1 Samwele 8
8
Vanu va Isalele valomba kukala na mwene
1Omo Samwele nakuluvala, waangwile vana vendi kupwa maako mu Isalele. 2Munendi wa ntwatwa wamulukile lizina lyendi Njwele, co wamucivali wamulukile lizina lyendi Aviya, vakevo vapwile maako mu Mbeleshemba. 3Oloni kuvendele mu vingila vya ishavo, vakele nakuvwaelela lika na vimbongo, ngecivene, vakele nakutambula vimbongo vya lizika-kanwa, kuvakele nakusompa vin̄anda mu vushunga.
4Asinoni vantwama voshe va Isalele valikungulwile amo, co vaile kuli Samwele ku Lama, 5#Kwi 17:14 vendekele kuli ikeye ngwavo, “Kenga, ololo unakuluvala, co vana vove kuvesi nakwenda mu vingila vyove embwe. Ngecivene, twangwile mwene uje akatushwana ngeci tufwe ngwe miyati yeka.” 6Samwele kavwaelelele a cihula cavo caali mwene, ngecivene, ikeye walombelele kuli Shukulu Kalunga, 7co Shukulu Kalunga wendekele ngwendi, “Tolilila ku vyuma vyoshe vije vivendeka vanu kuli yove. Kesi yove ivanavyana embwe, oloni vanavyana yange kupwa mwene yavo. 8Tunde aje njavatundisile mu Ingito, vananjikengesa nima, co valinakulemesa vinjambi veka, ololo evi vivalinga kuli yove vikevyo vije vakele nakulinga kuli yange. 9Ngecivene, vatolilile, oloni vanangule manene uvaleke cifwa ca mwene uje akavashwana.”
10Co Samwele wambulwile kuli vanu vaje vamulombele mwene vyuma vyoshe vije vyamulekele Shukulu Kalunga. 11Samwele wavanungulwilile ngwendi, “Eci cikeco cifwa ca mwene uje akamishwana. Akakwata vana veni va vanalume nakuvapwisa mashwalale, co akati ka vanu vaje, vamo vakapanga ku matemba endi a nzita, co vakwavo ku maunzi a vinzita. 12Co akapwisa vamo kushika vanu 1,000, vamo kushika makumi atanu a vanu. Co vana veni va vanalume vakalima mahya endi, na kuteja vimbuto vyendi, co vakapanga vitwa vya nzita, na vivala vya matemba. 13Vana veni va vanakazi vakapwa vaka-kupanga vyuma vyakunika lwengo, co vakapwa vaka-kumutelekela nakumwocela makende. 14Co akambata mahya eni, na vitungu vyeni vya mikolovozi ya vushuka vwa vinyu, na miti ya olive, akavyana kuli vamyata vendi. 15Co akambata camulikumi ku vimbuto vyeni, na ku vitungu vyeni vya mikolovozi ya vushuka vwa vinyu, co akavyana kuli vamyata vendi, na vangamba vendi. 16Akambata vangamba veni va vanalume na ava va vanakazi, na vingombe veni, na vimulu veni vavavwa, co vakamupangela. 17Akambata camulikumi ku matanga eni. Co mukapwa vindungo vendi. 18A litangwa lije, mukatatoka manene omwo mwene yeni uje imunalyangwila, oloni Shukulu Kalunga kakatolilila kukulinyenga kweni embwe.”
19Oloni vanu vavyanene majwi endekele Samwele, vendekele ngwavo, “Embwe! Yetu tushaka mwene, 20netu tufwe ngwe miyati yeka, tushaka mwene yetu atushwane nakututwamenena ku nzita nakutulwila ku vinzita vyetu.” 21Omo Samwele wazivile vyuma vyoshe vakele nakwendeka vanu, waile wakalekele Shukulu Kalunga. 22Co Shukulu Kalunga wamukumbulwile ngwendi, “Linga vyoshe vije vivashaka, vaane mwene.” Asinoni Samwele walekele vanalume voshe va Isalele kwiluka ku membo avo.
The Bible in Mbunda ©The Bible Society of Zambia, 2006