Romanos 13
13
Jaꞌ Tzet Yopiso Gobierno
1Jijem ojabꞌ chi kute cu bꞌa cu masanil tet ebꞌ yaaw, yutol jaꞌ Dios chi aon oc ebꞌ yin yopiso. Jaꞌ Dios chi aon oc yopiso ebꞌ, ta cꞌamaj, cꞌam junoj ebꞌ ey yopiso. 2Yuxan, ta ey mac cꞌam chi jijen tzet chi yal ebꞌ yaaw tuꞌ, chi yal yeloc apnoj, tol jaꞌ tet opiso abꞌil can ey yich yu Dios cꞌam chi sjije ebꞌ. Catuꞌ jacꞌal oc chi iꞌontej sjowal scꞌul jun ley cꞌam chi sjije tuꞌ yibꞌan. 3Yutol jaꞌ ebꞌ yaaw tuꞌ, eyoc yopiso ebꞌ, yu xiw ebꞌ cꞌam swatxꞌil sbꞌeybꞌal tet ebꞌ. Man yu oj xiw ebꞌ watxꞌ cꞌal tzet chi el yunen tet ebꞌ, yuxan eyoc yopiso ebꞌ. Yuxan, ta chi koche cꞌam chi cu xiw tet ebꞌ, watxꞌ ojabꞌ cꞌal chi kute cu bꞌeybꞌal tet ebꞌ. Ta watxꞌ cꞌal chi kute cu bꞌeybꞌal, chi tzala ebꞌ ketoj. 4Eyoc yopiso ebꞌ yu Dios yu swatxꞌiloj masanil ánima. Ta pena pax tzet chi el kuneni, smoo chi cu xiw tet ebꞌ. Yutol ey yopiso ebꞌ yaon oc syaꞌilal kibꞌan. Yutol eyoc yopiso ebꞌ yu Dios yakꞌon syaꞌilal tet mac pena tzet chi el yuneni. 5Yuxan jijewej tzet chi yal ebꞌ yaaw tuꞌ. Man asanne oj yutol chi cu xiw yaon oc syaꞌilal ebꞌ kibꞌan, yuxan chi cu jije, yu ojabꞌ pax tol kotaj tol jaxca tuꞌ chi ẍaꞌ scꞌul Dios, yuxan chi cu jije tet ebꞌ. 6Yuxan, sowalil chi kakꞌ cu toolabꞌal jaxca chi yal ley, yutol jaꞌ Dios anen oc yopiso ebꞌ, catuꞌ lalan yunen yopiso ebꞌ tuꞌ.
7Yal cꞌal bꞌeytet yaawil chi skꞌanel tumin kin, catuꞌ ta jaxca tuꞌ yalon ley, kakꞌwej tet. Caxcꞌal cu boleto, ma junoj cu licencia, cu toolane jaxca yalon ley. Smoo chi cu xiw tet ebꞌ yaaw tuꞌ. Smoo ey yeloc apnoj ebꞌ yul cu sat. 8Ta ey bꞌey ey cu jec, kakꞌwej paxoj. Ey jun tujan jaxca tol cu jec yeoc tet ebꞌ ket animail, jaꞌton cu camcꞌulal. Yutol sowalil chi cu camcꞌulne cu bꞌa. Ta chi cu camcꞌulne cu bꞌa, chi yal yeloc apnoj tol lalan cu jijen sley Dios masanil. 9Ey wan ẍejbꞌanil Dios chi alon jaxca tiꞌ: “Manche je yaoc je mul yul skꞌabꞌ je yistil, ma yul skꞌabꞌ je yichamil. Manche jex makꞌwi cam ánima. Manche jex elkꞌanwi, manche je xijwi kꞌane yin je yet animail. Manche nanon oc je cꞌul yin junoj tzetyetal,” ẍi wan ẍejbꞌanil Dios tuꞌ.#Éxodo 20:13-15, 17; Deuteronomio 5:17-19, 21. Jaꞌ wan jix waltej tiꞌ, cꞌal wanxa, chi sjunbꞌane ey sbꞌa yin jun ẍejbꞌanil tiꞌ. “Camcꞌulnewej je yet animail jaxca che yute je camcꞌulnen je bꞌa junjun jex.”#Levítico 19:18. 10Jaꞌ mac chi scamcꞌulne yet animail, cꞌam chi yun junoj penacꞌulal tet yet animail tuꞌ. Yuxan, ta ey cu camcꞌulal yin ebꞌ, chi cu jije masanil sley Dios.
11Tol chi wal pax junxa tiꞌ ey jex. Otajnewej el tzet yeoc jun tiempoal tiꞌ tinaniꞌ. Yutol jaꞌ tinaniꞌ, stiempoal xa chi el cu weyan, yutol janicꞌxane tiempo catuꞌ chi cu colcha eloj. Man jaxca oj yet yalantoj, yet jix bꞌabꞌi kaoc cu cꞌul yin Cristo. 12Jaꞌ jun tiempoal tiꞌ tinaniꞌ, jaxca tol akꞌbꞌalil tocꞌal, jaxa yet oj cu colcha el tuꞌ xin, jaxca tol oj sajbꞌoj eloj. Yutol caw eyman chi ecꞌ tiempo tinaniꞌ. Janicꞌxane catuꞌ chi juli. Yuxan chi ojabꞌ cu bꞌejcan wan spenail jaxca chi el yunen ebꞌ ánima xol kꞌejkꞌinal. Jaxca ojabꞌ chi yute yakꞌon jowal junoj soldado yetoj smitxꞌkꞌabꞌ, jaxca ojabꞌ tuꞌ chi kute kakꞌon kip yin yet Dios. Yutol jaxca tol xol sajkꞌinal eyxa cu pixan. 13Jaxca ojabꞌ ebꞌ watxꞌ chi yute ecꞌabꞌ sbꞌa yet cꞌualil, jaxca ojabꞌ tuꞌ chi kute cu bꞌa. Jichan ojabꞌ cꞌal chi kute cu bꞌeybꞌal yil ánima. Manche cu oc uqꞌuem anil. Manche cu wejlabꞌi. Manche cu oc yin amulal, manche el kunen junojxa tzet man watxꞌoj yetoj cu mimanil. Manche kakꞌle jowal yetoj junojxa mactxequel. Manche kanabꞌ oc cu cꞌul yin junoj mactxequel. 14Sowalil chi cu chaꞌ yipalil Jesucristo jaxca chi yun junoj soldado yet chi ẍaꞌon smitxꞌkꞌabꞌ yet jowal, jaxca tuꞌ chi yun cu colon cu bꞌa yetoj yipalil, catuꞌ manche xa kaoc cu naꞌbꞌal yin wan pena chi yoche oc cu pena ochwanilal.
© 2016, Wycliffe Bible Translators, Inc. All rights reserved.