Matthew 22

Yakꞌuz kꞌuneꞌ whulꞌen-un, ꞌet lerwe ooyeꞌ ooꞌat whutaleh-un, ꞌet ndultꞌoh

1ꞋEt doo cha za Jesus be nawhutnuk-i, ꞌi be whutsꞌodulꞌeh-i, ꞌi be bubulh yalhduk whe ꞌet ndúbulhni: 2“ꞋEt yakꞌuz kꞌúneꞌ whulꞌen-un, ndiz unꞌa njan dóohoontꞌoh, ꞌilhoghun lerwe ooyeꞌ ooꞌat whutaleh, ꞌet huba lhadútitneh. 3ꞋInkꞌez bughu nuséyane, dude ꞌulhnane butsꞌu whe balhꞌaꞌ, ꞌanih ubuhudóniꞌ ha, ꞌet hoontsꞌi buchꞌa tséhudisnih.

4ꞋEt doo cha za ꞌuyoonne dude ꞌulhnane whuz whilhꞌaꞌ. Ooghu nusjane sba budohniꞌ, ‘ꞋAwet tꞌalh-i lhadíntꞌoh. Musdoos nilhkꞌa-i tsꞌiyawh sba huyanghan dune yutiꞌulh whuba. Tsꞌiyai lhadíntꞌoh. Lhghuskene bubulh naꞌuztitꞌulh. Diz áhdulh! sba budóhniꞌ.’

5ꞋEt hoontsꞌi bugha nusjane buba ꞌantsꞌi ꞌuhoontꞌoh. Tsꞌiyawh lhelhtsꞌun whe hándil. Whulohne cha háꞌ hunulhyeh tsꞌe whenáhidil. Whulohne cha bube ꞌutꞌen kꞌoh whuzꞌai tsꞌe whenáhidil. 6Whulohne lerwe be ꞌulhnane ubihílhchoot ꞌinkꞌez dzoh neꞌbuhalhꞌen ꞌinkꞌez ubuhanghan. 7Lerwe whulh ꞌúdantsꞌo whe tube hunílchꞌe. Lhuganne ubutꞌine tsꞌiyawh whuz whe balhꞌaꞌ. Be ꞌulhnane inghanne, tsꞌiyawh musai ꞌubulhtsi ꞌinkꞌez bukeyoh hodálhkꞌun.

8ꞋEt hukwꞌelhꞌaz de ꞌulhnane, ꞌubulhni, ‘ꞋAwet naꞌtitꞌúlh-un lhaoodintꞌoh, ꞌet hoontsꞌi ooghu nusjane ꞌaw huba soo lheꞌhildzooꞌ.’ 9ꞋEt huwa ti tsꞌóhdulh. Lhane cho nahla de, ꞌenne tsꞌiyawh bughu nóhdilh. 10ꞋEt be ꞌulhnane ti tsꞌe whehandil. Mbene la nabuhinlane, ntsiꞌne ꞌinkꞌez unzoone tubulh ꞌalhgoh tsꞌiyawh whusábahanla. ꞋEt naꞌhutitꞌulh-un yoh whudizbun.

11ꞋEt lerwe butsꞌó whusainya ooghu nusjane ubuntilhꞌelh ha. ꞋIlhoghun dune ꞌaw naih dune lhghu dilhtsꞌi whunaih be dune lhiloh whe yutilhꞌen. 12ꞋEt ꞌuyulhni, ‘Skꞌeke ꞌaw dune lhghu dilhtsꞌi whunaih be dune lhinloh. Ntsꞌenꞌa danínya?’ ꞋInkꞌez ꞌaw whé ꞌoodoniꞌ-un hoolel.

13ꞋEt lerwe duba neꞌutꞌenne ubúlhni, ‘Ndun dune ulhchoot ꞌinkꞌez ꞌulhghel. ꞋAz tsalhgus yo tsꞌe táhneh! Whuz titso ꞌinkꞌez dughoo lhudookꞌus si.’

14Njan ꞌet ndutni whe ꞌutni, lhane ghu nusja ꞌet hoontsꞌi ntsꞌitneyaz za ꞌutahálya.”

