Matthew 21

Lhane huhoostꞌet whe Jesus keyoh Jerusalem tsꞌoozya

1ꞋEt ꞌawet Jerusalem whenghoh hidulh whe keyoh whuyaz Bethphage huwhutni-un, ꞌet whuz hoozdil. ꞋI dzulh enun, Olive huwhutni. ꞋEt Jesus nane yugha hodulꞌehne dutso whébalhꞌaꞌ 2whe ꞌubulhni, “Njan keyoh whuyaz nohanchꞌaz whuz ahꞌus. ꞋEt whuz oozahꞌaz de, ꞌet ꞌaho yeztliyaz, donkey huyulhni, ooyaz bulh whehudintꞌi, ꞌet la ubunoolhꞌen, kꞌunaboohꞌuk ꞌinkꞌez diz stsꞌún ꞌubutoolhdlooh. 3Dune nohoodulhkut de, ‘Di ha ꞌubulhꞌen?’ nohuwhútni de, ‘NeMoodihti yukaꞌ ninzun,’ dóhniꞌ. ꞋEt ꞌaho stsꞌun bula dutitnih.”

4ꞋEt whuz unꞌa ndi tsꞌiyawh ꞌoh tuneꞌ whustꞌen. ꞋI be nus honꞌen-un daja ni la, ꞌet ndulcho ꞌet ndúhooja ꞌet njan ndutni,

5“Zion ookeyoh whuti whutꞌenne,

whunulhꞌen! Nohlerwe teꞌdudilꞌen whe nohtsꞌu tiyalh.

Donkey ooyaz, ꞌen yukꞌusda.

ꞋEn be nohtsꞌu tiyalh.”

6Jesus yugha hodulꞌehne whuz whehanꞌaz, ꞌinkꞌez Jesus daja ubúlhni la, ꞌoh te néꞌhustꞌen. 7ꞋEt whuz unꞌa Donkey ooyaz bulh hitsꞌu boolhti. Dunaih hikꞌehíyinla ꞌinkꞌez ꞌon dus de Jesus hikꞌetlꞌa hidilhdaꞌ. 8Lhane dune dunaih ti hiba néhinilhbal ntsꞌoya la lhutiyalh-un. ꞋInkꞌez ꞌonghohne cha ꞌuzooschum nanehidutselh ꞌinkꞌez ti hiba nehídinla. 9ꞋEt ꞌawet ꞌilhunaoodilhne whulohne ootso ꞌinkꞌez whulohne ookꞌoh tsꞌe hidulh ꞌinkꞌez tube cho huhuyih whe nduhutni,

“David ootsꞌu haínzut-un ba tsꞌodilhtiꞌ!

NeMoodihti booziꞌ be whuz de úyalh.

ꞋEn ꞌukꞌenus hoonzoo-un oogha whultsꞌut.

ꞋEt soo yoodughi hidílhtiꞌ!” hutni.

10ꞋEt Jesus keyoh Jerusalem whuz oozya whe keyoh whutꞌenne khuna huntisdil whe ꞌulhodutni, “Ndun mbe whe ꞌuntꞌoh?”

11ꞋEt ꞌilhunaoosdilne hubuhútni, “Ndun ꞌen Jesus nus hooꞌen-un, ꞌen ꞌuntꞌoh. Keyoh Nazareth yun kꞌut Galilee whuzꞌai-un, whuz de hainya-un ꞌuntꞌoh.”

Lugliz whucho ooketne ꞌinkꞌez ꞌeꞌooketne, tsꞌiyawh Jesus tenabuninyoot

12ꞋEt ꞌawet Jerusalem bulugliz whucho whunaꞌniztlꞌoo-un daninya whe mbe la ooketne ꞌinkꞌez ꞌeꞌóoketne, tsꞌiyawh tenabuninyoot. Sooneya lhkꞌenadulene bulutab ꞌi cha tsꞌiyawh buchꞌa yun tizꞌai. Dutꞌaiyaz, dove huyulhni, be óoketne, ꞌenne bukwꞌutsꞌuda ꞌi cha buchꞌa yun tizꞌai. 13ꞋEt ubúlhni, “ꞋUkꞌehóoguz whe njan ndutni, ‘Njan syoh tenadudli bayoh dahni,’ ꞌet hoontsꞌi, ‘ꞋUndunutꞌihne, buyoh whuzúlhtsi.’”

