Romanos 11
11
Jaꞌ Ebꞌ Israel Colbꞌilxa Eloj
1Jaꞌ ebꞌ sconobꞌ Dios* tuꞌ, ¿tumi jix intajnele el ebꞌ yu Dios tuꞌ? Cꞌamaj, ilaꞌ jin tinaniꞌ, Israel jin yetoj ebꞌ. Yicꞌaal jin pax naj Abraham yetoj ebꞌ jain tiꞌ. Ey jin oc yin jun bꞌulan yicꞌaal naj Benjamín. 2Jaꞌ yet peyxa jix yal can Dios, tol yet xacꞌaltaꞌ Dios ebꞌ Israel tuꞌ. Yuxan, jaꞌ tinaniꞌ, man intajnebꞌil oj el sconobꞌ Dios tuꞌ yu. Kotaj skꞌaneal naj Elías yul An Juun. Jaꞌ yet jix txali naj Elías tuꞌ tet Dios junel, catuꞌ jix yalon tzet spenail ebꞌ yet Israelal tuꞌ. Jix yal jaxca tiꞌ: 3“Jaach Jehová, jaꞌ ebꞌ wet conobꞌ tiꞌ, jix smakꞌ cam wanxa ebꞌ ja chejabꞌ, catuꞌ jix smakꞌon etextoj smeẍail xaambꞌal ebꞌ, wan chi akꞌle ey jaach. Jaꞌ tinaniꞌ, asanne jin jix jin cani, chi yoche pax ebꞌ chin yakꞌ camoj,” ẍi naj tet Dios.#1a Reyes 19:10, 14. 4Jix takꞌwi Dios tet naj jaxca tiꞌ: “Cꞌamaj, ey jujebꞌxa mil winaj sicꞌbꞌil el wu an. Cꞌam bꞌey jix ey kaan ebꞌ sattaj Baal,#11:4 Jaꞌ jun skꞌaneal tiꞌ, chi ilcha pax bꞌey 1a Reyes 19:1-18. Baal sbꞌi sdiosal ebꞌ ánima eyecꞌ scawilal ebꞌ Israel tuꞌ. jun chi al-le oc diosal,” ẍi Dios tet naj Elías.#1a Reyes 19:18. 5Jacꞌalaꞌ pax tinaniꞌ, ey ebꞌ yet Dios xol ebꞌ Israel, ebꞌ sicꞌbꞌil el yu Dios yu swatxꞌcꞌulal. 6Yu swatxꞌcꞌulal Dios, yuxan jix sicꞌle el ebꞌ yu, man yu oj tzet jix el yunen ebꞌ. Kꞌinaloj ta yu tzet chi el yunen ebꞌ, yuxan chi sicꞌle el ebꞌ. Ta jaxca tuꞌ xin, man yu oj swatxꞌcꞌulal Dios chi yal tuꞌ, yuxan chi colcha ebꞌ.
7¿Tzet chi eloc yin ebꞌ Israel che naꞌ? Jix yakꞌle ebꞌ seyon tzet utbꞌil chi yun yoc ebꞌ watxꞌil sattaj Dios, ma pax skeꞌ yu ebꞌ. Tol asan ebꞌ sicꞌbꞌil el yu Dios xol ebꞌ tuꞌ, asan yu ebꞌ tuꞌ chi skeꞌ yu. Jal wanxa xin, tol jix akꞌle cawxo el snaꞌbꞌal ebꞌ. 8Jaxca chi yal yul An Juun: “Jaꞌ Dios jix akꞌon cawxo el snaꞌbꞌal ebꞌ. Yuxan, caxcꞌal chi yil ebꞌ yipalil, cꞌam cꞌal chi naꞌcha el yu ebꞌ. Caxcꞌal chi yabꞌ skꞌane Dios ebꞌ, ma cꞌaltaꞌ naꞌcha el yu ebꞌ. Jacꞌalaꞌ ebꞌ tinaniꞌ,” ẍi yul An Juun.#Deuteronomio 29:4. 9Jix yal can pax naj rey David jaxca tiꞌ:
Jaꞌ xol wan kꞌin chi yaoc ebꞌ, jaꞌ ojabꞌ tuꞌ chi syaalne sbꞌa ebꞌ, etex ojabꞌ el ebꞌ.