Yun kꞌelha huhoolhꞌi-un hukwaꞌ hoodulhkut

15ꞋEt ꞌawet Phariseene ꞌudun nehúnindil ꞌinkꞌez howu yahalhduk, ntsꞌenꞌa la Jesus ye yalhduk-i, ꞌi be hitilhgooh hukwaꞌ hutꞌen. 16ꞋEt whe Phariseene bugha hodilhꞌeꞌne ꞌinkꞌez Herod didowhne cha, Jesus tsꞌe whebuhalhꞌaꞌ. ꞋEt nduhúyulhni, “Dune hodulhꞌeh-un tꞌetsꞌoninzun nyun tsꞌihꞌun dune ꞌintꞌoh ꞌinkꞌez khuni ꞌalha ꞌuntꞌoh-i be Yakꞌusda kꞌunꞌa dune hodilhꞌeh. Tsꞌiyanne mba lhgha ꞌintꞌoh. Dune dahótꞌen ꞌet hoontsꞌi mba ꞌantsꞌi ꞌuhoontꞌoh. 17ꞋEt huwa nedini, yun hikꞌelha huyilhꞌi-i, ꞌet tsꞌihꞌun tilah ꞌuhoontꞌoh whe lerwe Ceasar ꞌen tilah ooba ꞌukꞌelha tsꞌuyolhꞌeꞌ, kꞌus ꞌawúndooh tilah? Daja ninzun?”

18ꞋEt hoontsꞌi Jesus tꞌeooninzun ntsꞌenꞌa la hoontsiꞌ kꞌoh tsꞌe hoontꞌoh, ꞌet huwa ꞌubulhni, “ꞋEt di ha soo zúlhtsꞌi? Nohni duba naꞌudzooꞌne ꞌahtꞌoh! 19Deꞌ nyoo sooniya snalhtsꞌet nahꞌa!” ꞋIlho sooniya tsꞌuditiꞌ-i hitlꞌa húyanꞌai. 20ꞋEt ꞌubulhni, “Mbe oonin ꞌinkꞌez booziꞌ cha ookꞌusguz?”

21“Lerwe Caesar,” huyulhni. ꞋEt ꞌúbulhni, “Ndai la lerwe Ceasar oochꞌeꞌ, ꞌi ootlꞌa náyahle. ꞋInkꞌez ndai Yakꞌusda oochꞌeꞌ, ꞌi Yakꞌusda ootlꞌa náyahle.”

22ꞋEt hidantsꞌo whe tsꞌiyawh buba hooncha ꞌinkꞌez hichꞌa nasdil.

Nat tsꞌuhítnaih huwun huyoodulhkut

23ꞋEt dzin za Sadduceene, highu nindil. ꞋEnne ꞌuhutni datsꞌúzsai ꞌinkꞌez ꞌaw natsꞌuhótnah ꞌaítꞌoh. 24Hiyoodulhkut, “Dune hodulhꞌeh-un Moses njan ndutni, dune ꞌaw buzkeh hooloh whe dazsai ꞌinkꞌez ooꞌat khuna de, ꞌet bulhutsin ꞌen yughu naoodaꞌ hubaꞌ hoontꞌoh. Bulhutsin ꞌen dughe inleꞌ yughu nasda de, dulhutsin ba buzkeh whutaleh. 25ꞋEt netoh lhtakꞌantꞌine lhulhutsinke, ꞌen ꞌudetso whudilhdzulh-un, ꞌat ꞌutꞌi. ꞋInkꞌez ꞌaw buzkeh hooloh whe dazsai. Duꞌat dulhutsin ba nayoosdzi. 26Búlh nane cha dazsai. Bulh tat-un, ꞌen cha whuz unꞌa za ꞌuja. ꞋEt dúwhulyiz whe lhtakꞌantꞌine tsꞌiyawh yahadla. 27ꞋUdekꞌez tsꞌeke ꞌen cha dazsai. 28ꞋEt huwa nedini ꞌilhudzin whusaootiltsꞌulh whe tsꞌiyanne dunadutádulh, ꞌoh de tsꞌeke mbe ooꞌat tileh? Lhtakꞌantꞌine tsꞌiyawh highudaltsiꞌ.”

