2 Mizimbu 18
18
Mikaya muka-kwimanena anangula Ahave
(1 Vim 22:1-28)
1Omo Mwene Njosefati wa mu Yunda wakele na vufuko vwavungi na lutsimo lwakama, wavwaesele vulo akati ka umo wa ku naanga yendi na ku naanga ya Ahave Mwene wa mu Isalele. 2Co omo kuneti myaka imo, Njosefati waile ku nganda ya Samaliya nakukasikamesa Ahave. Mukusingimika Njosefati na vaje vaakele navo, Ahave watsiile vimanga na vingombe vavangi manene nakulinga ciwano. Co wasindiiye Njosefati ngeci valikumbasane amo vakalwise nganda ya Lamote mu Ngilyande. 3Co Ahave wehwile Njosefati ngwendi, “Wasa kuya amo nange nakulwisa Lamote ndi?”
Co Njosefati wamukumbulwile ngwendi, “Nange nove tunapu munu umo, co lalo mashwalale vange na mashwalale vove vanapu vamolika.” 4Co Njosefati wamulekele ngwendi, “Oloni akulivanga tucihule tai kuli Shukulu Kalunga.”
5Ngecivene, Ahave wasanene vaka-kwimanena, vakupwa 400, co wavehwile ngwendi, “Citava ngeci njiye nakulwisa Lamote nambe embwe?” Co vakevo vamukumbulwile ngwavo,
“Ya ukavalwise. Njambi akakwana nzili yakuvafungulula.”
6Oloni Njosefati wehwile ngwendi, “Kuma kukwesi muka-kwimanena weka lalo uje itwasa kwihula ali Shukulu Kalunga ndi?”
7Ahave wamukumbulwile ngwendi, “Kwali umolika, lizina lyendi Mikaya muna Imela. Oloni yange njamuzinda omwo ikeye simbu yoshe kesi kwambulula vuka-kwimanena vwavuvwa ali yange, oloni vuka-kwimanena vwavuvi lika.”
Njosefati wamukumbulwile ngwendi, “Mwene kapandele kwendeka ngacije embwe!”
8Asinoni Mwene Ahave wasanene mwata wa mbanja, co wamulekele aye akasane Mikaya vwasi.
9Co vaje vimyene vavali, vazalele vikoveyo vyavo vya vumwene, vatumbamene mu matanda avo ku lijungwilo anja ya cikolo ca Samaliya, co voshe vaka-kwimanena vambulwile vuka-kwimanena ku mesho avo. 10Umo wa vaka-kwimanena lizina lyendi Zendekiya muna Kenaana, wafulile vimbinga vya vutale, co wendekele kuli Ahave ngwendi, “Eci cikeco canendeka Shukulu Kalunga ngwendi, ‘Na vimbinga evi ukalwisa vaSilya, co mwa vushunga vene ukavafungulula.’ ” 11Co vaka-kwimanena voshe vendekele cuma cimo ngwavo, “Ya ukalwise Lamote, co ukahyana. Shukulu Kalunga akakwana nzili yakuvafungulula.”
12A simbu ije vene, uje mwata wa mbanja waile nakukasana Mikaya wendekele kuli Mikaya ngwendi, “Vaka-kwimanena voshe vanendeka lijwi limo lyakuvwaelelesa mwene, nove majwi ove alitombole na majwi a vakweni.”
13Oloni Mikaya wamukumbulwile ngwendi, “Mu lizina lya Shukulu Kalunga wakuyoya njilikumiiya ngeci njikendeka vene vije vyanjileka Njambi yange!”
14Omo wetele ku mesho a Mwene Ahave, co mwene wamwihwile ngwendi, “Mikaya, citava ngeci Mwene Njosefati nange tuye tukalwise Lamote indi embwe?”
Co Mikaya wamukumbulwile ngwendi, “Eyo, yeni mukalwe! Mwa vushunga mukahyana. Shukulu Kalunga akamyana nzili yakuvafungulula.”
15Oloni Ahave wamukumbulwile ngwendi, “Omo wendeka kuli yange mu lizina lya Shukulu Kalunga, unapande kwendeka vushunga! Visimbu vingaijo njikakuleka ngacije?”