14Lugliz whucho ꞌet hoos̱ꞌenne ꞌinkꞌez ookechun ndudane, highu nindil, ꞌet soo naꞌbalhꞌen. 15ꞋEt lubret bumoodihne ꞌinkꞌez Moses be ꞌudustlꞌus ꞌukꞌu nunáguzne, huwa ꞌítꞌen tuneꞌ ꞌustꞌen whe hinalhꞌen. ꞋInkꞌez tsꞌoodunne, cha lugliz whucho sulyahalhduk whe njan nduhutni, “David ootsꞌu haínzut-un ooba tsꞌodilhtiꞌ!” ꞋEt lubret ꞌinkꞌez ꞌonghunne cha honalhꞌen whe hukwa ha hunilchꞌe.

16ꞋInkꞌez Jesus nduhúyulhni, “Daja hutni la uboozílhtsꞌai eh?” ꞋEt ꞌubulhni, “A, ꞌinkꞌez dahúja-un ꞌaw hukwꞌu yalhuzusduk whe eh dahni? ꞋUkꞌehonguz whe njan nduwhutni,

‘Tsꞌoodunne ꞌinkꞌez tsꞌoodunne nulhyehne cha,

bughuni ꞌi beꞌ hutni, tsꞌihꞌun unꞌa sba hodilhtiꞌ ꞌubulhtsi.’”

17ꞋEt buchꞌa nasja ꞌinkꞌez keyoh whuti huwu whenája. ꞋInkꞌez keyoh whuyaz Bethany tsꞌoozya whe ꞌet inteꞌ.

Duchun mai ootsꞌu ha níyeh-i, ꞌi Jesus yekꞌé hanya

18ꞋEt ꞌom bun bundada keyoh whuti whuz hoozdulh whe ooyeꞌíltsꞌul. 19ꞋEt ti whuzih mai chun, fig huyulhni, yutilhꞌen. ꞋEt yutsꞌoozya ꞌaw oomaiꞌ ooghu hooloh. ꞋUtꞌan za ooghu hoonli whe ꞌuyulhni, “ꞋAw ꞌilhiz nyumaiꞌ hootáloh.” Ni ibulh duchun ꞌuyulhni-i dizgi.

Duchun, fig huyulhni, ꞌi be whutsꞌodutilꞌeh

20Yugha hodulꞌehne huyanꞌen whe tube buba hooncha. ꞋEt ꞌuhutni, “Nyoo mai chun, fig huyulhni, daja whe ꞌuja ꞌá dizgi?”

21ꞋEt Jesus ndúbulhni, “ꞋAlhaꞌ nohdusi, bé ꞌalha ꞌuhoontꞌoh-i ahtꞌi de, ꞌinkꞌez ꞌaw nohba nawh lheꞌwhutástꞌel whe mai chun cha ꞌá dizgi, nohni cha whuz unꞌa za ꞌet ndutihnelh. ꞋInkꞌez ꞌaw ꞌet za iloh, njan shus ꞌi laꞌ dóhni, ‘Dudilhtsꞌit ꞌinkꞌez bunghun whucho tsꞌe tailhtsꞌit,’ dahni de, ꞌet whuz unꞌa nduwhútanelh. 22ꞋEt ndai ookaꞌ dahni tenadudli be, nohba ꞌalha ꞌuhoontꞌoh de, ꞌi tsꞌiyawh nohgha tíkulh.”

Jesus ndai gha dune ando ꞌuntꞌoh, ꞌet hukwa huyoodulhkut

23ꞋEt ꞌawet lugliz whucho daninya whe ꞌet dilhtsꞌine whe whúbondunilhꞌeꞌ. ꞋEt ꞌudedo lubretne ꞌinkꞌez dune ꞌutso whudilhdzulhne cha, highu nindil ꞌinkꞌez ꞌuhuyúlhni, “Nedini ndai gha dune ando ꞌintꞌoh whe njan ndintꞌen-un. ꞋInkꞌez mbe ntlꞌa honꞌai whe dune bukꞌunuhilhyeꞌ?”