29ꞋEt Jesus ndúbulhni, “Naꞌnihtꞌah! ꞋAw Yakꞌusda ooghuni tꞌenuzahzun. Ye ulhtus-i cha ꞌaw tꞌenuzahzun. 30ꞋEt dzin dune dunadidil de, ꞌaw lhghu lhodutalhtsꞌil. Dune dunadidilne, Yakꞌusda oolizas kꞌunꞌa ꞌuhutitꞌelh wheꞌ hoontꞌoh. 31ꞋEt hoontsꞌi yaidlane dunadutádulh-un huwun, Yakꞌusda daja ni, ꞌaw eh hukwꞌu yalhuzulhduk? Njan ndutni, 32‘Si Abraham, Isaac, ꞌinkꞌez Jacob, buYakꞌusda ꞌustꞌoh.’ ꞋAw yaidlane buYakꞌusda iloh ꞌuntꞌoh. Khunane buYakꞌusda unli ꞌet huwa.”

33ꞋEt ꞌilhunaoosdilne dahoontꞌoh huwun budaniꞌ whe tube buba hooncha.

ꞋIlho khuni ꞌukꞌenus diztiꞌ-i netlꞌa ídanꞌai

34ꞋEt Phariseene whulh ꞌúhudantsꞌo ntsꞌenꞌa la Jesus Sadduceene buze whudanaꞌninꞌai ꞌet ꞌilhoꞌ hozdil. 35ꞋEt ꞌilhoghun butoh-un, ni moodih unli-un, Jesus yóolhdzih whe yoodulhkut, 36“Dune hodulhꞌeh-un kꞌus undai khuni la kꞌus diztiꞌ-i neba yutulhúhizyeꞌ?”

37ꞋEt Jesus ndúyulhni, “‘Yakꞌusda nyuMoodihti ndzi ndulcho-i be cha, nzul ndulcho-i be cha, nyeni tsꞌiyawh ꞌi be cha, tsꞌiyawh be ookꞌeoonsiꞌ.’ 38Ndi nohba yutulhuhizyeꞌ-i, ꞌi ꞌudechoo ꞌinkꞌez ꞌukꞌenus diztiꞌ-i ꞌuntꞌoh. 39ꞋEt bulh nanki, ꞌi ꞌudechoo-i kꞌunꞌa ꞌuntꞌoh whe ndiz unꞌa njan ndutni, ‘ꞋEt dahoontꞌoh hukwꞌunꞌa nyunchꞌoh kꞌenaintsiꞌ, whuz unꞌa za nyulh dune bukꞌeoonsiꞌ.’ 40Ndi nanki khuni nohtlꞌa díltsꞌut-i, ꞌi be Moses be ꞌudustlꞌus cha ꞌinkꞌez nus hooꞌenne bubeꞌ ꞌudustlꞌus cha, ꞌi tsꞌiyawh yoh ookꞌut whuzꞌai-i, ꞌi leꞌ ꞌuntꞌoh.”

Christ mbe unli-un ꞌuntꞌoh?

41ꞋAwhuz ndunne Phariseene ꞌilhunahosdil whe Jesus uboodulhkut, 42“Christ mbe unli-un ꞌuntꞌoh nahzun? Mbe tsꞌu hainzut-un suba ꞌuntꞌoh?” “ꞋEn David tsꞌu hainzut-un ꞌuntꞌoh,” huyulhni.

43ꞋEt ubúlhni, “Ntsꞌenꞌa David Ndoni be nyun sMoodihti ꞌintꞌoh nyudúsni ni whe ꞌet njan ndutni,

44‘Moodihti ꞌen sMoodihti ꞌuyulhni,

nailhni tsꞌunkꞌus sinda ꞌoh de la nchꞌaz ditnine bukꞌut nke naóolhyis mba ubooselh.’

45David, ‘SMoodihti,’ yulhni de, ntsꞌenꞌa suba ꞌen ootsꞌuhainzut-un ooleꞌ?” 46ꞋAw dune yutsꞌu yatoolhdihne hooloh. ꞋEt tsꞌiyanne whe hunuljut whe ꞌaw ꞌon ꞌun huyoodolhkut ꞌaitꞌoh.

Currently Selected:

Matthew 22: crx

Highlight

Copy

Compare