Matthew 23

Moses be ꞌudustlꞌus ꞌukꞌu nunáguzne ꞌinkꞌez Phariseene cha, ꞌenne dawhultsiꞌ-un ꞌet butsꞌu hooltsꞌulh

1ꞋEt Jesus ꞌilhunaoosdilne ꞌinkꞌez yugha hodulꞌehne cha bubulh yawhenilhduk whe ndutni, 2“Moses be ꞌudustlꞌus ꞌukꞌu nunáguzne ꞌinkꞌez Phariseene, dune hodutilhꞌeh ꞌet wheni Moses yukꞌusda-i kꞌut hudiltsꞌiꞌ. 3ꞋEt huwa khuni hiye nohbulh yalhduk-i, tsꞌiyawh hólhchoot ꞌinkꞌez bukꞌúneꞌ oohtꞌen. ꞋEt hoontsꞌi khun bukꞌunꞌa neꞌóohtꞌen junih. Daja hutni-un, ꞌoh te nulhéꞌhustꞌen ꞌet huwa. 4ꞋEt diz unꞌa néꞌhutꞌen, lhai cho lhunuhúlhꞌoo tube howa whulnaꞌ dune neyúghe huba. Dune buwus kꞌehúyile. ꞋEt hoontsꞌi didut dulasga ꞌilho hoontsꞌi nahayoolhnaꞌ ꞌaitꞌoh.

5ꞋUtꞌen ꞌuhuyulhꞌen-i, ꞌi hiyoonne yunoolhꞌen huba za ꞌuhuyulhꞌen. ꞋInkꞌez Yakꞌusda ooghuni zus, Phylacteries huyulhni, ꞌon nus ncha huyilhꞌi tsꞌiyanne hinoolhꞌen ha. ꞋInkꞌez luglok tenahududli te nahuyitsꞌuz-i, ꞌi cha ootso ꞌon nus ꞌudilyiz nahuyulhtsih. 6ꞋUhatꞌalh-un ꞌinkꞌez lugliz cha soo kꞌus hoonzoo-un ꞌet za hudutáltsꞌilh hukwaꞌ huninzun. 7ꞋInkꞌez ꞌutꞌalh-i be ꞌóoket-un, tsꞌiyanne hubodílhtiꞌ whe hadih buhutni, ꞌet huhóontꞌiꞌ. ꞋInkꞌez tsꞌiyawh ꞌilhoghun hinli whe, ‘Rabbi! Nehodulhꞌeh-un!’ huba hodóniꞌ hukwaꞌ huninzun.

8ꞋEt hoontsꞌi khun te ꞌuyoonne ‘Rabbi’ nohodóniꞌ junih! ꞋAw ꞌilhoghun za whunohodulhꞌeh-un hoonli ꞌet huwa, Christ ꞌen ꞌuntꞌoh. ꞋInkꞌez nohni tsꞌiyawh lhulhutsinke ꞌahli. 9Ndi yun kꞌut ꞌantsꞌi ꞌohne ‘ꞌubá’ budohneꞌ junih. ꞋAw ꞌilhoghun za nohBá unli ꞌet huwa, Yakꞌuz usda-un, ꞌen ꞌuntꞌoh. 10ꞋInkꞌez khun te ꞌuyoonne ‘nemoodih’ nohodóniꞌ junih. ꞋAw ꞌilhoghun za nohMoodihti hoonli ꞌet huwa, ꞌen Christ ꞌuntꞌoh. 11ꞋEt mbene la nohtoh unchane, nohba neꞌútꞌenne ooleꞌ. 12ꞋInkꞌez mbe la ncha naꞌdudilꞌi-un, ꞌen ꞌudeyo telꞌen-un tileh. ꞋInkꞌez mbe la ꞌudeyo ꞌududildzun-un, ꞌen ꞌudedo ncha-un tileh.

13ꞋEt hoontsꞌi nohni Moses be ꞌudustlꞌus ꞌukꞌu nunáguzne nohni Phariseene cha, duba naꞌudzooꞌne ꞌahtꞌoh! Dawhultsiꞌ-un ꞌet nohtsꞌu hóoltsꞌulh. Lerwe yakꞌuz usda-un, ꞌet whudáti dune chꞌa dánaꞌ dihtan. Nohnichꞌoh daóohyaꞌ ꞌaitꞌoh. ꞋInkꞌez mbene la whuz ꞌudulhne, ꞌenne cha ꞌaw dábohlelh ꞌaitꞌoh.

