1 Samwele 9
9
Saulu aliwana na Samwele
1Kwakele munalume umo wakufuka manene lizina lyendi Kishe, muna Aviyele, mutekulu wa Zelole, wa mu naanga ya Mbekolate, wa ku cikota ca Afiya, wa ku muyati wa Mbenjemani. 2Co wakele na mwana wa munalume lizina lyendi Saulu, wapwile mukwenje wamuvwa manene. Mu Isalele mwoshe kumwakele wakumutuvakana ku citso, nambe wakumutuvakana ku vuvwa.
3Co vimulu vamo va Kishe vazimbalele, co Kishe wendekele kuli munendi Saulu ngwendi, “Ya amolika na umo wa ali vangamba ngeci mukashakezeke vimulu.” 4Co vaile ku lifuti lya malundu lya Efalime na ku lifuti lya Shalisha, oloni kuvavawanene, co vaile lalo ku lifuti lya Shalime, oloni kuvavawanene. Vaile ku lifuti lya Mbenjemani, oloni na kuje lalo kuvavawanene. 5Omo vetele ku lifuti lya Zufe, Saulu wendekele kuli ngamba yendi ngwendi, “Twiluke kwimbo, amo tate kayongola vimulu, oloni ayongola ali yetu.”
6Co uje ngamba wamukumbulwile ngwendi, “Vandamena tai! Mu nganda eyi mwakala munu wa Njambi wa kasingimiko kakama, omwo vyuma vyoshe vyakendeka vikapu vya vushunga. Tuye kuli ikeye, amo akasa kutuleka oku kuli vimulu.”
7“Saulu wehwile ngwendi, nga tuya kuli ikeye, vikajo tukamwana? Kukwesi makende anasalao mu vinjeke vyetu, co kukwesi nevi vyakumwana, indi tukamwana vika?”
8Co uje ngamba wamukumbulwile ngwendi, “Njili na mbongo yaindondo ya siliva, injikamwana, ngeci akatuleke oku kutukavawanena.” 9(Laja mu Isalele, omo munu aya nakwihula kuli Njambi, co ikeye endeka ngwendi, “Ijeni tuye kuli muka-kumona,” omwo uje ikeye vatumbula ololo ngwavo muka-kwimanena, co laja vakele nakumutumbula ngwavo muka-kumona.) 10Co Saulu wendekele kuli ngamba yendi ngwendi, “Unendeka mwamuvwa. Tuye.” Ngecivene, vaile mu nganda muje mwakele munu wa Njambi.
11Co omo vakele nakulamata a lilundu vaye muje mu nganda, valiwanene na vambanda vakele nakwija nakutekula mema. Co vavehwile ngwavo, “Muka-kumona kwali ndi?” 12Co vakevo vavakumbulwile ngwavo, “Kwali. Kengeni, uje ali mulutwe. Nga muzambula, mumuwana. Naija mu nganda, omwo lelo vanu valinakukombelela n̄ombelo a mutula wa a lilundu. 13Omo muketamo, co mukamuwana, omwo kanda acilamate ku lilundu nakukalya, vanu lalo kuvasa kulya, na vaje vavanalanya kuvasa kulya kuvanga naija, omwo ikeye napande kuvezikisa n̄ombelo. Ololo lamateni vwasi-vwasi muliwane nendi.”
14Ngecivene, Saulu na ngamba yendi vaile kuje ku nganda, co omo vetele, vamwene Samwele alinakwija kuli vakevo wakele nakuya ku mwela wakulemesela.
15Omo Saulu kanda acete, Shukulu Kalunga walekele Samwele ngwendi, 16“Imene a simbu ino vene njikakutumina munu wa ku muyati wa Mbenjemani, muvwavese mazi ngeci apwe muka-kushwana vanu vange va Isalele, ikeye akavamena kuli vaFilisitiya, omwo njinamono tuyando twa vanu, co njazivi kulila kwavo ngeci njivakwase.”
17Omo Samwele wamwene Saulu, co Shukulu Kalunga wendekele kuli ikeye ngwendi, “Kenga, ou ikeye munu uje injinakulekele. Ikeye akashwana vanu vange.” 18Asinoni Saulu waile kuli Samwele, ikeye wakele kuyehi na cikolo, co wehwile ngwendi, “Njilekeni, kulijo kwakala muka-kumona?”
19Samwele wamukumbulwile ngwendi, “Yange vene muka-kumona. Twameni kulutwe tuye ku mwela wakulemesela. Ku litangwa lya lelo muvuvali vweni mukalya nange. Co imene mutondo njikakumbulula vihula vyeni vyoshe, asinoni mukaya. 20Ngwe a vimulu vaje vanazimbalele a matangwa atatu, kesi mulinyenge, vanavawana laja. Oloni iyajo ivashaka manene vanu va Isalele? Zivuka ngwove yove vene na naanga ya isho.”
21Co Saulu wakumbulwile ngwendi, “Yange njakundama ku muyati wa Mbenjemani, muyati waundondo manene mu Isalele, co naanga yange ikeyo yaindondo manene mu muyati. Ngecivene, omwo vikajo wendeka kuli yange ngacije?”
22Asinoni Samwele watwalele Saulu na ngamba yendi mu mulili wa vangenzi, co wavatumbikile ku shongo ya mesa kuje vatumbamene vangenzi vakweta kuyehi na makumi atatu. 23Co Samwele wendekele kuli muka-kuteleka ngwendi, “Nena cipuka ca situ cije cinjinakwanene, cije njakulekele ngwange ucitulike.” 24Co muka-kuteleka wanenele cipuka cije caangwile ca ku lindi, wacitumbikile kulutwe lwa Saulu. Co Samwele wendekele ngwendi, “Kenga, eci cikeco cipuka twakutulikilile, cilye. Omwo njakutulikilileco ngeci wakucilye, amolika na vanu vaje vanjalanyele.”
Ngecivene, Saulu walile na Samwele a litangwa lije vene. 25Co omo vatundile ku mwela uje wakulemesela nakuya kwimbo, co vakavwaeselele Saulu vulili akamwa ya njuvo,#9:25 VULILI AKAMWA YA NJUVO: A matangwa aje, vinjuvo vyakele na viluli vyakusivama, co capwile cacasi ngeci vanu valaleo. 26co walalele kuje.
Samwele avwavesa mazi Saulu kupwa muka-kushwana
A mungulungengu, Samwele wasanene Saulu akamwa ya ciluli cakusivama ca njuvo ngwendi, “Induka uye.” Ngecivene, Saulu wendukile, co Saulu na Samwele vaile amolika mu tapalo. 27Omo vetele kumukulo wa limbo, Samwele wendekele kuli Saulu ngwendi, “Leka ngamba yove alivange kulutwe.” Co uje ngamba waile, asinoni Samwele wendekele ngwendi, “Tumbama kuno kasimbu, ngeci njikuleke majwi anendeka Njambi.”
The Bible in Mbunda ©The Bible Society of Zambia, 2006