Telcꞌo ojabꞌtoj ebꞌ xol wan skꞌin tuꞌ. Jul ojabꞌ syaꞌtajil yibꞌan ebꞌ.
10Etex ojabꞌ el snaꞌbꞌal ebꞌ junelne, yet watxꞌ, cꞌamxa chi snaꞌ niꞌoj Dios ebꞌ.
Jaxca ojabꞌ junoj ánima tenbꞌil ey noan yu tzet ijbꞌil yu, jaxca tuꞌ ojabꞌ ebꞌ tobꞌalkꞌinal, ẍi naj David tuꞌ.#Salmos 69:22-23.
Tzet Utbꞌil Chi Yun Scolcha Ebꞌ Man Israel Oj
11Chin kꞌanle ey jex tinaniꞌ, jaꞌ yet cꞌam chi yaoc scꞌul ebꞌ yin Cristo, ¿yin junelne jix intajnele can el ebꞌ? Cꞌamaj. Yu jix cawxi el snaꞌbꞌal ebꞌ, yuxan ey ebꞌ man Israeloj chi colchai. Jaxa yet oj yilon ebꞌ Israel, oj yochen oc ebꞌ. 12Yu ma yaoc scꞌul ebꞌ Israel tuꞌ yin Cristo, yuxan watxꞌ yet masanil ánima yul yibꞌankꞌinal tiꞌ. Yutol jix cancan ebꞌ Israel tuꞌ yalan, yuxan caw watxꞌ yet ebꞌ man Israeloj. Ta jaxca tuꞌ jix yun yeloc apnoj yu ma yaoc scꞌul ebꞌ yin Cristo, yel xacꞌal mi watxꞌ ket cu masanil yet oj meltzo pax oc snaꞌbꞌal ebꞌ Israel junelxa.
13Ey pax jun tzet chi yoche jin cꞌul chi wal ey jex an, jaex man Israeloj. Jaꞌ Dios jix akꞌon wopiso jin mulna je nan je xol an. Yuxan, caw miman yeloc apnoj jun wopiso tiꞌ yul jin sat an. 14Chi woche chi yil ebꞌ wet conobꞌ tol lalan je colchai, tala cꞌuxan eyto pax ebꞌ chi yoche chi colcha pax oj. 15Jaꞌ ebꞌ Israel tuꞌ, intajnebꞌil el ebꞌ yu Dios jun tiempoal. Yuxan chi skeꞌ yoc masanil wanxa ánima yin watxꞌcꞌulal. Jaꞌ yet oj chaꞌle pax oc ebꞌ Israel tuꞌ junelxa xin, jaxca ian xacꞌal mi tol chi pitzcꞌu a ebꞌ ánima xol ebꞌ camnaj, yutol miman swatxꞌilal oj ẍaꞌ ebꞌ masanil. 16Kꞌinaloj jaꞌ ixim bꞌabꞌel pan chi eltej yin ixim jarina, yet ton Dios yeocoj, ta queytuꞌ, yet ton Dios masanil. Jaxca junoj teꞌ teꞌ, ta yet Dios teꞌ xeꞌ, yet Dios teꞌ skꞌabꞌ pax oj. 17Queyton tuꞌ yeloc apnoj ebꞌ Israel. Ey ebꞌ Israel jix el yul skꞌabꞌ Dios. Jaxca junoj skꞌabꞌ teꞌ olivo#11:17 Jaꞌ jun teꞌ olivo, yechel ebꞌ conobꞌ Israel. chi tzokꞌle el yin smimanil, queytuꞌ ebꞌ. Jal jaex xin, jaxca junoj skꞌabꞌ teꞌ olivo xol-lajil teꞌ olivo. Quey pax ton tuꞌ jex, yutol man jex Israeloj. Jaxca tol jix jex awle can oc sqꞌuexeloj ebꞌ bꞌey jix tzokꞌle el yin teꞌ smimanil tuꞌ, yutol ey je yalon je yet yetoj ebꞌ yichmam ebꞌ Israel tuꞌ. 18Ma pax skeꞌ je naꞌoni