24ꞋEt Jesus ꞌubulhni, “Si cha ꞌilhoghun hukwaꞌ nohoodutaskut. Sudahni de, nohdutasnelh ndai gha dune ando ꞌustꞌoh whe njan ndustꞌen. 25Ntsꞌenꞌa John dune too be ꞌúlhꞌen? Mbe yutlꞌa honꞌai dune too be tilhꞌelh huba? Yakꞌuz tsꞌe tilah ha hóoltsꞌut, kꞌus dune tilah tsꞌu ha hóoltsꞌut?” Dichꞌoh lhtoh howu yahalhduk ꞌinkꞌez ꞌuhutni, “Yakꞌuz tsꞌe ha hóoltsꞌut tsꞌutni de, ꞌet la ꞌunedóneꞌ, ‘Di ha John nohba ꞌalha lheꞌdusni?’

26ꞋEt hoontsꞌi, ‘Dune tsꞌu ha hóoltsꞌut’ tsꞌutni de, ꞌaw ꞌuzdooniꞌ ꞌaitꞌoh, dune bubeznuljut, tsꞌiyanne John nus hooꞌen-un ꞌuntꞌoh huninzun ꞌet huwa.”

27ꞋInka Jesus nduhuyulhni, “ꞋAw ntsꞌez de ha hóoltsꞌut tꞌetsꞌonuszun.” ꞋInkꞌez Jesus ndúbulhni, “Ndai be dune ando ꞌustꞌoh whe njan nduwhúsꞌen-un, ꞌaw nohdósniꞌ ꞌaitꞌoh.”

Nane ndet oobá buba hukwaꞌ ninzun ꞌoh te neꞌhutꞌen eh?

28“Nja huwun daja nahzun? ꞋIlhoghun dune nane ooyeꞌke ꞌudetso-un yughu ninya ꞌinkꞌez ꞌuyulhni, ‘Syeꞌ tsꞌekoo tooꞌ mai chun ha niyeh tsꞌe whuz inyalh ꞌinkꞌez sba ꞌintꞌen.’

29ꞋEt yuchꞌa tsédisnih inleꞌ. ꞋEt hoontsꞌi hukwꞌelhꞌaz ndunátꞌeꞌ ꞌinkꞌez whuz whinya.

30ꞋEt bulh nat-un ooyeꞌ, ꞌen cha yughu ninya ꞌinkꞌez ꞌuyulhni. ‘A, whuz toosyaꞌ ꞌinkꞌez ꞌoostꞌen la!’ yulhni. ꞋEt hoontsꞌi ꞌaw whuz lhtiyal.”

31ꞋEt Jesus ꞌutni, “Ndunne nane kꞌus mbe oobá buba hukwaꞌ ninzun ꞌoh te hukwꞌu neꞌhustꞌen?” “ꞋUdechoo-un, ꞌen za,” hutni. ꞋEt Jesus ndúbulhni, “Tsꞌihꞌun nohdusni ndunne sooniya nalhdzoohne ꞌinkꞌez tsꞌekoo ꞌulꞌenne cha, Yakꞌusda lerwe unli-un, whuz nohtso dahutidulh.

32ꞋEt be tsꞌihꞌun unꞌa ꞌuhoontꞌoh-i, ꞌi be John dune too be ꞌulhꞌen-un nohtsꞌó whusainya, ꞌinkꞌez ꞌaw nohba ꞌalha lheꞌhootꞌoh. ꞋEt hoontsꞌi sooniya nalhdzoohne ꞌinkꞌez tsꞌekoo ꞌulꞌenne, tsꞌiyawh buba ꞌalha ꞌuhoontꞌoh ꞌet huwa. ꞋEt nohni whunulhꞌen ꞌet hoontsꞌi ꞌaw noheni kꞌoh nálheꞌuhlel. Whuz unꞌa za nohba ꞌalha lheꞌhootꞌoh.”

