Ngecivene, njikalinga lizivasano nove mu lizina lya mwene. Njikakwana tuvalu 2,000 nga uwana vanu vavangi vakuvalonda! 24Yove kuwesi na nzili yakweseka nameme na mwata wamundondo wa Asilya, yove wakulaela vaka-Ingito kukutumina matemba na vaka-kwendela a tuvalu! 25Kuma wayongola ngwove njinalwisa lifuti lyove nakulinyongesa kwakujeneka Shukulu Kalunga kunjikwasa ndi? Shukulu Kalunga vavenya ikeye wanjilekele kulilwisa nakulinyongesa.”
26Ngecivene, Elyakime na Shevana na Yowahe valekele uje mwata ngwavo, “Endeka netu mu ndaka ya Alamaike tuziveko, kesi wendeke mu ciHevelu, omwo vanu voshe vali a civumbe valinakutolilila.”
27Co Lambashake wavakumbulwile ngwendi, “Kuma mwayongola ngweni mwene nanjitumu lika kuli yeni na kuli mwene kumileka evi vin̄anda ndi? Embwe, njilinakwendeka lalo kuli vanu ava vanatumbama a civumbe, vaje vakalya vije vitundao mwimo lyavo nakunwa mema aa mivila yavo, ngwe yeni lalo.”
28Co Lambashake wemanene watambekele mu ciHevelu ngwendi, “Tolilileni evi vyamileka mwene wa Asilya! 29Ikeye alinakuminangula ngeci kesi mutave Hezekiya amikwise embwe. Hezekiya kasa kumyamena ku nzili yange. 30Kesi mumutave amisindiye kujendamena ali Shukulu Kalunga. Kesi muyongole ngweni Shukulu Kalunga akamyamena, ngeci avindike mashwalale vetu vaAsilya kufungulula nganda yeni embwe. 31Kesi mutolilile kuli Hezekiya embwe. Mwene wa Asilya alinakumishika ngeci mutuuke mu nganda mwakuliite. Co muvavoshe vakamitavesa kulya ku mikolovozi ya vushuka vwa vinyu na mikuyu ya ku miti yeni, nakunwa mema a mu masima eni, 32noo mwene namyaka mu lifuti lyakulifwa ngwe lyeni, muje muli vitungu vya mikolovozi ya vushuka vwa vinyu, na tiliku yakulinga vunga vwa makende, likelyo lifuti lya olive na mazi a olive na vuki. Nga mulinga evi vyamishika, kumukatsi, oloni mukayoya. Kesi mutave Hezekiya amikwise akuyongola ngeci Shukulu Kalunga akamipatula. 33Kuma kuli vinjambi va ku miyati yeka vamenene mafuti avo ku mavoko a mwene wa Asilya ndi? 34Vali kulijo ololo vinjambi va ku Hamate na ku Alepande? Vali kulijo vinjambi va ku Sefalevaime na ku Hena na ku Ivaha? Kuma kuli umo wavo wamenene Samaliya ndi? 35Simbu ikajo vinjambi va mafuti oshe awa vaamenene lifuti lyavo ku mavoko a mwene yetu? Cooni cuma mukajo cimiyongwesa ngeci Shukulu Kalunga asa kwamena Yelusalema?”
36Co vanu volokele kuluu, ngwe mwavalekele Mwene Hezekiya, kuvendekele lijwi limo. 37Co Elyakime na Shevana na Yowahe vatavozwele vuzalo vwavo mukuviilila, co valekele mwene vije vyendekele Lambashake mwata wa vaAsilya.
The Bible in Mbunda ©The Bible Society of Zambia, 2006