tol yel watxꞌ jex yintaj ebꞌ Israel tuꞌ. Yutol jaxca cꞌal junoj skꞌabꞌ teꞌ quey jex tuꞌ. Jaꞌ junoj skꞌabꞌ teꞌ, cꞌam chi skeꞌ chi akꞌon yaaxbꞌoj teꞌ xeꞌ. Tol jaꞌ teꞌ xeꞌ chi akꞌon yaaxbꞌoj teꞌ skꞌabꞌ tuꞌ. 19Tejan je chi jaxca tiꞌ: “Jaꞌ ebꞌ Israel tuꞌ, jaxca tol tzokꞌbꞌil el ebꞌ yin smimanil, yet watxꞌ jaon chi cu oc sqꞌuexeloj ebꞌ,” tejan je chi. 20Yel toni, jaxca tol tzokꞌbꞌil el ebꞌ Israel tuꞌ, yutol ma yaoc scꞌul ebꞌ yin Dios. Jal jex xin, yu che yaoc je cꞌul yin, yuxan jix jex oc can sqꞌuexeloj ebꞌ. Yuxan manche je yiꞌa can je bꞌa, teyne cꞌal je bꞌa. 21Ilaꞌ, ma yakꞌ Dios smimancꞌulal yin ebꞌ yet cꞌaltaꞌa. Jaj jex xa mi, man oj yakꞌ mimancꞌulal je yin pax oj, ta che yiꞌel je cꞌul yin. 22Otajnewej eloj, tol miman swatxꞌcꞌulal Dios. Akꞌom cuenta pax Dios sicꞌlebꞌil. Jaꞌ ebꞌ ma yaoc scꞌul yin tuꞌ, akꞌbꞌil cuenta ebꞌ yu. Yajbꞌan ey jex ecꞌ xin, miman swatxꞌcꞌulal chi xꞌoxoꞌ. Sowalil che cawxone oc je bꞌa yin swatxꞌcꞌulal tuꞌ. Ta cꞌamaj, oj jex iꞌle pax el yu Dios jaex tiꞌ. 23Jaꞌ ebꞌ Israel tuꞌ, ta oj ya pax oc scꞌul ebꞌ yin Dios junelxa, oj ale pax oc ebꞌ yetoj junelxa. Jaxca tol oj awle oc ebꞌ yin smimanil junelxa. Yutol chi skeꞌ yunen Dios yetoj ebꞌ jaxca tuꞌ. 24Jaex man jex Israeloj, jaxca tol jaꞌ yin junoj teꞌ teꞌ xol-lajil teꞌ olivo tzokꞌbꞌil jex eloj. Catuꞌ jix jex awle oc yin jun teꞌ jaꞌcaw olivo. Caxcꞌal ma jex cꞌaltaꞌ smimanil oj teꞌ yet yalantoj, jix cꞌal jex oc smimanil oj teꞌ tinaniꞌ. Ta jaxca tuꞌ jix jex utelei, jacꞌalaꞌ pax ebꞌ Israel, jaxca tol oj awle oc ebꞌ yin smimanil bꞌey jix el tuꞌ. Kꞌabꞌe yeoc cꞌaltaꞌ ebꞌ yet peyxa. Yuxan oj waꞌxoj oc ebꞌ yin junelxa.
Ey Jun Cꞌual Oj Colcha Masanil Ebꞌ Israel
25Jex wuẍtaj, jex wanabꞌ, jaꞌ wan chi waltoj ey jex tiꞌ an, cꞌam mac otajnen peyxa, jal tinaniꞌ chi woche che yotajnewej eloj, yet watxꞌ cꞌam che yiꞌa can je bꞌa yu je jelanil. Jaꞌ ebꞌ wet Israelal tuꞌ, ecꞌal ebꞌ jix cawxi el snaꞌbꞌal. Oj can ebꞌ jaxca tuꞌ, masantaꞌcꞌal oj tzꞌajna ebꞌ man Israeloj scolcha eloj, 26catuꞌ oj colcha masanil ebꞌ wet Israelal. Jaꞌ jun tiꞌ chi woche che yotajne eloj. Yutol chi yal can yul An Juun jaxca tiꞌ:
Jaꞌ bꞌey conobꞌ Sión,* Jaꞌ tituꞌ oj a jun Colwawom.