14Nohni Moses be ꞌudustlꞌus ꞌukꞌu nunáguzne, nohni Phariseene cha, duba naꞌudzooꞌne ꞌahtꞌoh! Dawhultsiꞌ-un ꞌet nohtsꞌu hóoltsꞌulh! Tsandilhne buyoh bugha ha oondunahtꞌah. Tenadudli ꞌi be whuz unꞌa za ꞌonilha saꞌ cho tenadahdli. ꞋEt huwa ꞌon nus ꞌuwhulcho whe nohba nahutideh. 15Nohni Moses be ꞌudustlꞌus ꞌukꞌu nunáguzne, nohni Phariseene cha, duba naꞌudzooꞌne ꞌahtꞌoh! Dawhultsiꞌ-un ꞌet nohtsꞌu hóoltsꞌulh! Yun kꞌut ndulcho whe náhdilh ꞌinkꞌez too kꞌut ndulcho whe nahke, ꞌilhoghun tilah nohnichꞌoh nohkꞌunꞌa ꞌuntꞌoh oolhtselh. Whuchꞌa nulhde de, ndun nat ꞌuwhultsiꞌ whe nohanus kwuncho yo whuyeꞌ tileh.

16Nohni hoos̱ꞌenne léꞌahtꞌoh, dawhultsiꞌ-un nohtsꞌu hóoltsꞌulh. Lheꞌahtꞌoh whuzihꞌen ꞌet hoontsꞌi dune ti whubuntilhtun hukwa ꞌahtꞌen. ꞋEt dune whubodulhꞌeh, lugliz whucho hooziꞌ be dune nahuhizya de, ꞌet ꞌantsꞌi ꞌuhoontꞌoh. ꞋEt hoontsꞌi lugliz whucho ꞌet gold ꞌinkꞌez silver bulh ꞌuhoolya, ꞌi be nahuhizya de, whuz unꞌa ꞌuhuhooleh hubaꞌ hoontꞌoh, dahni. 17Whusnine ꞌinkꞌez hoos̱ꞌenne ꞌahli! Ndet ꞌukꞌenus whudiztiꞌ? Lugliz whucho kꞌus gold bulh ꞌúhoolya-i, ꞌet tilah? Lugliz whucho ꞌet ꞌukꞌenus whudiztiꞌ. Gold bulh ꞌuhoolya-i, ꞌi ꞌantsꞌi Yakꞌusda ba ꞌudun nenínkat-i ꞌuntꞌoh. 18ꞋInkéz mbe la loodel be hoonliyaz whe yutsꞌu nahizya, ꞌet ꞌantsꞌi ꞌuhoontꞌoh. ꞋEt hoontsꞌi ꞌantsꞌi huwa tꞌaih-i, ꞌi loodel kꞌeyinꞌai, ꞌi be dune yutsꞌu nahizya de, ꞌet nduyóoleh hubaꞌ hoontꞌoh. ꞋEt whuz unꞌa dune whubodulhꞌeh. 19Whusnine ꞌinkꞌez hoos̱ꞌenne ꞌahli. Ndet ꞌukꞌenus whudiztiꞌ? ꞋAntsꞌi huwa tꞌaih-i tilah kꞌus loodel tilah? Loodel ꞌi ꞌukꞌenus diztiꞌ! ꞋAntsꞌet huwa tꞌaih-i, ꞌi loodel ꞌi gha Yakꞌusda oochꞌeꞌ suliꞌ ꞌet huwa. 20ꞋEt huwa mbe la loodel be hoonliyaz whe yutsꞌu nahizya, loodel ꞌinkꞌez ookꞌu yuzdla-i, ꞌi tsꞌiyawh be yutsꞌu nahizya. 21ꞋInkꞌez lugliz whucho ꞌet whe yutsꞌu nahizya-un, lugliz whucho ꞌinkꞌez Yakꞌusda ꞌet usda-un, tsꞌiyawh whe yutsꞌu nahizya. 22ꞋInkꞌez mbe la yakꞌuz whe yutsꞌu nahizya, Yakꞌusda yukwꞌutsꞌuzda cho diztiꞌ-i, ꞌinkꞌez yukusda-un, ꞌen be yutsꞌu nahizya.

