Sirak 19
19
1Man hu hemi drang olowe,
bae hemi nating save kamap ris.
Eniwan hu hemi nating save wari
long olketa smolfala samting,
bae hemi spoelem hem seleva.
2Fo laekem drang long waen
an fo laekem olketa woman,
save mekem olketa man hu i garem gudfala tingting
fo duim olketa krangge samting.
An man hu hemi slip tugeta wetem olketa jiukong woman,
hemi nating save lukaftarem hem seleva gudfala nao.
3Kaen wei wea man
hemi nating save wari olsem,
bae hemi kilim hem dae.
An taem hemi dae,
bodi blong hem wea hemi roten
olketa wom bae kaikaim.
4Hemi krangge samting tumas nao
fo yu kuiktaem trastem toktok blong narafala pipol.
An taem yu sin,
yu spoelem yu seleva.
5Sapos yu hapi long olketa nogud wei olsem,
bae Lod hemi panisim yu.
No stori nogud abaotem naraman
6Sapos yu stori nogud abaotem narafala man, bae plande nogud samting hemi kasem yu. 7Sapos yu storim moa wanem yu bin herem, bae yu sore bihaen. 8Yu mas no talemaot moa long olketa fren blong yu o olketa enemi blong yu. Bat sapos hemi rong fo yu kipim stori ya fo yu seleva, yu mas talemaot nao. 9Sapos eniwan hemi herem yu talemaot nogud stori ya, bae hemi tingimbaek an no longtaem hemi les long yu nao. 10?Waswe, yu herem eni kokonat nius? Sapos yu herem, letem yu seleva nomoa save. Samfala taem bae hemi mekem yu wari tumas, bat tingting blong yu mas strong an yu no wari long hem. 11Eni krangge man hu hemi trae fo haedem stori olsem, bae hemi soa long hem olsem woman hu hemi redi fo bonem pikinini. 12Enitaem hemi herem kaen stori olsem, hemi soa long hem olsem wanfala aro hemi pas insaet long lek blong hem.
13Sapos yu herem dat wanfala fren blong yu hemi duim samting rong, askem hem abaotem. Maet stori ya hemi no tru. An sapos hemi tru, bae hemi no duim moa. 14Sapos yu herem dat wanfala fren hemi talem wanfala samting wea hemi no fitim fo talem, askem hem abaotem. Maet hemi no talem nomoa ya. An sapos hemi talem tru, bae hemi no talem moa. 15Sapos yu herem eni nogud samting abaotem wanfala fren, askem hem abaotem. Nogud olketa laea nomoa long hem. No bilivim evrisamting wea yu herem. 16Samfala taem wanfala man maet talem wanfala samting, bat hemi nating minim nomoa. Maet wanfala taem long laef blong yumi, yumi evriwan save duim samting rong olsem. 17-19Sapos yu herem wanfala samting wea hemi mekem yu kros long wanfala man, askem hem abaotem bifoa yu mekem hem fraet. Sapos nomoa, letem disfala samting ya fo Lod hu hemi hae tumas fo hemi stretem falom Lo blong hem.
Luksave long Tru Waes
20-21Tinghae long Lod an falom Lo blong hem. Hem nao Tru Waes. 22Sapos yu save evrisamting abaotem nogud wei, diswan nao hemi nating save mekem yu waes. Hemi no stret fo falom advaes blong olketa man blong sin. 23Samfala taem pipol yusim save blong olketa fo duim olketa ravis samting. An samfala pipol moa i duim olketa samting nogud olsem krangge man bikos olketa no save enisamting wea hemi gud. 24Man hu hemi tinghae long Lod, nomata hemi no kleva, hemi gud winim man hu hemi kleva tumas. 25Samfala taem pipol olketa kleva tumas bat olketa save laea tu, an olketa save yusim gudfala wei blong yu fo garem wanem olketa laekem.
26Samfala nogud pipol save mekem olketa seleva fo luk olsem olketa sore tumas long yu, bat olketa trae fo laea nomoa long yu ya. 27Bae olketa tanem baeksaet go long yu mekem olketa luk olsem olketa nating herem yu, bat bae olketa spoelem yu long taem yu no save nomoa. 28Sapos olketa no duim eni nogud samting long distaem, bat bae olketa faendem wanfala gud taem fo duim long yu bihaen. 29Yu mas lukluk gud long pipol, bae yu luksave nomoa watkaen man nao hem. Fastaem yu mitim hem, bae yu luksave nomoa long hem, sapos hemi gud o hemi nogud. 30Wei wea hemi werem kaleko, an laflaf an wakabaot, hemi somaot klia nao wei blong hem.
Currently Selected:
Sirak 19: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.