Jaꞌ oj iꞌon el spenail ebꞌ yicꞌaal Jacob.
27Jaxca tiꞌ oj wute wakꞌon jin wa kꞌane yetoj ebꞌ an, catuꞌ oj jin joꞌon qꞌuey spenail ebꞌ, ẍi Dios yul An Juun.#Isaías 59:20, 21; 27:9.
28Jaꞌ ebꞌ wet Israelal tuꞌ, scajat sbꞌa ebꞌ yetoj Dios, yutol cꞌam chi yaoc ebꞌ yin scꞌul jun skꞌaneal yet colbꞌanile. Queytuꞌ yakꞌon ebꞌ jaxca tiꞌ, yet watxꞌ ey jex xa chi skeꞌ je colchai. Jacꞌalaꞌ camcꞌulnebꞌil cꞌal ebꞌ yu Dios, yutol jaꞌ Dios sicꞌnen can el yichmam ebꞌ. 29Yutol jaꞌ tzet chi yakꞌ Dios, junelne chi yakꞌa. Cꞌamxa chi yiꞌecꞌ junelxa. Jaꞌ ebꞌ chi yawte oc Dios yetoj, junelne chi yawte oc ebꞌ yetoj. 30Jaꞌ yet yalantoj, man jijemoj jex tet Dios. Jal tinaniꞌ xin, chi okꞌ scꞌul je yin, yutol jaꞌ ebꞌ wet Israelal, man jijemoj ebꞌ tet Dios. 31Yel toni, man jijemoj ebꞌ wet Israelal tet Dios tinaniꞌ, ey tzet yu, yet watxꞌ oj okꞌ pax scꞌul Dios yin ebꞌ jaxca chi yun yokꞌ scꞌul je yin tinaniꞌ. 32Jaꞌ Dios chi aloni, tol man jijemoj jon cu masanil jaon ánima jon tiꞌ. Cꞌam chi skeꞌ cu colon cu bꞌa yul ket. Jix cu yute jaxca tuꞌ, yet watxꞌ jun laan yokꞌ scꞌul kin cu masanil.
33Jaꞌ Dios, ¡Cꞌamxa chi alcha jantaj swatxꞌil! ¡Cꞌamxa chi alcha jantaj sjelanil! ¡Cꞌamxa chi alcha jantaj tzet yotaj! Cꞌam chi cu tzaji kalon el tzet jix snaꞌbꞌalne eloj, cꞌal tzet chi el swaꞌneni. ¡Catuꞌ cꞌam pax junoj chi naꞌcha el sbꞌeybꞌal Dios yu! 34Jaxca chi yal yul An Juun: “¿Mac junoj chi skeꞌ yotajnen el snaꞌbꞌal Naj Kaawil? ¿Mac junoj chi skeꞌ yakꞌon snaꞌbꞌal Dios? 35¿Mac junoj chi skeꞌ tol jaꞌ bꞌabꞌel oj akꞌon junoj tzetyetal tet Dios, catuꞌ tzunan xa chi yakꞌ Dios sqꞌuexel tet?” ẍi yul An Juun.#Isaías 40:13; Jeremías 23:18. 36Yutol masanil tzettaj yetal, jaꞌ bꞌey Dios chi tita. Jaꞌ Dios jix waꞌnen masanil tzettaj yetal, catuꞌ chi yakꞌon canoj, yet watxꞌ chi txeclo el swatxꞌil Dios. Miman ojabꞌ yeloc apnoj Dios yin tobꞌalkꞌinal. Amén.
© 2016, Wycliffe Bible Translators, Inc. All rights reserved.