23Nohni Moses be ꞌudustlꞌus ꞌukꞌu nunáguzne, nohni Phariseene cha, duba naꞌudzooꞌne ꞌahtꞌoh! Dawhultsiꞌ-un ꞌet nohtsꞌu hóoltsꞌulh! Ndai la ha níyeh-i, ꞌutꞌan sooltsun-i cha, anise huyulhni cha, ꞌinkꞌez cummin huyulhni, ꞌi cha, ꞌi ooloh za, 10%, Yakꞌusda ghahꞌaih. ꞋEt hoontsꞌi Moses be ꞌudustlꞌus kꞌut ꞌukꞌenus whudíztiꞌ-un, ꞌet tsꞌiyawh whula dihtnih. Ndiz unꞌa tsꞌihꞌun ꞌuhoontꞌoh. Ndet la tsꞌihꞌun unꞌa neꞌáhtꞌen-un, ye negha teꞌuntazeh-i cha, ꞌinkꞌez be néba ꞌalha ꞌuhoontꞌoh-i, ꞌi cha, njan ꞌet tsꞌiyawh whula dihtnih, whuz unꞌa ndóhtꞌen hubaꞌ hoontꞌoh, ꞌinkꞌez ꞌonghuni cha ꞌaw lhálhduzahle whe oola doohtnih junih. 24Whuzihꞌen ꞌet hoontsꞌi dune, ti whúbuntilhtun hukwa ꞌahtꞌen. Lheꞌahtꞌen, ndai ꞌahnai-i nizghes yé tatꞌo de, ꞌi ꞌukutilhtsus, ꞌet hoontsꞌi nohni khuna-i cho, camel huyulhni, ꞌantsꞌi leꞌ hoontꞌoh tilhnoh!

25Nohni Moses be ꞌudustlꞌus ꞌukꞌu nunáguzne, nohni Phariseene cha, nohni duba naꞌudzooꞌne ꞌahtꞌoh. Dawhultsiꞌ-un ꞌet nohtsꞌu hóoltsꞌulh! Lusyet ꞌinkꞌez lubot cha yoo ꞌaz tsꞌe tunáhgus. ꞋEt hoontsꞌi bez tsꞌe ꞌet ꞌuyoonne be béꞌ whulhtsꞌit-i, ꞌinkꞌez hukwaꞌ nahzun tuneꞌ ꞌahtꞌen ꞌet whe ꞌi be nohlusyet ꞌinkꞌez nohlubot te dizbun. 26Nohni Phariseene hoos̱ꞌenne ꞌahli! Lusyet ꞌinkꞌez lubot bulh ꞌudechoo bez tsꞌe tunáwhahgus ꞌet de la yoo ꞌaz cha ꞌaw lhditsun ooleꞌ.

27Nohni Moses be ꞌudustlꞌus ꞌukꞌu nunáguzne, Phariseene nohni cha, duba naꞌudzooꞌne ꞌahtꞌoh! Dawhultsiꞌ-un ꞌet nohtsꞌu hóoltsꞌulh! ꞋAntsꞌi tsꞌun kꞌut whuduchun ꞌudustlꞌus-i léꞌahtꞌoh. Yoo ꞌaz tsꞌe soo otꞌen, ꞌinkꞌez bez tsꞌe whudutsun ꞌinkꞌez dune tsꞌun be whudizbun. 28Dune nalh nohyustꞌe yoo ꞌaz tsꞌe tsꞌihꞌun dune unline dóhtꞌen. ꞋEt hoontsꞌi nohyo tsꞌe tsꞌihꞌun lheꞌahtꞌoh. Duba naꞌudzooꞌ ꞌinkꞌez ꞌukꞌú nulheꞌustꞌen-i cha, be whudizbun.