Mai ha níyeh kꞌet whulhꞌaíne bugha whútsꞌodulꞌeh

33“ꞋUyoo be nawhutnuk-i be nohdutásnelh. Soo zólhtsꞌaiꞌ! ꞋIlhoghun yun moodih, ha niyeh kꞌet ꞌuhoonla, ꞌinkꞌez mai tsꞌekoo tooꞌ chun ꞌananla. ꞋInkꞌez whunaꞌniztlꞌoo. ꞋEt tsa kꞌet ha hónkai mai tooꞌ ꞌutahahúlhtsus-un, ꞌet cha neóoninꞌai. ꞋInkꞌez ookꞌut yutistꞌen-i cha wheni ꞌuhinla. Ha niyeh kꞌet ꞌudunne haꞌ nulhyehne butlꞌa hónꞌai, ꞌinkꞌez nilhdzaꞌ keyoh tsꞌe whinya. 34Oonujin-un neooninzut whe yun whumoodih de ꞌulhnane, whuz whe balhꞌaꞌ ꞌinkꞌez ꞌutꞌenne, butsꞌun mai hitalhchulh ha.

35ꞋEt haꞌ nulhyehne, yun whumoodih be ꞌulhnane hubílhchoot. ꞋIlhoghun ꞌuzi ꞌun hitizno. ꞋIlhoghun cha hizilhghi. ꞋIlhoghun cha tse be huyolhꞌuz. 36Doo cha za ꞌonghohne ꞌulhnane ꞌon nus ꞌultsukne whuz whe balhꞌaꞌ. ꞋEnne cha whuz unꞌa za ꞌet ndúbuhinla. 37ꞋEt ꞌudekꞌez duyeꞌ whuz butsꞌú whe yalhꞌaꞌ. ‘ꞋEn la hidólhtiꞌ,’ ni.

38ꞋEt hoontsꞌi bughu whulhꞌaine hitilhꞌen whe ꞌulhodutni, ‘Ndun ha níyeh kꞌet oochꞌeꞌ-un, ooyeꞌ ꞌútꞌen. Tsꞌuzoolhghelh! ꞋEt de la ootsꞌó tiltsꞌulh-un ndúwhulcho la tsꞌohólhchoot!’ 39ꞋInka huyílhchoot ꞌinkꞌez ha níyeh kꞌet tenáhinino ꞌinkꞌez hizilhghi.

40ꞋEt huwa mai tsꞌekoo tooꞌ chun ha niyeh-un, ꞌen oochꞌeꞌ whusatiyalh. Whusainya de, ꞌet dábooleh suba?”

41ꞋEt ꞌuhúyulhni, “Ndunne untsiꞌne, hooncha hukwꞌunꞌa musai ubutilhtselh ꞌinkꞌez ha niyeh kꞌet ꞌuyoonne haꞌ úntilhyehne bugho whutálhꞌalh. ꞋEt whuz unꞌa newhúzuk totsuk mai higha hitalelh.”

42ꞋEt Jesus ndúbulhni, “ꞋAw eh hukwꞌu yalhuzulhduk Yakꞌusda ooghuni daja ni inleꞌ daꞌ? ꞋUkꞌehooguz:

‘Ndi tse yoh ꞌuwhulhꞌenne ꞌún hidutilhꞌuz-i,

ꞌi yoh ookꞌu whuzꞌai-un huba soo ꞌukꞌenus tse ꞌuntꞌoh-i suliꞌ.

Moodihti whuz unꞌa ꞌuhoonla.

ꞋInkꞌez wheni tube neba hooncha wheꞌ hoontꞌoh,’ ni.

43ꞋEt huwa nohdúsni, Yakꞌusda lerwe unli-un, tsꞌiyawh nohghu nahootálhchulh ꞌinkꞌez ꞌudoh didowhne butlꞌa óotiꞌalh. ꞋEnne la ꞌutꞌen unzoo-i butsꞌu ha óokat. 44ꞋInkꞌez mbe la ndi tse hikꞌiltsꞌutne, tsꞌiyawh yahidutátih. ꞋInkꞌez mbe la bukꞌé diltsꞌutne, tsꞌiyawh musai hutileh.”

45ꞋEt Lizwif lubret bumoodihne ꞌinkꞌez Phariseene cha, ndi khuni be nawhutnuk-i whulh ꞌúhudantsꞌo whe tꞌehonanzin Jesus didut bughu yalhduk whe ꞌutni. 46Ntsꞌenꞌa suba Jesus huyitálhchulh-un ꞌet hukwaꞌ hutꞌen. ꞋEt hoontsꞌi dune éhunuljut. ꞋEnne Jesus nus hooꞌen-un ꞌuntꞌoh huninzun ꞌet huwa.

Currently Selected:

Matthew 21: crx

Highlight

Copy

Compare