1 Samwele 7
7
1 #
2 Sam 6:2-4; 1 Miz 13:5-7 Ngecivene, vanu va ku Kilyate Njealime vezilile Cikasa ca Cikumiiyo ca Shukulu Kalunga, vacitwalele ku njuvo ya munalume umo lizina lyendi Avinandave, watungile njuvo yendi a lilundu. Co vajelesele munendi Elyazale ngeci acinyunge.
Samwele ashwana Isalele
2Co Cikasa ca Cikumiiyo ca Shukulu Kalunga cakele mu Kilyate Njealime simbu yakama manene, cakele kuje myaka makumi avali. A simbu ije vaIsalele voshe vatambekele kuli Shukulu Kalunga ngeci avakwase.
3Samwele wendekele kuli vanu va Isalele ngwendi, “Nga mwiluka kuli Shukulu Kalunga na vimbunge vyeni vyoshe, co munapande kutundisa vinjambi veka na vifwa vya Asitalete njambi wa munakazi. Likundikeni kuli Shukulu Kalunga nakulemesa ikeye lika, co akamyamena ku nzili ya vaFilisitiya.” 4Ngecivene, vaIsalele vatundisile tumponya twavo twa Mbale, na Asitalete, co valemesele Shukulu Kalunga lika.
5Asinoni Samwele wasanene vaIsalele voshe valiwanene ku Mizipa, co wavalekele ngwendi, “Njikamilombelela kuli Shukulu Kalunga kuje vene.” 6Co voshe vakungulukilile ku Mizipa. Vatekwile mema nakuwetila kupwa n̄ombelo kuli Shukulu Kalunga, co valikelele kulya litangwa lyoshe lyamutunu. Co vendekele ngwavo, “Tunalingi vuvi ku mesho a Njambi.” Ngecivene, Samwele waakwilile vanu va Isalele ku Mizipa.
7Omo vaFilisitiya vazivile ngeci vaIsalele vanakungulukila ku Mizipa, co vaje vimyene vatanu va Filisitiya vakatukile na vanu vavo vaile nakukalwisa vaIsalele. Omo vaIsalele vazivileko, co vakele na lyova, 8vendekele kuli Samwele ngwavo, “Kesi ulikele ku tulombelela kuli Shukulu Kalunga Njambi yetu ngeci atwamene kuli vaFilisitiya.” 9Samwele watsiile muna manga wamukombelelele woshe wamutunu kupwa n̄ombelo ya kwenyeka kuli Shukulu Kalunga. Asinoni Samwele walombelele kuli Shukulu Kalunga ngeci akwase Isalele, co Shukulu Kalunga wakumbulwile malombelo endi. 10Co omo Samwele wakele nakukombelela n̄ombelo ya kwenyeka, vaFilisitiya vezile nakulwisa vaIsalele, oloni aje vene, Shukulu Kalunga watumine cililimo cakama ali vakevo. Wavauya-wuyisile, co vatewele. 11Ngecivene, vaIsalele vatundile ku Mizipa, vashekele vaFilisitiya nakuvetesa ku Mbetekale, co vaile nakuvatsiila mu ngila.
12Asinoni Samwele wanonele limanya, walitumbikile mukati ka Mizipa na Shene, co wendekele ngwendi, “Shukulu Kalunga natukwasa yetu voshe mu ngila yetu.” Co walukile lije limanya ngwendi, “Limanya Lyakukwasa.” 13Ngecivene, vaFilisitiya vavafungulwile. Co Shukulu Kalunga kavatavesele ngeci valwise lifuti lya vaIsalele a simbu ije omo Samwele wakele nakuyoya. 14Co vinganda vyoshe vije vafungulwile vaFilisitiya vije vyakele akati ka Ekelone na Ngate vyelukile ku Isalele, co Isalele velwisile lifuti lyavo. Co kwakele kwoloka mukati ka vaIsalele na vaKanana.
15Samwele washwanene Isalele matangwa oshe akuyoya kwendi. 16Co a mwaka na mwaka wakele nakuya ku Mbetele, na ku Ngilingale, na ku Mizipa, co waakwilile Isalele ku mitambela yoshe. 17Asinoni welukile kwimbo lyendi ku Lama, co kuje wapwile lyaako. Co ku Lama watungilile Shukulu Kalunga mutula.
The Bible in Mbunda ©The Bible Society of Zambia, 2006