16 #
Kul 27:17; Ezek 34:5; Mat 9:36; Mak 6:34 Mikaya wamukumbulwile ngwendi, “Mu cimona njamwene mashwalale va Isalele valishandokela akamwa ya malundu ngwe vimanga vakujeneka kanyungi. Co Shukulu Kalunga wendekele ngwendi, ‘Ava vanu kuvesi na ntwama, veceleni veluke ku membo avo mu kwoloka.’ ”
17Ahave wendekele kuli Njosefati ngwendi, “Njakulekele ngwange munu ou kesi kwambulula vuka-kwimanena vwavuvwa kuvanga lika vwavuvi!”
18Mikaya wendekele lalo ngwendi, “Ololo tolilila eci cendeka Shukulu Kalunga! Njamwene Shukulu Kalunga natumbama a litanda lyendi mwilu, co tungelo twendi voshe vemanene kuli ikeye ku cilyo na ku cimoshwe. 19Shukulu Kalunga wehwile ngwendi, ‘Iyajo akakwisa Ahave ngeci akaye ku Lamote vakamutsiileko?’ Tungelo vamo vendekele mweka, co vakwavo lalo vendekele mweka, 20noo munzinzime wezile wemanene kulutwe lwa Shukulu Kalunga, wendekele ngwawo, ‘Yange njikamukwisa.’ Co Shukulu Kalunga wehwile ngwendi, ‘Mu ngila ikajo ukamukwisila?’ 21Munzinzime wakumbulwile ngwawo, ‘Njikaya nakusindiiya vaka-kwimanena voshe va Ahave kwendeka makuli.’ Co Shukulu Kalunga wendekele ngwendi, ‘Ya ukamukwise. Ukasa vene!’ ”
22Co Mikaya wamanesele kwendeka ngwendi, “Shukulu Kalunga ikeye naaka munzinzime wa makuli mu tunwa twa vaka-kwimanena vove voshe ngeci vakukwise. Oloni ikeye nazivuka ngwendi ukakala mu vukalu!”
23Asinoni Zendekiya muka-kwimanena waile kuli Mikaya, nakumupupa mbanda ku mesho, co wamwihwile ngwendi, “Munzinzime wa Shukulu Kalunga wasa kutunda vati muli yange wendeke muli yove?”
24Co Mikaya wamukumbulwile ngwendi, “Ukanjanuka omo ukaya ku mulili wa kunima ya njuvo nakukavandako.”
25Co Mwene Ahave washikile umo wa ali vamyata wendi ngwendi, “Kwateni Mikaya mumutwale kuli Amoni, nguvulu wa nganda, na kuli Yowashe muna mwene. 26Valekeni vamwake mu kamenga, co vamwane lika likende na mema noo njiiluka mwamuvwa.”
27Co Mikaya watambekeleleko ngwendi, “Nga yove wiluka mwamuvwa, co Shukulu Kalunga kendekele muli yange embwe!” Co lalo wendekele ngwendi, “Tolilileni kesi mwivale evi njinendeka!”
Kutsa kwa Ahave
(1 Vim 22:29-35)
28Asinoni Mwene Ahave wa mu Isalele na Mwene Njosefati wa mu Yunda vaile mukulwisa nganda ya Lamote mu Ngilyande. 29Co Ahave wendekele kuli Njosefati ngwendi, “Omo tukovela mu nzita, yange njilimuka mweka, oloni yove zala vene vikoveyo vyove vya vumwene.” Ngecivene, mwene wa mu Isalele walimukile mweka akukovela mu nzita.
30Co mwene wa Silya washikile vaka-kushika matemba endi ngeci kesi valwise munu weka kuvanga mwene wa Isalele. 31Ngecivene, omo vakevo vamwene Mwene Njosefati, co voshe vayongwele ngwavo ikeye mwene wa mu Isalele, co vakevo vatengulukile nakumulwisa. Oloni omo Njosefati watambekele, co Shukulu Kalunga Njambi wamwamenene, watengulwile nzita waikengesele kweka. 32Co vaka-kushika matemba omo vamwene ngwavo kesi ikeye mwene wa Isalele, co valikelele kumusheka. 33Nameme ngoco, lishwalale umo wa vaSilya washele mukili wendi mu vuta vwa lusipa, co mukili wakwatele Mwene Ahave mukati ka mutongo wa vuzalo vwendi vwa nzita. Co Ahave watambekele kuli muka-kwendesa litemba lyendi ngwendi, “Njinavetwa! Tenguluka nakutundisa litemba mu nzita.” 34Ngecivene, nzita yahyanene manene a litangwa lije, co Mwene Ahave watumbamene mu litemba lyendi nakulwa na vaSilya. Co ku cingwezi watsile.
The Bible in Mbunda ©The Bible Society of Zambia, 2006