Romanos 12
12
Jun Acꞌ Bꞌeybꞌale Yet Chi Kakꞌon Servil Dios
1Jex wuẍtaj, jex wanabꞌ, caw chi okꞌ scꞌul Dios kin. Yuxan, chin kꞌan ey jex, tol che yaoc je bꞌa yul skꞌabꞌ Dios, jaxca junoj xaambꞌal iquis, junoj caw sakꞌal, catuꞌ chi akꞌle tet, jaxca ojabꞌ tuꞌ chi kute kakꞌon cu bꞌa tet. Ta chi kakꞌ cu bꞌa tet Dios jaxca tuꞌ, chi yal yeloc apnoj tol yet jon, catuꞌ chi cu oc yin eyilal tet yin masanil cu cꞌul jaxca chi yoche. 2Manxa ojabꞌ laan oj chi kute cu bꞌeybꞌal yetoj ebꞌ yet yul yibꞌankꞌinal tiꞌ. Tol ojabꞌ chi cu qꞌuex cu naꞌbꞌal, yet watxꞌ chi waꞌxi cꞌal oc cu bꞌeybꞌal yin junelne. Ta jaxca tuꞌ chi kute cu bꞌa, oj naꞌcha el ku tzet chi yoche Dios kin. Jaꞌ wan tzet chi yoche tuꞌ, watxꞌ cꞌal eloj, chi tzala Dios yetoj, tzꞌajan cꞌal yul sat Dios.
3Jaꞌ Dios jix akꞌon wopiso tiꞌ an yu swatxꞌcꞌulal. Yuxan chi waltoj wan tiꞌ ey jex je masanil. Cꞌam chi skeꞌ cu naꞌon junjun jon tol jelan jon. Yin ojabꞌ yeynajil chi yun cu naꞌon tzet kopiso. Jatacꞌalaꞌ jantaj yeoc cu cꞌul yin Dios. Jaxca ojabꞌ tuꞌ, chi yun cu seyon kopiso. 4Jaꞌ cu mimanil, ecꞌal tujan, catuꞌ junjun tujan ey txꞌotxꞌ txꞌotxꞌ yopiso. 5Jaxca cu mimanil tuꞌ, quey jon pax tuꞌ jaon creyente jon tiꞌ. Caxcꞌal ecꞌal jon, junne cꞌal animail keoc yin Cristo. Jaxca ton masanil tujan cu mimanil tuꞌ, junne yeocoj, quey jon ton tuꞌ, junne keoc cu masanil. 6Txꞌoj txꞌoj cꞌal kopiso junjun jon, jatacꞌalaꞌ tzet chi el yin scꞌul Dios chi yakꞌ ey jon junjun jon. Yuxan, sowalil chi kil kopiso tuꞌ junjun jon. Jaꞌ mac yin alo el skꞌane Dios jix akꞌle yunne, sowalil chi yaleloj jatacꞌalaꞌ jantaj chi yute yaon oc scꞌul yin Dios tuꞌ. 7Jaꞌ mac yin akꞌo servil yet creyenteal jix akꞌle yunne, sowalil watxꞌ chi yute yakꞌon servil ebꞌ. Jaꞌ mac cuyuꞌ yet creyenteal jix akꞌle yunne, sowalil caw chi yaoc scꞌul scuyon ebꞌ. 8Jaꞌ mac chi skeꞌ yu yakꞌon naꞌbꞌale, sowalil chi yil yopiso tuꞌ. Jaꞌ mac chi skeꞌ yu scolwa tet ebꞌ ánima, yakꞌ ojabꞌ tet ebꞌ yin masanil scꞌul. Jaꞌ mac chi akꞌle yopiso yilomaloj yet creyenteal, yil ojabꞌ yin sjichanil. Yetoj pax mac chi okꞌ scꞌul yin ebꞌ eyoc yin syaꞌilal, colwa ojabꞌ tet ebꞌ yin tzalacꞌulal.