29Nohni Moses be ꞌudustlꞌus ꞌukꞌu nunáguzne, Phariseene nohni cha, duba naꞌudzooꞌne ꞌahtꞌoh! Dawhultsiꞌ-un ꞌet nohtsꞌu hóoltsꞌulh! Nohni nus hooꞌenne, ꞌenne buba tse bet ꞌahudutilhtelh-un ꞌuwhulhꞌen. ꞋInkꞌez tsꞌihꞌun ꞌuntꞌohne, ꞌenne butsꞌun kꞌut hoonzoo whulhtsi. 30ꞋInkꞌez njan ndudáhni, ‘ꞋUwhe ꞌoh daꞌ netsodaꞌne bubúlh tsꞌukhuna inleꞌ ndúcha. ꞋOh daꞌ tsꞌukhuna de, nus hooꞌenne buhughan daꞌ, ꞌaw bulaꞌ tsꞌootꞌen ꞌaitꞌoh inleꞌ.’ 31ꞋEt huwa ꞌi be nohnichꞌoh chꞌaz dahtni. Tsꞌiyanne whubunulhtun ꞌaw ꞌuyoonne nus hooꞌenne bubanghanne, nohni ꞌenne butsꞌu haíndene ꞌahli! 32ꞋEt ꞌutꞌen untsiꞌ-i nohbáke wheꞌ hidilhꞌen-un, tsꞌiyawh lhaóodahleh.

33Tlꞌughus lubezo buzkehke léꞌahtꞌoh! Kwuncho yo wheni nohba nahutideh-un, ntsꞌenꞌa ꞌutihnelh whenghoh táhdulh? Soo gak! 34ꞋEt hukwa soo cho soo zulhtsꞌai, nus hooꞌenne, dune whunihne cha, ꞌinkꞌez Yakꞌusda ooghuni hodulhꞌehne cha, tsꞌiyawh nohtsꞌú butisꞌalh. Whulohne butihghan. Tulalhgus ubunduntálhtꞌoh. Whulohne nohlugliz bez tsꞌe ꞌet ubootalhtsus. Lhelhdun keyoh nubuntihyulh ꞌinkꞌez dzoh nubutilhdzut. 35ꞋEt hukwa nohkꞌehootaltsꞌulh. Mbe tsꞌihꞌun ꞌuntꞌoh buzkaiꞌ yun kꞌut nájul, bughá ꞌutihnelh nohkꞌehootaltsꞌulh. ꞋOh daꞌ Abel ꞌen ꞌuja buzkaiꞌ yun kꞌut nájul. ꞋEt Zechariah buzkaiꞌ yun kꞌut nájul ꞌet whutsꞌun. ꞋEn Berechiah ooyeꞌ. ꞋEn lugliz whucho ꞌinkꞌez loodel eguz nohtsodaꞌne, hizilhghi inleꞌ. 36Tsꞌihꞌun unꞌa nohdusni ꞌandit whudilhdzulhne, nohni hukwꞌelha whutilhtselh whe ꞌahtꞌoh.”

Jerusalem whutꞌenne, ꞌenne bugha Jesus oodzi unduda suliꞌ

37“Nohni Jerusalem whutꞌenne, dáwhultsiꞌ-un nohtsꞌu hóoltsꞌulh! Nohni nus hooꞌenne ꞌahghan. ꞋInkꞌez nohtsꞌu tílhꞌaꞌne tse be bubahghan. Dantꞌoh la lugok duduzke dudintsꞌun be buboontun, whuz unꞌa nohni cha lhat-un whe ꞌilhunanohootásdlelh hukwaꞌ nuszun, ꞌet hoontsꞌi ꞌaw hukwa lheꞌnahzun. 38Soo cho whunulhꞌen, Jerusalem whutꞌenne nohkeyoh ꞌaw hoonli hooloh suliꞌ whe nohba ꞌet nenáwhultsꞌut, whuz unꞌa Yakꞌusda nohladutitnih. 39ꞋInka ꞌaw ꞌon ꞌun sulh tuzihꞌel. ꞋEt ndudútihnelh de za, ‘Mbe la Yakꞌusda booziꞌ be whusatíyalh-un, ꞌukꞌenus hoonzoo-un ootsꞌó tiltsꞌulh,’ ꞌet de za sutihꞌelh!”

Currently Selected:

Matthew 23: crx

Highlight

Copy

Compare