Sirak 21
21
Sin
1Pikinini blong mi. ?Waswe, yu sin finis nao? Yu no duim moa. Askem Lod fo fogivim wanem yu duim finis. 2Yu mas stap farawe long sin olsem wea yu stap farawe long wanfala snek. Sapos yu go kolsap tumas long sin, bae hemi baetem yu olsem wanfala laeon an bae hemi spoelem yu. 3Evri nogud wei hemi olsem naef fo faet wea hemi sap long tufala saet. Sapos hemi kasem man, no eni meresin nao save kiurim. 4Sapos man hemi praod tumas an mekem pipol fraet, bae hemi lusim evrisamting wea hemi garem.
5Taem#Sirak 35:17-19. olketa pua pipol i prea, God hemi herem olketa an hemi kuiktaem fo ansarem prea blong olketa.
6Sapos yu les fo herem advaes, yu barava rong tumas nao ya. An sapos yu tinghae long Lod, bae yu save sensim gud wei blong yu. 7Wanfala man hemi toktok gud tumas, bat taem hemi tok rong, man wetem gudfala tingting hemi heresave nomoa. 8Man hu hemi kaonem seleni fo bildim haos blong hem, hemi olsem wea hemi hipimap olketa ston fo grev blong hem seleva. 9Olketa hu i no tinghae long Lo blong Lod, olketa olsem hip long drae gras. Bae faea hemi bonem olketa kuiktaem nomoa. 10Rod wea olketa pipol hu i sin i falom, hemi stret an smut, bat hemi lidim olketa go long ples blong olketa man dae.
Waes an ravis wei
11Eniwan hu hemi wande falom Lo blong Lod, hemi mas save wanem Lo ya hemi minim. Sapos yu tinghae long Lod, bae yu garem waes. 12Yu mas garem save bifoa yu save lanem enisamting. Bat sapos man no save, an hemi jes wande somaot nomoa wea hemi garem save, diskaen samting ya nao save mekem pipol kros tumas. 13Save blong waes man hemi olsem riva wea hemi no save drae. Hemi ran olowe, olsem man wea hemi givim gudfala advaes.
14Tingting blong krangge man hemi olsem baol wea hemi garem hol. Enisamting wea hemi lanem save lus kuiktaem nomoa. 15Taem wanfala waes man hemi herem eni waes toktok, hemi barava tinghevi long disfala toktok ya. Bat taem wanfala krangge man hemi herem, bae hemi les fo herem, an fogetem kuiktaem nomoa. 16Hemi gud tumas fo herem toktok blong olketa hu i garem save, bat taem wanfala krangge man hemi tok, hemi olsem taem man hemi karim wanfala hevi samting long solda blong hem. 17Evri pipol bae i wiling tumas fo herem toktok blong man hu hemi garem save, an bae olketa tinghevi long toktok blong hem.
18Waes hemi iusles nomoa fo krangge man hu i no save tingim wanem hemi save finis. Waes fo krangge man ya, hemi olsem wanfala haos wea hemi gohed fo roten. 19Fo krangge man, wei fo lanem samting hemi olsem sen wea olketa taengem long han an lek blong hemi. 20-21Bat fo olketa waes pipol, gudfala tising hemi olsem gol sen wea olketa hangem long solda blong olketa. Pipol hu i waes save laf smolfala nomoa, bat krangge man hemi save laf bikfala tumas. 22-23Krangge man save lukgo insaet long doa long haos blong narafala pipol, an save wakabaot stret go insaet long haos. Bat olketa waes man i save long gudfala wei fo tinghae long pipol, so olketa weit nomoa long aotsaet. 24Fo stanap haed bihaen long doa fo herem stori blong pipol, hemi ravis wei. Olketa gudfala pipol save sem tumas fo duim diswan.
25Samfala pipol save toktok tumas abaotem samting wea hemi nating tasim olketa. Bat olketa waes pipol save tingting gud fastaem bifoa olketa tok. 26Krangge man talem wanem hemi kamap long maen blong hem. Bat olketa waes pipol save tingting fastaem bifoa olketa tok.
27Taem wanfala nogud man hemi askem trabol fo kasem olketa enemi blong hem, hemi askem trabol fo kasem hem seleva. 28Ya, man hu stori nogud abaotem narafala pipol hemi spoelem hem seleva, an evriwan hu i stap kolsap long hem i les long hem.
Fo les
Currently Selected:
Sirak 21: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.