Wanoj Bꞌeybꞌale Chi Chejle Cu Bꞌeybꞌalne
9Cu camcꞌulne ojabꞌ cu bꞌa yetoj jaꞌcaw camcꞌulal. Yal cꞌal tzet man watxꞌoj, chi cu yaacan eloj. Jaxa yin tzettaj yetal watxꞌ, jaꞌ ojabꞌ tuꞌ chi kaoc cu naꞌbꞌal. 10Watxꞌ chi kute cu camcꞌulnen cu bꞌa, yutol kuẍtaj cu bꞌa, kanabꞌ cu bꞌa. Sowalil chi kiꞌey cu bꞌa junjun jon, yet watxꞌ ey keloc apnoj junjun jon yul cu sat.
11Cꞌasan chi kute cu bꞌa tet Naj Kaawil. Man ojabꞌ isa oj chi kute cu bꞌa tet Naj. Yin ojabꞌ masanil cu cꞌul chi kakꞌon servil Naj Kaawil tuꞌ.
12Tzalajonwej tobꞌalkꞌinal, yutol jaꞌ Dios chi kaoc yipoj cu cꞌul. Tecꞌan chi kute cu bꞌa yet chi kilon syaꞌil. Cꞌam chi cu bꞌej cu txali tobꞌalkꞌinal.
13Colwa jon yin ebꞌ ket creyenteal, yet ey tzet caw sowalil chi oc yu ebꞌ. Akꞌom ojabꞌ jon posada tet ebꞌ chi ecꞌ cu cꞌatan.
14Jaꞌ mac pena chi yute scꞌul ey jon, jaꞌ ojabꞌ swatxꞌcꞌulal Dios chi cu kꞌantej yibꞌan ebꞌ. Catuꞌ man ojabꞌ jaꞌ oj sjowal scꞌul Dios chi cu kꞌantej yibꞌan ebꞌ, tol jaꞌ ojabꞌ swatxꞌcꞌulal.
15Tzalajonwej yetoj ebꞌ chi tzalai. Cusojonwej yetoj ebꞌ chi cusi.
16Watxꞌ ojabꞌ cꞌal chi kute cu bꞌa tet masanil ánima. Man ecꞌbꞌanoj chi kute cu bꞌa. Kutewej cu bꞌa jaxca ebꞌ cꞌam yeloc apnoj yul sat ánima. Manche cu naꞌwej tol caw jelan jon. 17Ta ey mac chi yakꞌ penacꞌulalil ey jon, manche cu pajtze cu bꞌa tet. Watxꞌ ojabꞌ cꞌal chi kute cu bꞌeybꞌal yil masanil ebꞌ ánima. 18Kakꞌwej kip cu txꞌoxon watxꞌcꞌulal tet masanil ánima, yet watxꞌ, watxꞌ ojabꞌ cꞌal kakꞌon yetoj ebꞌ. 19Jex wuẍtaj, jex wanabꞌ, cꞌam chi skeꞌ cu pajtzen cu bꞌa tet junoj mactxequel. Sowalil chi kechbꞌane yet watxꞌ, jaꞌ Dios chi pajtzen tet ebꞌ yetoj sjowal scꞌul. Yutol jix yal can Dios yul An Juun jaxca tiꞌ: “Jain tiꞌ, ey walon wet waon oc syaꞌtajil yibꞌan ebꞌ. Jain oj jin pajtze tet ebꞌ,” ẍi Naj Kaawil.#Deuteronomio 32:35. 20Chi yalon pax yul An Juun jaxca tiꞌ: “Ta chi nocha junoj ja cajat, akꞌ lowoj, ta chi taj stiꞌ, akꞌ jaꞌ yuqꞌueꞌ. Ta jaxca tuꞌ che yute je bꞌa, oj qꞌuixwoj a yu tzet che yunne,” ẍi yul An Juun.#Proverbios 25:21-22. 21Manche cu pajtze spenail yet chi yunen spenail ebꞌ ey jon, tol jaꞌ ojabꞌ swatxꞌilal chi yakꞌ ganar yibꞌan spenail tuꞌ.
© 2016, Wycliffe Bible Translators, Inc. All rights reserved.