Sirak 20
20
Save long taem fo tok
1Sapos yu wande givim advaes, yu mas tingting gud fastaem. Samfala taem hemi gud fo stap kuaet nomoa an no tok. 2Bat hemi gud fo yu givim advaes long man winim taem yu kipim kros blong yu fo boelap insaet long bele blong yu. 3Yu mas talemaot taem yu rong mekem yu no meksem long yu seleva bihaen. 4Sapos yu traem fo fosim tingting blong yu fo yu win, hemi olsem wanfala man wea olketa aotem finis tufala bol blong hem, an hemi traehad fo kasholem wanfala yang gele fo durong wetem hem. 5Samfala pipol yumi tingim olketa waes bikos olketa no toktok tumas. Bat samfala pipol i toktok tumas an pipol i les long olketa. 6Samfala pipol i stap kuaet bikos olketa no garem enisamting fo talem. Bat samfala i stap kuaet bikos olketa save long raet taem fo tok. 7Man hu hemi waes bae hemi no tok go-go kasem raet taem blong hem fo tok. Bat man hu hemi krangge, hemi no save long raet taem olsem. 8No eniwan hemi laekem man hu hemi toktok fo longtaem tumas, an hemi no givim taem fo narafala pipol fo tok moa.
Olketa samting save sens
9Samfala taem, hemi gud fo no garem enisamting, an samfala taem, plande samting wea man hemi garem save spoelem hem tu. 10Samfala taem, hemi nogud fo givim samting long narafala pipol, bat long narafala taem, God bae saotem yu moa winim wanem yu givim. 11Samfala taem biknem save meksem long man, bat samfala man i garem biknem bikos olketa mekem olketa seleva fo stap lou. 12Samfala taem wanem yu tingim man save baem nomoa long lelebet seleni, bae hemi lusim staka seleni long hem. 13Taem man wetem gudfala tingting hemi tok, plande pipol nao wande herem. Bat nomata evri suit toktok wea wanfala krangge man hemi talem, hemi nating save helpem hem lelebet. 14Sapos krangge man ya hemi givim yu wanfala samting, no eni gud samting nomoa bae hemi kamaot long hem. Hemi nating impoten nomoa olsem wea man ya hemi tingim. 15Hemi nating save givim nomoa enisamting. Bat taem hemi tokspoelem narawan, bae hemi singaotem mekem evriwan save herem. Sapos hemi letem kaon fo yu tude, bae hemi askem yu fo sensimbaek tumoro. (?Waswe, yu no les long kaen man olsem?) 16Bihaen, bae krangge man ya hemi tok olsem, “No eniwan nao hemi laekem mi. An no eniwan hemi hapi long wanem mi duim fo olketa. Olketa tekem nomoa wanem mi givim, bat olketa gohed fo tokabaotem mi taem mi no stap.” 17Ya, hemi tru toktok, evri pipol bae i gohed fo mekfan long hem olowe.
Toktok wea hemi no stret
18Fo yusim tang long ravis wei, hemi barava nogud moa winim taem yu bangam lek long rod an foldaon. Kuiktaem nomoa bae ravis samting hemi kasem olketa nogud pipol, olsem man bangam lek an foldaon. 19Man wea wei blong hem hemi nogud tumas, hemi olsem ravis stori wea olketa krangge pipol save storim olowe. 20No eniwan wande herem waes toktok, taem wanfala krangge man hemi talem long rong taem. 21Nomata yu pua tumas an yu no duim enisamting rong, bat yu save slip gud nomoa long naet bikos tingting blong yu hemi klia gud. 22Sapos yu stap kuaet frant long olketa krangge pipol, olketa pipol bae no tinghae long yu. 23Sapos yu mekem laea promis long fren blong yu bikos yu sem tumas fo talem no long hem, yu mekem hem fo kamap enemi blong yu nao. 24Fo laea, hemi wanfala ravis wei, bat pipol hu i no garem save, i duim olowe nomoa. 25Man hu hemi save stil hemi gud moa winim man save laea olowe, bat tufala evriwan i gohed long dae blong tufala. 26Man hu hemi laea, hemi no garem eni biknem. Ya, bae hemi stap olowe nao long sem.
27Yu talem waes toktok, an bae yu gohed gudfala. Man hu hemi garem gudfala tingting, hemi hapi long wanem hemi stret. 28Sapos yu mekem olketa bikman fo hapi wetem yu, bae olketa no kaontem nao olketa rong blong yu. 29Olketa gif an olketa gudfala samting wea pipol i sugam man hu hemi waes, hemi save mekem man ya fo no lukim wanem hemi tru. Olketa wei olsem hemi stopem hem fo no jaj long stretfala wei. 30Waes wea hemi staphaed, an seleni wea olketa haedem, tufala evriwan i iusles nomoa. 31Man hu hemi haedem krangge wei blong hem, hemi gud winim man hu hemi haedem waes blong hem.
Currently Selected:
Sirak 20: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.