2 Mizimbu 16
16
Mwene Asa alizivasana na Mwene Mbenehandande wa Silya
(1 Vim 15:17-22)
1Mu mwaka wamumakumi atatu na itanu na umo wakushwana kwa Mwene Asa wa mu Yunda, Mwene Mbasha wa mu Isalele walwisile Yunda, co watungile cimpaka cakuzengeleka Lama, ngeci munu kesi atuuke nambe kukovela mu Yunda. 2Ngecivene, Asa wambatele siliva na ngolinde vije vyakele mu Njuvo ya Shukulu Kalunga na mu lipela, co wavitumine ku Ndamasiku, kuli Mwene Mbenehandande wa ku Silya, wendekele ngwendi, 3“Tulikwate vusamba, ngwe muvalingile vatatetu. Eyi siliva na ngolinde vinapu vwana vwove. Co ololo ecela vusamba vwove na Mwene Mbasha wa mu Isalele, ngeci atundise mashwalale vendi mu lifuti lyange.”
4Mbenehandande watavele ku viyongola vya Asa, co watumine vamyata vaka-kushika nzita yendi na mashwalale vavo kukalwisa vinganda vya Isalele. Vafungulwile Injone, na Ndani, na Avele Mbete Maka, na vinganda vyoshe vya Nafetali kuje kwakele vinjuvo vyakutulikila. 5Omo Mwene Mbasha wazivile vije vyalingiwile, co walikelele kutunga cimpaka ku Lama, co wecelele vipangi vyendi. 6Asinoni Mwene Asa wakungulwile vanalume va mu Yunda mwoshe wavalekele ngeci vatute mamanya na mavaya aje alikwasesele Mbasha ku Lama, co vawapangesele kutunga vimpaka vya vinganda vya Ngemba na Mizipa.
Hanani muka-kwimanena
7A simbu ije vene Hanani muka-kwimanena waile kuli Mwene Asa wamulekele ngwendi, “Omwo wakulaelele kuli mwene wa Silya, kutuvakana kukulaela kuli Shukulu Kalunga Njambi yove, mukemwo nzita ya mwene wa ku Silya#16:7 NZITA YA MWENE WA KU SILYA: Kunungulula kumo ngwavo, nzita ya mwene wa Isalele. vanatewa. 8Kuma vaSundane na vaLimbiya kuvakele na mashwalale vavangi na matemba amangi manene na vaka-kulonda a tuvalu ndi? Oloni omwo wakulaelele kuli Shukulu Kalunga, co wakuhyanesele. 9Shukulu Kalunga akanyungu kaye koshe, ngeci amwese nzili vaje vanakulaela kuli ikeye na vimbunge vyavo vyoshe. Yove unalingi mwa vulema, cooni kutunda ku lelo nakutwala kulutwe simbu yoshe ukakala mu nzita.” 10Co Asa waluvalele manene na muka-kwimanena, co wamushokele mu kamenga. Eyi ikeyo simbu ije Asa wayandesele vanu vamo na muuka.
Mamaneselelo akushwana kwa Asa
11Vilinga vyoshe vyakushwana kwa Asa kutunda kukushangumuka kweta nakukukotoka vavisoneka mu Livulu lya Mizimbu ya Vimyene va mu Yunda na mu Isalele. 12Mu mwaka wamumakumi atatu na iwana wakushwana kwendi, Asa wapwile cilema, wakele na mushongo wa mendi, oloni nameme ngoco katengulukilile kuli Shukulu Kalunga ngeci amukwase, oloni waile ku vimbanda. 13Omo kwetile lika myaka ivali, watsile, 14co vamutsindile mu mbumbo ya limanya ije yalicokwelele ikeye vavenya mu Nganda ya Ndaviti. Vavwaesele muvila wendi na n̄undu na mazi akunika lwengo lwaluvwa akumutsinda, co vakele mu myala nakumulila.
The Bible in Mbunda ©The Bible Society of Zambia, 2006