2 Mizimbu 17
17
Njosefati vamupwisa mwene
1Njosefati washwanene ali ishe Asa kupwa mwene, wakolesele vumwene vwendi ngeci alwise Isalele. 2Waakele mashwalale mu vinganda vyoshe vya vimpaka vya mu Yunda, na mu mitambela ya mu lifuti lya Yunda, na mu vinganda vya Efalime vije vyafungulwile ishe Asa. 3Shukulu Kalunga wavezikisile Njosefati omwo wakavangeyeye cimweso cakulivanga ca ishe, co kalemesele Mbale embwe. 4Ikeye wapangelele Njambi ya ishe, wononokele mashiko a Njambi, co kalingile vilinga vije vivalingile vimyene va mu Isalele embwe. 5Ngecivene, Shukulu Kalunga wakolesele vumwene vwendi, co lalo vanu voshe va mu Yunda vamunenelele vwana, ngecivene, wakele na vufuko vwavungi, na kasingimiko kakama. 6Co wakele na nzili mukupangela Shukulu Kalunga ngeci wanyongesele mitambela ije vakele nakulemesela vaka-kujeneka kukulaela, co watundisile mu Yunda vifwa vya Ashela njambi wa munakazi.
7Mu mwaka wamucitatu wakushwana kwendi, Njosefati watumine vamyata vaje vaile nakulongesa mu vinganda vya mu Yunda vapwile, Mbenehaile, na Ovandiya, na Zekaliya, na Netanela, na Mikaya. 8Vaile amo na vaLevi vatanu na vawana, na vaka-kukombelela vavali. Mazina a vaLevi, Shemaya, na Netaniya, na Zevandiya, na Ashahele, na Shemilamote, na Njehonatane, na Andoniya, na Toviya, na Tovandoniya, co vaka-kukombelela vapwile, Elishama, na Njeholame. 9Vambatele livulu lya Mashiko a Shukulu Kalunga, vaile mu membo oshe a mu Yunda nakulongesa vanu.
Vukama vwa Njosefati
10Shukulu Kalunga wazivisile lyova vumwene vwoshe vwa mafuti aje azengelekele Mwene Njosefati kwija nakulwa nendi nzita. 11VaFilisitiya vamo vanenelele Njosefati siliva yaingi na vwana vukwavo, co vaAlavya vamo vamunenelele vimanga vakupwa 7,700 na vimembe vakupwa 7,700. 12Ngecivene, Njosefati wapwile mwene wakama manene. Co mu Yunda mwoshe watungililemo vimpaka na vinganda, 13mukemwo vakele nakutulikila vyakulya vyavingi.
Co wakele na vamyata va nzili vakusimpa mu Yelusalema. 14Vavalavele ngwe ku vikota vyavo vapwile, Andena, ikeye wapwile muka-kushika mashwalale va ku cikota ca Yunda, co washikile mashwalale vakupwa 300,000. 15Wakumwata mu vipangi wapwile Njehohanane washikile mashwalale vakupwa 280,000, 16co wamucitatu wapwile Amasiya muna Zikeli washikile mashwalale vakupwa 200,000. (Amasiya walyanene kupangela Shukulu Kalunga.) 17Co muka-kushika mashwalale wa ku cikota ca Mbenjemani wapwile Elyanda, lishwalale wa nzili nakusimpa, washikile mashwalale vakupwa 200,000 vaje vambatele vintelo na mata a lusipa. 18Wakumwata wapwile Yehozavande wakele na vanalume vakupwa 180,000, valivwaeselele cimweja kulwa nzita. 19Ava vanalume vakevo vapangelele mwene mu Yelusalema, co waakele mashwalale veka lalo mu vinganda vikwavo vya vimpaka vya mu Yunda.
The Bible in Mbunda ©The Bible Society of Zambia, 2006